اے (مسلمان ) کبھی تو جو شیروں سے خراج وصول کرتا تھا؛ اب حاجتمندی کے باعث تیری طبیعت لومڑی کی سی ہو گئی ہے۔

تیری آرزو کی باعث تیری ناداری ہے؛ تیری ساری تکلیف کی بنیاد یہی بیماری ہے۔

ناداری فکر بلند سے رفعت چھین لیتی ہے؛ اور اعلی افکار کی شمع کو گل کر دیتی ہے۔

تو غلامی کے خمخانہ سے مے رنگین لے؛ زمانے کی جیب سے اپنی نقدی نکال۔

حضرت عمر (رضی اللہ ) کی طرح ( اپنا گرا ہوا کوڑا اٹھانے کے لیے) خود اونٹ سے نیچے اتر؛ دوسروں کا احسان اٹھانے سے بچ اور ضرور بچ۔

تو (حکم چلانے کے لیے) کب تک منصب کب بھیک مانگتا رہے گا؛ کب تک بچوں کی طرح سرکنڈے کا گھوڑا بنائے گا۔

وہ فطرت بلند جو آسمان پر نظر رکھتی ہے دوسرے کے احسان سے پست ہو جاتی ہے۔

سوال کرنے سے خودی کے اجزا بکھر جاتے ہیں ؛ اور خودی کا نخل سینا تجلّی سے محروم ہو جاتا ہے۔

سوال سے مفلسی اور ذلیل ہو جاتی ہے؛ گدائی سے گداگر اور نادار ہو جاتا ہے۔

اپنی مشت خاک کو اور پراگندہ نہ کر ؛ چاند کی طرح اپنے پہلو سے اپنا رزق حاصل کر۔

اگرچہ تیری روزی تنگ ہو اور تیرا نصیبا یاور نہ ہو ؛ اور تو مصائب کے سیلاب کی منجدھار ہو۔

پھر بھی تو دوسرے کی نعمت سے رزق کا جویا نہ ہو؛ چشمہء مشرق سے بھی موج آب کا جویا نہ ہو۔ (عین دریا میں حباب آسا نگوں پیمانہ کر)۔

تاکہ تجھے کل ( قیامت کے دن) جو انتہائی کرب انگیز ہو گا؛ حضور (صلعم) کے سامنے شرمندگی نہ اٹھانی پڑے۔

چاند سورج کے دسترخوان سے روزی پاتا ہے؛ اس لیے اس کے دل پر اس احسان کا داغ پڑا ہوا ہے۔

للہ تعالے سے توفیق مانگ اور حالات کا مقابلہ کر ؛ ( کسی کے سامنے ہاتھ پھیلا کر) ملت اسلامیہ کی آبرو زائل نہ کر۔

جس ذات گرامی (صلعم) نے کعبہ کو بتوں کی خس و خاشاک سے پاک کیا اس کا ارشاد ہے کہ محنت کرنے والا اللہ تعالے کا دوست ہوتا ہے۔

افسوس ہے اس شخص پر جو دوسروں کے دسترخواں کا ا حسانمند ہے؛ جس کی گردن دوسروں کے احسان کے سامنے جھکی ہوئی ہے۔

اس نے اپنے آپ کو دوسروں کی مہربانی کی بجلی سے جلا لیا؛ اس نے ایک کوڑی کے بدلے غیرت کا قیمتی سرمایہ فروخت کر دیا۔

کیا خوب ہے وہ شخص جو کڑی دھوپ کے اندر پیاسا ہونے کے باوجود خضر (علیہ) سے بھی پانی کا طلبگار نہ ہو۔

جس کی پیشانی پر سوال کرنے کی شرمندگی سے پسینہ نہیں آتا؛ جو اپنی آدمیت برقرار رکھتا ہے، مٹھی بھر خاک کی طرح بے قرار نہیں ہوتا۔

یہ بلند بخت نوجوان آسمان کے نیچے صنوبر کی طرح سر اٹھا کر چلتا ہے۔

اگر وہ خالی ہاتھ ہو تو وہ اور خود دار ہو جاتا ہے؛ اس کا نصیبا سو جائے تو وہ اور بیدار ہو جاتا ہے۔

کشکول اگر سمندر کی طرح بھرا ہوا ہو تو وہ آگ کا سیلاب ہے؛ اگر اپنی کوشش سے شبنم کے چند قطرے بھی کما لیے جائیں وہ بہتر ہیں۔

بلبلے کی طرح مردانہ غیرت قائم رکھ؛ سمندر کے اندر بھی اپنے پیمانہ کو الٹائے رکھ۔