جب تو نے اپنے ہاتھ کو تیغ و قلم کا مرکّب بنا لیا تو پھر اگر تیرا بدن لنگڑا یا لولا ہو تو کوئی فکر کی بات نہیں۔

اے برادر شمشیر کی نوک اور قلم کی زبان سے ہنر پیدا ہوتا ہے جیسے آگ سے نور اور نروان (لکڑی) سے آگ۔

اگر بے دین کے ہاتھ میں قلم اور تیغ آ جائے تو اسے بے ہنر شمار کر کیونکہ دین نہ ہو تو قلم یا تیغ کی کوئی قیمت نہیں۔

دین دانا سے عزت پاتا ہے اور نادان کے ہاتھوں خوار ہوتا ہے؛ نادان کے سامنے دین اس طرح ہے جیسے گائے کے سامنے چنبیلی۔

اس کپڑے کی مانند جس کے نصف سے حضرت الیاس (علیہ) کا کرتہ بنتا ہے اور باقی نصف سے یہودی کا کفن بنتا ہے۔

وہ افغان جوان جس نے کئی سلطنتوں کی بنیاد ڈالی اور پھر وہ اپنے پہاڑوں اور بیابانوں کی طرف واپس چلا گیا۔ اس نے اپنے کہسار میں آ گ بھڑکائی پھر کیا وہ اس آگ کے اندر سے پختہ تر ہو کر نکلا یا اسی میں جل گیا؟

قو میں اخوت میں سرگرم ہیں لیکن افغانی بھائی لڑ رہا ہے۔

(حقیقت یہ ہے) کہ اس کی زندگی سے مشرق کی زندگی وابستہ ہے؛ اس کا دس سالہ لڑکا بھی لشکر کی قیادت کر سکتا ہے۔

اس بے خبر نے اپنے آپ کو اپنی قوّت سے خالی کر دیا ہے اور وہ اپنی صلاحیتوں کو پہچان نہیں سکا۔

وہ دل رکھتا ہے مگر دل سے غزل ہے اس کا بدن بدن سے الگ ہے اور دل دل سے باہمی شدید اختلافات میں مبتلا ہے۔

اس مسافر کو منزل کی طرف راستہ نہیں ملتا ؛ وہ اپنی جان کے مقاصد سے بے خبر ہے۔

یہ شاعر افغان شناس جو کچھ دیکھتا ہے بے دھڑک کہہ دیتا ہے؛ کیا خوب کہا ہے۔

وہ افغان قوم کا نبّاض اور بیماری کا طبیب تھا۔

اس نے اپنی قوم کا مرض دیکھا اور اسے واشگاف کہہ دیا؛ اس نے سچی بات شوخیء رندانہ سے بیان کر دی۔

اگر آزاد افغان ایسا اونٹ پائے جو ساز و سامان اور موتیوں سے لدا ہوا ہو:

تو اس کی دوں ہمتی کا یہ عالم ہے کہ وہ موتیوں کے انبار کے بجائے اونٹ کی گھنٹی سے خوش ہو جائے گا۔

ہماری نہاد میں تب و تاب دل کی وجہ سے ہے؛ دل ہی سے بدن بیدار ہوتا ہے یا خوابیدہ۔

دل مر جائے تو بدن کی حالت بدل جاتی ہے؛ اس کے مسامات میں پسینہ خون بن جاتا ہے۔

دل فساد زدہ ہو جائے تو بدن بالکل ہیچ ہے اس لیے تو اپنی نگاہ ہر طرف سے ہٹا کر صرف دل پر رکھ۔

ایشیا آب و گل کا ایک پیکر ہے اور اس پیکر کے اندر ملت افغان دل کی مانند ہے۔

اس کے فساد سے سارے ایشیا کی خرابی ہے اور اس کی اصلاح میں سارے ایشیا کی اصلاح ہے۔

جب تک دل آزاد ہے بدن بھی آزرد ہے ؛ دل آزار نہ ہو تو بدن اس تنکے کی مانند ہے جو ہوا کے راستے میں ہے۔

بدن کی طرح دل بھی آئین کا پابند ہے ؛ عداوت و کینہ سے دل مر جاتا ہے اور دین سے دل زندہ ہوتا ہے۔

دین کی قوّت مقام وحدت سے ہے؛ وحدت وجود میں آ جائے تو ملت بن جاتی ہے۔

مشرق کو مغرب کی تقلید نے اپنا آپ بھلا دیا ہے؛ ان اقوام مشرق کو چاہئیے کہ وہ مغرب کو تنقید کی نظر سے دیکھیں۔

مغرب کی قوّت چنگ و رباب سے نہیں؛ نہ یہ بے پردہ لڑکیوں کے رقص کی وجہ سے ہے۔

نہ یہ سرخ چہرہ محبوبوں کے جادو کی وجہ سے نہ یہ ان کی عورتوں کی ننگی پنڈلیوں اور بال کٹانے سے ہے۔

نہ اس کا استحکام لا دینی کی وجہ سے ہے اور نہ اس کی ترقی رومن رسم الخط کے باعث ہے۔

افرنگ کی قوّت ان کے علم اور فن کے سبب سے ہے؛ ان کا چراغ اسی آگ سے روشن ہے۔

ان کی حکمت لباس کی قطع و برید کے سبب سے نہیں؛ عمامہ علم و ہنر سے منع نہیں کرتا۔

اے شوخ و شنگ جوان علم و فن کے لیے مغز چاہئیے نہ کہ مغربی لباس۔

اس راہ میں صرف نگاہ مطلوب ہے، یہ ٹوپی یا وہ ٹوپی مطلوب نہیں۔

اگر تیرے اندر زود رس فکر اور تیز بیں طبع ہے تو یہ دونوں چیزیں علم و فن کے لیے کافی ہیں۔

اگر کوئی شخص اپنی راتیں فکر اور مطالعہ میں بسر کرتا ہے تو وہ علم و فن اور حکمت کا سراغ پا لیتا ہے۔

معنی کی سلطنت جس کی حدود کا تعیّن کوئی نہیں کر سکا؛ کوشش پیہم کے بغیر ہاتھ نہیں آتی۔

ترک جو اپنا آپ بھول چکے ہیں اور فرنگ کی تقلید میں مست ہیں؛ انہوں نے فرنگیوں کے ہاتھوں میٹھا زہر کھایا ہے۔

چونکہ انہوں نے عراق کا تریاق گنوا دیا ہے، میں اس کے سوائے اور کیا کہہ سکتا ہوں کہ اللہ تعالے ان کی حفاظت فرماے۔(تا تریاق از عراق آوردہ شد، مار گزیدہ مردہ شد)

ان افرنگ کے غلاموں نے اپنے اظہار کے لیے مغربیوں سے رقص و سرود لے لیا ہے۔

انہوں نے لہو و لعب کے عوض اپنی جان کی نقدی ہار دی ہے ؛ کیونکہ علم مشکل ہے اور کھیل تماشا آسان ہیں۔

تن آسانی کے سبب ان کی فطرت نے آسان چیز اختیار کر لی ہے۔

دیر کہن (دنیا) میں آسانی کی تلاش کا مطلب یہ ہے کہ جان بدن کے اندر سے ختم ہو چکی ہے۔

کیا آپ تہذیب فرنگ کو پہچانتے ہیں ؛ ان کی دنیا میں رنگوں کی سینکڑوں جنتیں ہیں۔

اس تہذیب کے جلوں نے کئی خاندان اور کئی شاخیں پتّے اور آشیانے جلا دیئے ہیں۔

اس تہذیب کا ظاہر چمکدار اور دلفریب ہے مگر اس کا اندرون کمزور اور نظاروں پر فریفتہ ہے۔

آنکھ ان کے جلوے دیکھتی اور دل اندر سے لرزتا ہے اور انسان اس بتخانہ کے سامنے سر نگوں ہو جاتا ہے۔

کوئی نہیں جانتا کہ مشرق کی تقدیر کیا ہے؟ یہ لوگ جنہوں نے ظاہر سے دل لگا لیا ہے ان سے بچنے کی تدبیر ہو سکتی ہے؟

اس وقت مشرق کی تقدیر رضا شاہ پہلوی اور نادر شاہ والیء افغانستان کے عزم و تدبّر پر موقوف ہے۔

پہلوی جو تخت قباد کا وارث ہے اس کے ناخن نے ایران کا عقدہ کھولا ہے۔

نادر جو درانیوں کا سرمایہ ہے ، اس نے ملت اسلامیہ کا نظام قائم کیا ہے۔

وہ دین و وطن کے غم سے نڈھال تھا ؛ اس کا لشکر کوہسار سے باہر آیا۔

وہ سپاہی بھی ہے سپہ گر بھی اور سپہ سالار بھی؛ وہ دشمنوں کے لیے فولاد کی طرح سخت ہے اور دوستوں کے لیے ریشم کی طرح نرم۔

میں اس پر قربان جاؤں اس نے اپنی قوّت کا صحیح اندازہ کیا ہے اور موجودہ دور کے بارے میں بھی صحیح رائے قائم کی ہے۔

اہل یورپ کے طور طریقے ساحروں کے سے ہیں اس لیے اپنے سوائے کسی اور پر اعتماد کرنا کافری ہے۔

اے زندہ رود ہند کے متعلق دوبارہ کچھ کہہ جس کے ایک تنکے کے مقابلہ میں بوستان کوئی حقیقت نہیں رکھتا۔

مگر اب اس کی مسجد کے ہنگامے ختم ہو چکے ہیں اور اس کے بتخانوں کی آگ ٹھنڈی پڑ چکی ہے۔

ہم نے اس کے لیے اپنا دل خون کیا؛ اور اپنی جان سے اس کی یاد پرورش کی ہے۔

ہمارے غم سے اس کے غم کا اندازہ کر؛ افسوس ایسے ناقدر شناس معشوق پر۔

آج کل ہندی قانون فرنگ سے انکاری ہیں؛ وہ فرنگیوں کے سحر و افسوں کو قبول نہیں کرتے۔ غیر کا آئین روح پر بار گراں ثابت ہوتا ہے؛ خواہ وہ آسمان ہی سے کیوں نہ اترا ہو۔

چونکہ آدم خاک کی مٹھی سے دل اور دل میں آرزو لیے پیدا ہوتا ہے۔

اس لیے گناہ کی لذت چکھنا اور اپنے سوائے کسی کو خاطر میں نہ لانا اس کا کام ہے۔

کیونکہ گناہ کے بغیر خودی ہاتھ نہیں آتی؛ اور جب تک خودی ہاتھ نہ آئے آدمی شکست کھاتا ہے۔

تو نے میرے شہر و دیار کی زیارت کی ہے؛ تیری آنکھوں نے میرے مزار کو مس کیا ہے۔

تو حدود کائنات کا شناسا ہے ؛ کیا تو نے دکن میں زندگی کے اثار دیکھے ہیں۔

میں نے دکن میں اپنے آنسوؤں کے دانے بوئے ہیں اور اس چمن کی خاک سے گلہائے لالہ پیدا ہوئے ہیں۔ دریائے کاویری جو ہر وقت سفر میں ہے اس کی جان میں ایک نیا شور دیکھا ہے۔

تجھے وہ کلام عطا ہوا ہے جو دلوں کے غنچے کھلا دیتا ہے؛ میں ابھی تک تیرے آنسو ؤں کی تپش سے جل رہا ہوں۔

دانایان راز کا ناخن محنت و کاوش کر کے ساز کی رگوں سے جوئے خون نکالتا ہے۔

تیری جان سے جو نوا اٹھ رہی ہے اس نے ہر سینے کو سوز درون عطا کیا ہے۔

میں نے جناب رسالت مآب (صلعم) کی مجلس میں حاضری دی ہے؛ آپ (صلعم) وہ شخصیت ہیں جن کے بغیر زندگی کے راستے طے نہیں ہوتے۔

اگرچہ وہاں بات کرنے کی جرات نہیں، وہاں روح کو سوائے دیدار جمال کے اور کوئی کام نہیں۔

مگر چونکہ میں تیرے اشعار کی گرمی سے متاثر تھا ، میری زبان تیرے افکار آ گئے۔

حضور نے فرمایا (صلعم) 'یہ شعر جو تو پڑھ رہا ہے کس کے ہیں؛ اس میں زندگی کے ہنگامے موجود ہیں'۔

اب تو نے اسی سوز کے ساتھ جو جان کو پسندیدہ ہے ؛ ہماری طرف سے دریائے کاویری کو ایک دو باتیں پہنچا دے۔

دنیا میں تو بھی زندہ رود ہے اور وہ بھی زندہ رود ؛ سرود کے اندر سرود بہت خوب رہے گا۔