میں آپ سے اس قوم کے حالات کی بہتری چاہتا ہوں، جس کے فقیہ ہا یقین سے بے بہرہ اور کم علم ہیں۔ میں نے بہت سی ایسی باتیں دیکھی ہیں، جو دیکھی نہیں جا سکتیں، 'کاش میری ماں نے مجھے نہ جنا ہوتا'۔

کب تک آپ کی نگاہ غضب آلود رہے گی، یہ حاضر و موجود بت کب تک رہیں گے۔ (دنیا کے) اس بتکدے میں ابراہیم (علیہ) کی اولاد (مسلمان)، کب تک نمرود (غیر اللہ ) کی نمک خوار (غلام) رہے گی۔

اب گذشتہ سرود واپس آئے یا نہ آئے؟ حجاز کی طرف سے ٹھنڈی ہوا چلے یا نہ چلے؟ اس فقیر (اقبال) کی زندگی تو ختم ہوئی، اب کوئی اور راز آشنا آئے یا نہ آئے۔

اگر وہ دانائے راز آئے ، تو اسے نوائے دلگداز عطا فرمائیں۔ امتوں کے دلوں کو یا تو کلیم پاک کرتا ہے، یا ایسا حکیم جو نے نواز (شاعر) ہو۔

میری متاع بس ایک دل درد آشنا ہے، میرا مقصود بے اثر فریاد ہے۔ میری قبر کی مٹی پر لالے کا پھول ہی اچھا لگے گا، کیونکہ یہ میری طرح خاموش بھی ہے اور خونیں نوا بھی۔