رومی (رحمتہ) کے کلام سے میری جان بے چین ہو گئی ؛ میرے بدن کا ہر ذرّہ تڑپنے لگا۔

اچانک میں نے مغرب و مشرق کے درمیان آسمان پر ایک نورانی بادل چھایا دیکھا۔

اس بادل سے ایک فرشتہ نبچے اترا ؛ اس کے دو چہرے تھے ایک آگ کی مانند دوسرا دھوئیں کی مانند۔

ایک رات کی مانند تاریک اور دوسرا روشن ستارہ؛ ایک کی آنکھ بیدار دوسرے کی خوابیدہ۔

اس کے بالوں کی رنگت سرخ، زرد، سبز، سیمیں، نیلی اور آسمانی تھی۔

اس کے مزاج میں خیال کی سی تیز روی تھی؛ زمین سے کہکشاں تک کا فاصلہ وہ ایک لمحے میں طے کر لیتا تھا۔

ہر زمان اس کے اندر نئی خواہش پیدا ہوتی تھی اور وہ ایک نئی فضا میں پرواز کرتا تھا۔

کہنے لگا میں زروان ہوں اور اس جہان پر میرا تسلّط ہے؛ میں نگاہ سے پنہاں بھی ہوں اور ظاہر بھی ہوں۔

ہر تدبیر میری تقدیر کے ساتھ بندھی ہوئی ہے ؛ گونگے اور گویا سب میرے شکار ہیں۔

میری وجہ سے شاخ کے اندر سے غنچہ پھوٹتا ہے؛ میری وجہ سے پرندہ آشیاں کے اندر محو فغاں ہے۔

میری نشو و نما سے دانہ درخت بنتا ہے؛ میرے فیض سے ہر فراق وصل میں تبدیل ہوتا ہے۔

میں عتاب بھی لاتا ہوں اور التفات بھی؛ تشنگی پیدا کرتا ہوں تاکہ مشروب لاؤں۔

میں ہی زندگی ہوں، میں ہی موت اور میں ہی روز محشر؛ میں ہی حساب کتاب، میں ہی دوزخ، جنت اور اس کی حوریں۔

آدم یا فرشتہ سب میرے اسیر ہیں؛ یہ شش روزہ جہان میری اولاد ہے۔

ہر پھول جو شاخ سے توڑتا ہے وہ میں ہوں؛ ہر چیز جو تو دیکھتا ہے اس کو جنم دینے والا میں ہوں۔

یہ جہان میرے طلسم میں اسیر ہے اور میرے سانس سے یہ ہر لحظہ بوڑھا ہوتا جاتا ہے۔

مگر جس جوانمرد کے دل میں لی مع اﷲ بیٹھ گیا وہ اس طلسم کو توڑ دیتا ہے۔

اگر تو چاہتا ہے کہ میں درمیان میں نہ رہوں ؛ تو لی مع اﷲ دوبارہ دل و جان سے پڑھ۔

میں نہیں جانتا اس کی نگاہ میں کیا تھا کہ میری نگاہ سے یہ پرانا جہان اوجھل ہو گیا۔

یا تو میری نگاہ نے کوئی اور جہان دیکھا ؛ یا یہی جہان سارے کا سارا تبدیل ہو گیا۔

میں اس کائنات رنگ و بو میں مر گیا؛ اور ایسے جہان میں پیدا ہوا جو ہا و ہو (ہنگامہ) بغیر تھا۔

اس پرانی دنیا سے میرا رشتہ منقطع ہو گیا؛ اور ایک نیا جہان میرے ہاتھ آ گیا۔

اس جہان کے نقصان سے میری جان تڑپنے لگی؛ یہاں تک کہ میری خاک سے ایک نئے عالم نے جنم لیا۔

میرا بدن سبک تر اور جان (روح) تیز رفتار ہو گئی ؛ اور میرے دل کی آنکھ بیدار ہو کر اس کی بینائی تیز تر ہو گئی۔

چھپی ہوئی چیزیں بے حجاب ظاہر ہو گئیں ؛ اور میرے کانوں نے ستاروں کا نغمہ سنا۔(حدیث: مجھے اللہ تعالے کے ساتھ ایسا وقت میسّر ہے جو کسی نبی، مرسل یا فرشتہء مقرّب کو میسّر نہیں۔