مانا کہ مولانا صاحب بد مزاج ہیں؛ مانا کہ ان کی نگاہ چھلکے کے اندر سے مغز کو نہیں پہچانتی ۔ لیکن اگر وہ مجھ جیسے مسلمان کو : کعبہ سے باہر نکال دیں ، تو اس میں وہ حق بجانب ہیں۔

فرنگی نے کعبہ و دیر (دونوں جگہ) سے (لوگ) شکار کر لیے؛ خانقاہوں سے صدا اٹھی کہ 'وہ غیر نہیں'۔ مولانا صاحب کی خدمت میں شکایت کی؛ تو انہوں نے دعا کے لیے ہاتھ اٹھا دیے : 'الہی ! اس کی عاقبت خیر ہو!'

تو صوفی و ملّا کی قید میں گرفتار ہے؛ قرآن پاک سے زندگی حاصل نہیں کرتا۔ اسس کی آیات سے تجھے صرف اتنا سروکار ہے؛ کہ مرتے وقت یسن پڑھ لے، تاکہ جان آسانی سے نکل جائے۔

قرآن پاک کے آئینہ میں اپنے خد و خال دیکھ؛ تو یکسر بدل چکا ہے ، اپنے آپ سے گریز کر۔ اپنا کردار جانچنے کے لیے (قرآن پاک کا) ترازو سامنے رکھ؛ اور پھر سے (دور اوّل کی سی ) قیامتیں برپا کر دے۔

میری طرف سے صوفی و ملّا کو سلام پہنچے ؛ کہ انہوں نے ہمیں اللہ تعالے کا پیغام سنایا ۔ مگر اس کلام کی جو تاویل انہوں نے کی ؛ اس نے اللہ تعالے ، جبریل (علیہ) اور جناب رسول پاک (صلعم) سب کو حیرت میں ڈال دیا۔

ایک واعظ کافر گر نے (جو بات بات پر دوسروں کو کافر کہتا تھا) دوزخ کی بات کہی؛ مگر کافر نے اس سے بھی دلچسپ بات کہی: یہ غلام (شائد) اپنے احوال نہیں جانتا ؛ جو دوزخ کو اوروں کا مقام بتاتا ہے (غلامی کی دوزخ کی زندگی ہے)۔

ایک پختہ کار اور خود شناس مرید نے ؛ اپنے پیر سے یہ تیکھی بات کہی: خاک مزار سے روزی حاصل کرنا ؛ اپنے آپ کو مرگ ناتمام کے سپرد کرنا ہے (ایسا شخص نہ زندہ ہے ، نہ مردہ)۔

ایک پیشہ ور پیر نے اپنے بیٹے سے کہا؛ تجھے یہ نکتہ اچھی طرح سے یاد رکھنا چاہیے: اس دور کے نمرودوں سے دوستی رکھ؛ (کیونکہ) ان کے فیض سے براہیمی کا ڈھونگ رچایا جا سکتا ہے۔