جب خودی عشق الہی سے مستحکم ہو جاتی ہے؛ تو اس کی قوّت زمانے کی فرمانروا بن جاتی ہے۔

بوڑھا آسمان جس نے ستاروں سے آرائش کی ہے، اس کی شاخوں کے غنچے (ستارے) ٹوٹ گرتے ہیں۔ (عام طور سے خیال کیا جاتا ہے کہ انسانوں کی قسمت ستاروں کی گردش سے وابستہ ہے۔ اقبال فرماتے ہیں کہ جو شخص اپنی خودی مستحکم کر لیتا ہے وہ خود تقدیر کا فرمانروا ہو جاتا ہے اور ستارے اس کے سامنے بے معنی ہیں۔

اس کا ہاتھ اللہ تعالے کا ہاتھ ہو جاتا ہے، اس (صلعم) کی انگلی کےاشارے سے چاند دو ٹکڑے ہو جاتا ہے۔

ایسا شخص دنیا کے معاملات کے فیصلے کرتا ہے؛ دارا و جم جیسے پادشاہ بھی اس کے حکم سے تابع فرمان ہوتے ہیں ۔

میں تمہیں بو علی قلندر (رحمتہ اللہ) کا واقعہ سناتا ہوں؛ اطراف ہند میں ان کا نام مشہور ہے۔

'باغ کہن ' کے اس ترانے سنانے والے نے ہم سے 'گل رعنا' کی بات کہی ہے۔

(جنت کا یہ خطہ) جو بت پرستی کے باعث آتش نہاد بنا ہوا تھا ؛ اس کے دامن کی ہوا سے واقعی بہشت کا ٹکڑا بن گیا تھا۔

ان کا مرید بازار کی طرف گیا ، وہ حضرت بو علی کی شراب (معرفت) سے سرمست تھا۔

اس شہر کے حاکم کی سواری بھی ادھر سے گزری؛ حاکم کے ساتھ کئی غلام اور چوبدار تھے۔

ان میں سے ایک نے آواز دی کہ اے بے سمجھ! حاکم کے ہمراہیوں کا راستہ نہ روک۔

مگر وہ درویش سر جھکائے اپنے افکار میں مست اسی طرح چلتا رہا۔

دوسری طرف سے چوبدار اپنے تکبر میں مست تھا ؛ اس نے درویش کے سر پر لاٹھی دے ماری۔

فقیر حکمران کے ہاتھوں آزردہ خاطر ، رنجیدہ ، ناخوش اور افسردہ گیا۔

اس نے حضرت بو علی کے سامنے فریاد کی اور آنکھوں سے آنسو بہائے۔

اس کی فریاد سن کر شیخ پہاڑ پر گرنے والی بجلی کی مانند اپنی گفتگو سے شعلہ بار ہوئے۔

ساتھ ہی اس کے اندر سے ایک اور طرح کی آگ نے سر اٹھایا؛ اپنے منشی کو بلا کر فرمایا۔

قلم اٹھا اور فقیر سے پادشاہ کی طرف فرمان لکھ۔

میرے درویش کو تیرے عامل نے سر پر لاٹھی ماری ہے؛ گویا اس نے ایسا کام کیا ہے جو اس کی متاع جان کو جلا دے گا۔

اس بد نہاد عامل کو یہاں سے واپس بلا؛ ورنہ میں پیری بادشاہت کسی اور کو دے دوں گا۔

اس خدا رسیدہ بندے کے مکتوب نے بادشاہ کے بدن پر کپکپی طاری کر دی۔

اس کے رگ و پے میں رنج و غم کا طوفان امڈ آیا؛ اور اس کا چہرہ آفتاب شام کی طرح زرد پڑ گیا۔

اس نے حاکم کی گرفتاری کا حکم جاری کیا اور قلندر سے اپنی غلطی کی معافی کا خواستگار ہوا۔

امیر خسرو جو شیریں زبان اور رنگین بیان تھے؛ جن کے نغمے گویا ضمیر کائنات کے اندر سے پھوٹتے تھے۔

جن کی فطرت چاندنی کی مانند روشن تھی ، انہیں اپنا سفیر بنا کر بھیجا۔

جب امیرخسرو نے قلندر کے سامنے ساز سے نغمہ گایا ؛ تو ان کی آواز نے درویش کے شیشہء جاں کو پگھلا دیا۔

وہ سطوت جو پہاڑ کی مانند مستحکم تھی؛ ایک نغمہ نے اسے خرید لیا۔

درویشوں کے دل کو زخمی نہ کر؛ ایسا کرنا اپنے آپ کو جلتی ہوئی آگ میں ڈالنا ہے۔