نقطہ ء نور جس کا نام خودی ہے ؛ یہی ہمارے بدن میں زندگی کا شرر ہے ۔

یہ (اللہ تعالے کی) محبت ہی سے زیادہ زندہ ، زیادہ پائندہ اور زیادہ سوزندہ ہوتا ہے۔

محبت ہی سے اس کا جوہر نکھرتا ہے اور محبت ہی سے اس کے اندر پوشیدہ صلاحیتوں کی نشو و نما ہوتی ہے۔

اس کی فطرت عشق ہی سے حرارت حاصل کرتی ہے؛ اور عشق ہی سے دنیا کو جگمگا دینے کا طریقہ سیکھتی ہے۔

عشق کو تیغ و خنجر کا کوئی خطرہ نہیں کیونکہ اس کی اصل (عناصر) آب و باد و خاک سے ہے۔

عشق کی تیغ جوہر دار آب حیات ہے؛ اسی سے دنیا میں صلح و آشتی ہے اور اسی سے جنگ و جدل

عشق کی نگاہ پتھر کو توڑ دیتی ہے؛ اللہ تعالے کا عشق انسان کو 'بندہ ء مولا صفات' بنا دیتی ہے۔

عاشقی سیکھ اور اپنے لیے محبوب ڈھونڈ ؛ مگر اس کے لیے چشم نوح (علیہ) اور قلب ایوب (علیہ) چاہیے۔

کسی کامل کے آستان پر بوسہ زن ہو کر (اس سے وابستگی اختیار کر کے) اپنی مشت خاک کو کیمیا بنا لے۔

اپنی شمع کو رومی (رحمتہ) کی مانند روشن کر اور رم کو تبریز کی آگ میں جلا دے (رم سے مراد مولانا رومی اور تبریز سے آپ کے مرشد شمس تبریز کی صرف اشارہ ہے)۔

تیرے دل کے اندر ایک محبوب نہاں ہے، اگر نگاہ رکھتا ہے تو آ میں تجھے دکھاؤں ۔

اس سے محبت کرنے والے محبوبوں سے زیادہ حسین زیادہ خوش وضع، اور پیارے ہو جاتے ہیں ؛ اس سے محبت کرنے والے محبوب تر ہو جاتے ہیں۔

آپ (صلعم) کے عشق سے دل قوّت پاتا ہے اور خاکی انسان کا رتبہ ثریا جتنا بلند ہو جاتا ہے۔

اور نجد کی خاک نے آپ (صلعم) کے فیض سے بلند رتبہ پایا اور افلاک تک پہنچ گئی۔

حضور (صلعم) کا مقام مسلمان کے دل میں ہے؛ حضور (صلعم) ہی کے نام سے ہماری آبرو ہے۔

طور آپ (صلعم) کے گھر کے غبار کی ایک موج ہے؛ آپ (صلعم) کا حجرہ مبارک کعبہ کے لیے بیت الحرم (حرمت والا گھر) ہے۔

ابد آپ (صلعم) کے اوقات کے ایک لمحہ سے بھی کمتر ہے؛ (بلکہ ) ابد نے آپ (صلعم) کی ذات (صفات) سے اپنی ابدیت پائی ہے۔

آپ (صلعم) خواب راحت کے حضور لیے بوریا کو ممنون فرماتے ؛ (دوسری طرف) آپ (صلعم) کی امت نے کسری کا تاج پاؤں تلے روند ڈالا۔

آپ (صلعم) نے شبستان حرا میں خلوت اختیار کی؛ اور ( ایک نئی) ملت، نیا آئین اور (نئے انداز کی) حکومت وجود میں لائے۔

آپ (صلعم) نے کئی راتیں بے خوابی میں گذار دیں ؛ تب کہیں جا کر آپ (صلعم) کی امت نے تخت خسروی پر آرام پایا۔

جنگ کے دوران آپ (صلعم) کی تلوار لوہے کو باآسانی کاٹ کے رکھ دیتی؛ نماز کے دوران آنجناب (صلعم) کی آنکھوں سے آنسوؤں کی جھڑیاں لگ جاتیں۔

نصرت کی دعا کے ساتھ آمین کہتے ہی آپ (صلعم) اپنی تلوار میان سے باہر نکال لیتے (صرف دعا پر اکتفا نہ کرتے) (چنانچہ) آنجناب (صلعم) کی تلوار نے بادشاہوں کا سلسلہ ختم کر دیا۔

آپ (صلعم) نے دنیا میں نیا آئین رائج فرمایا؛ اقوام قدیم ایران و روما کی (بالادستی کی) مسندیں لپیٹ دیں۔

آپ (صلعم) نے دین کی کنجی سے دنیا کا دروازہ کھولا ؛ زمانہ کے بطن سے آپ (صلعم) جیسا کوئی اور پیدا نہ ہوا۔

آپ (صلعم) کی نگاہ میں پست و بالا ایک درجہ رکھتے تھے (عزت کی بنیاد صرف تقوی تھا)؛ (چنانچہ) آپ (صلعم) اپنے غلام کے ساتھ ایک دسترخوان پر بیٹھ کر کھانا کھاتے۔

جنگ کے دوران اس بلند مرتبت شخصیت (صلعم) کے سامنے حاتم طائی کی بیٹی قید ی بن کر پیش ہوئی۔

اس کے پاؤں میں زنجیرتھی، وہ با پردہ لباس نہ ہونے کے باعث شرم و حیا سے گردن جھکائے تھی۔

حضور اکرم (صلعم) نے جب اس لڑکی کو بے پردہ دیکھا ؛ تو اپنی چادر سے اس کا سر ڈھانپ دیا۔

ہم (اس دور کے مسلمان ) قبیلہ طے کی اس خاتون سے زیادہ عریاں ہیں؛ اقوام دنیا کے سامنے ہم بھی (عزت و احترام کی) چادر کے بغیر ہیں۔

روز قیامت آپ (صلعم) ہی (کی شفاعت ) پر ہمارا بھروسہ ہے؛ اس دنیا میں بھی آپ (صلعم) ہی ہمارے عیب ڈھانپنے والے ہیں۔

آپ (صلعم) کا لطف و قہر دونوں سراپا رحمت ہیں؛ لطف دوستوں کے لیے رحمت ہے اور قہر دشمنوں کے لیے (انہیں برائی اور گناہ سے بچاتا ہے)۔

آپ (صلعم) نے اپنے دشمنوں پر بھی رحمت کے دروازے کھول دیے (فتح مکہ کے بعد ) قریش کو یہ فرما کر کہ ' آج تم پر کوئی تعزیر نہیں' انہیں معاف فرما دیا۔

ہم مسلمان وطن کی (جغرافیائی) حد بندیوں سے آزاد ہیں؛ ہم نگاہ کی مانند ہیں، جو دو آنکھوں کے نور سے مرکب ہونے کے باوجود ایک ہے۔

ہم حجاز ، چین اور ایران کے شہری تو ہیں؛ مگر ایک ہی صبح خنداں (حضور اکرم (صلعم) کی شبنم ہیں (شبنم سے پھولوں کو تازگی ملتی ہے)۔

ہم ساقیء بطحا کی کیف چشم سے سرشار ہیں ؛ دنیا میں ہماری مثال مئے اور مینا کی سی ہے (جو تعلق مینا اور مئے کا ہے، یہی حضور اکرم (صلعم) اور امت مسلمہ کا ہے)۔

حضور اکرم (صلعم) نے نسلی امتیازات (مفاد) کو یکسر جلا دیا؛ حضور آنجناب (صلعم) نے ان خس و خاشاک سے باغ دنیا کو پاک کر دیا۔

گل صد برگ کی مانند ہماری خوشبو ایک ہی ہے؛ نظام اسلام کی جان حضور اکرم (صلعم) اور آپ (صلعم) ایک ہیں۔

ہم (امت مسلمہ ) حضور (صلعم) کے قلب میں پوشیدہ راز تھے؛ آنجناب (صلعم) نے نعرہ ء بیباکانہ (لا الہ الالہ) بلند فرمایا اور ہم ظاہر ہوئے۔

میری خاموشی میں حضور (صلعم) کے عشق کا جوش و خروش ہے؛ میرے آغوش میں سینکڑوں نغمے پرورش پا رہے ہیں۔

میں کیا کہوں کہ آپ (صلعم) کی محبت کیا ہے؛ آپ (صلعم) کے فراق میں خشک لکڑی (حنانہ کا ستون) رونے لگی۔

مسلمان کا وجود آپ (صلعم) کی تجلیات کا مہبط ہے؛ آپ (صلعم) کی گرد راہ سے کئی طور پیدا ہوتے ہیں۔

آپ (صلعم) کے آئینہ (ء قلب) نے مجھے وجود بخشا ؛ میری صبح آپ (صلعم) کے سینے کے آفتاب کی مرہون منت ہے۔

پیہم تڑپ ہی میرے لیے تسکین کا باعث ہے؛ میری شام صبح محشر سے بھی زیادہ گرم ہے۔

آپ (صلعم) ابر بہار ہیں اور میں آپ (صلعم) کا باغ ہوں؛ میرے تاکستان کی تراوت آپ (صلعم) کی باران (رحمت) سے ہے۔

میں نے محبت کی کھیتی میں نگاہ شوق بوئی؛ اور نظارہ جمال کی صورت میں پیداوار حاصل کی۔

مدینہ منوّرہ کی خاک دونوں جہانوں سے پیاری ہے؛ کیا ٹھنڈک پہنچانے والا ہے وہ شہر جہاں محبوب آرام فرما ہے۔

میں جامی کے انداز بیان پہ مفتوں ہوں؛ ان کی نظم اور نثر میری خامی کا علاج ہے۔

اس نے لبریز معنی شعر کہا ہے: گویا حضور (صلعم) کی تعریف میں موتی پرو دیئے ہیں۔

'آپ (صلعم) کتاب کونین کا مقدمہ ہیں؛ سارا جہان غلام ہے صرف آپ (صلعم) آقا ہیں'۔

عشق کی شراب سے کئی کیفیتیں پیدا ہوتی ہیں؛ تقلید بھی عشق ہی کا ایک نام ہے۔

حضرت بایزید بسطامی (رحمتہ) جو (محبت میں ) کامل تھے؛ وہ تقلید میں بھی بے مثال تھے۔ چنانچہ انہوں نے اس بنا پر خربوزہ کھانے سے اجتناب کیا کہ انہیں معلوم نہ تھا کہ حضور اکرم (صلعم) نے اسے کس طرح کھایا۔

اگر تو عاشق ہے؟ تو محبوب (صلعم) کی تقلید سے اپنے عشق کو محکم کر؛ تاکہ تو اللہ تعالے کو اپنی محبت کی کمند میں لا سکے۔ (ان سے کہیں: اگر تم اللہ تعالے سے محبت رکھتے ہو تو میری اتباع کرو، اللہ تعالے تم سے محبت کرے گا۔)

تھوڑی دیر کے لیے اپنے دل کے غار حرا میں خلوت اختیار کر؛ اپنے آپ کو چھوڑ اور اللہ تعالے کی طرف ہجرت کر۔

پھر اللہ تعالے کی محبت سے محکم ہو کر اپنی طرف واپس آ؛ اور ہوس کے بتوں (لات و عزّی) کا سر توڑ دے۔

عشق کی قوّت سے لشکر تیار کر اور عشق کے فاران کی چوٹی پر جلوہ گر ہو۔

تاکہ رب کعبہ تجھے اپنی تجلی سے نواز دے؛ اور خلافت الہی کے بلند مرتبہ پر فائز کرے۔