خودی اللہ تعالے کے نور سے روشن ہے؛ اس کی کوشش نا تمام ہی میں اس کی کامیابی ہے۔ اس کا ہجر ، اس کے وصال کے مقامات میں سے اور اس کا وصال، مقامات جدائی میں سے ہے۔

جب کوئی قوم باتیں بنانا چھوڑ دیتی ہے، تو اس کی خاک سے (حصول مقصد کی) آرزو جنم لیتی ہے۔ پھر آرزو کی بدولت اس کی خودی شمشیر بن جاتی ہے اور اس شمشیر کی دھار خوشبو (اصلیت) سے رنگ (ظاہری ٹیپ ٹاپ) کو الگ کر دیتے ہیں۔

خودی کا وجود حق تعالے کے وجود سے ہے؛ خودی کی نمود ، حق (سچائی) کے اظہار سے ہے۔ میں نہیں جانتا کہ اگر دریا نہ ہوتا، تو (خودی کا ) یہ تابدار گوہر کہاں ہوتا۔

جب دل مٹی (بدن) کی صحبت اختیار کر لیتا ہے، تو اس وقت اسے ننید کی لذّت آ لیتی ہے۔ جب وہ 'من' تخلیق کرتا ہے، تو بیدار ہو جاتا ہے، لیکن اگر اس کا 'من' تن کا محکوم ہو جائے، تو وہ (دل) مر جاتا ہے۔

(اللہ تعالے سے) ہمارا وصال ، وصال اندر فراق ہے؛ جب تک انسان میں نظر پیدا نہ ہو، یہ عقدہ وا نہیں ہوتا۔ بے شک گوہر (خودی) آغوش دریا (باری تعالے) میں گم ہے، مگر آب بہار اور آب گوہر میں بہت فرق ہے (گوہر دریا میں رہتے ہوئے بھی ، دریا سے الگ ہے)۔

میری خاک بدن اسی کس دم قدم سے ہے، میرے گل و ریحان (افکار و جذبات) اسی کے ابر تر کے رہین منت ہیں۔ نہ میں اپنے آپ کو پہچانتا ہوں ، نہ حق تعالے کو، مگر اتنا جانتا ہوں کہ میں ان کے پہلو میں ہوں۔