خودی کو نہ چھوڑ بقائے دوام پا لے ، بے شک تو قطرہ ہے لیکن ایسا قطرہ بن جو اپنے اندر سمندر کو سما لے۔

تیری چمک نور خودی سے ہے؛ تو اگر اپنی خودی کو محکم بنا لے گا تو پائیدار ہو جائے گا۔

اسی سودے کی جیب میں نفع ہے ؛ اور اسی آسمان کی حفاظت سے آقائی ملتی ہے۔

تو موجود ہے لیکن فنا سے ڈرتا ہے؛ میں تیرے قربان جاؤں تو نے (زندگی کو) غلط سمجھا ہے۔

چونکہ میں رہ و رسم زندگی سے آگاہ ہوں ؛ اس لیے تجھے بتاتا ہوں کہ زندگی کا راز کیا ہے۔

(زندگی کا راز یہ ہے کہ) پہلے موتی کی مانند اپنے اندر غوطہ زن ہو پھر اپنی خلوت سے سر باہر نکال (اپنے من میں ڈوب کر پا جا سراغ زندگی)۔

پہلے راکھ کے نیچے اپنے شراروں کو جمع کر اور پھر شعلہ بن کر نظروں کو خیرہ کر دے۔

چالیس سالہ (طویل) ریاضت کا گھر جلانے والا بن یعنی لمبی محنت چھوڑ اور اپنا طواف کر کے شعلہء جوالہ بن جا۔

زندگی دوسروں کا طواف کرنے سے نجات پانے اور اپنے آپ کو بیت الحرام (کعبۃاللہ ) سمجھنے کا نام ہے ( اپنی شخصیت کو اتنا پائیدار کر لینا کہ دوسرے تمہارا طواف کریں)۔

پر کھول اور زمین کی کشش سے آزاد ہو جا؛ پرندے کی مانند (بلندی پر اڑ) اور گرنے کا خیال اپنے دل سے نکال دے۔

اے سمجھدار شخص! اگر تو پرندہ نہیں (اڑ نہیں سکتا) پھر بھی غار کے مونہہ پر آشیانہ نہ بنا (ورنہ اس کے اندر گر جائے گا)۔

تو جو علم حاصل کرنے لگا ہوا ہے؛ میں تجھے پیر رومی (رحمتہ اللہ) کا پیغام سناتا ہوں۔

'اگر تو علم سے دینوی منافع حاصل کرنے کی خواہش رکھے گا؛ تو وہ تیرے لیے سانپ ثابت ہو گا ؛ لیکن اگر تو علم سے دل کی دولت حاصل کرے گا تو وہ تیرا دوست ثابت ہو گا۔

کیا تو استاد رومی (رحمتہ اللہ) کا واقعہ جانتا ہے ؛ وہ جو شام کے شہر حلب میں پڑھایا کرتے تھے۔

ان کے پاؤں میں عقلی دلیل کی زنجیر تھی؛ ان کی کشتی (دل) عقل کے اندھیروں میں تھپیڑے کھا رہی تھی۔

وہ موسی تھے ، مگر عشق کے طور سینا سے بے خبر ، نہ انہیں عشق کی خبر تھی، نہ سودائے عشق کی۔

وہ 'تشکک اور اشراق' کی باتیں کرتے ہوئے فلسفہ کے چمکدار موتی پروتے۔

وہ مشائین کے اقوال کی گھتیاں سلجھاتے ؛ ان کے فکر کی روشنی ہر پوشیدہ نکتہ واضح کر دیتی۔

ان کے ارد گرد کتابوں کا انبار لگا رہتا ؛ ان کی زبان کتابوں کے اسرار کی وضاحت میں مصروف رہتی۔

شیخ کامل جنیدی (رحمتہ اللہ) کے ارشاد پر شمس تبریزی (رحمتہ اللہ) رومی (رحمتہ اللہ) کے مکتب کی طرف روانہ ہوئے۔

اور واہاں جا کر مولانا سے کہا : یہ شور و غوغا و قیل و قال ، قیاس و وہم و استدلال کیا ہے؟

رومی (رحمتہ اللہ) نے کہا: بیوقوف زبان بند رکھ ، فلسفیوں کے مقالات کا مذاق نہ اڑا۔

میرے مکتب سے باہر نکل جا؛ یہ (فلسفیوں کے) مقالات ہیں تیرا ان سے کیا تعلق۔

ہماری گفتگو تیری سمجھ سے بالا تر ہے؛ اس گفتگو سے ذہن کا شیشہ روشن ہوتا ہے۔

رومی (رحمتہ اللہ) کی گفتگو نے شمس (رحمتہ اللہ) کے سوز میں اضافہ کیا اور ان کے اندر کی آگ بھڑک اٹھی۔

ان کی برق نگاہ رومی (رحمتہ اللہ) (کے دل) پر گری اور اس کے سوز سے رومی (رحمتہ اللہ) کی خاک کے اندر شعلہ نکلا۔

تبریز (رحمتہ اللہ) کے دل کی آگ نے ادراک کا خرمن بھسم کر دیا ؛ شعلہ پیدا ہوا اور فلسفی (رومی رحمتہ اللہ) کی خاک کو جلا کر راکھ کر دیا۔

مولوی (جو اس وقت) اعجاز عشق سے بے خبر تھا اور ساز عشق کے نغموں کو نہیں پہچانتا تھا۔

اس نے کہا: تو نے یہ آگ کیسے جلائی جس نے اہل فلسفہ کا دفتر راکھ کر دیا؟

شیخ نے کہا: اے مسلمان زنّار دار یہ ذوق حال ہے، تیرا اس سے کیا کام۔

ہماری کیفیت تیری سمجھ سے بالا تر ہے (ہمارے عشق کا) شعلہ کیمیائے احمر ہے جو تانبے کو سونا بنا دیتی ہے۔

تو نے فلسفہ کی برف کو اپنا سرمایہ بنا رکھا ہے ؛ تیرے فکر کے بادل سے صرف اولے ہی برستے ہیں۔

اپنے خس و خاشاک سے آگ روشن کر؛ اپنی مٹی کو شعلہ بنا۔

مسلمان کا علم سوز دل سے کامل ہوتا ہے؛ اسلام کے معنی یہ ہیں کہ غروب ہونے والی چیز کو چھوڑ دیا جائے۔

جب ابراہیم (علیہ) نے غروب ہونے والوں کی قید سے آزادی پائی تو پھر آگ کے شعلے میں بیٹھ کر بھی محفوظ رہے۔

تو نے حقیقی علم کو پس پشت ڈال دیا؛ ایک روٹی کے عوض دولت دین گنوا دی۔

تجھے اپنی چشم سیاہ کی خبر نہیں اس لیے سرمے کی جستجو میں سرگرم ہے۔

خنجر کی دھار سے آب حیات کا خواہاں ہو؛ اژدھے کے مونہہ سے آب کوثر طلب کر۔

بتخانے کے دروازے پہ حجر آسود تلاش کر ؛ باؤلے بت کے ( مونہہ کی جھاگ) میں مشک ناف ڈھونڈ لے۔

مگر دانش حاضر سے سوز عشق کی توقع نہ رکھ؛ اس کافر کے جام میں شراب حقانی کی کیفیت تلاش نہ کر۔

میں ایک مدت تک سعی و کوشش میں لگا رہا؛ دور جدید کے علوم کا رازداں ہوا۔

پروفیسروں نے میرے امتحان لے کر مجھے اس گلستان کا محرم بنایا۔

مگر میں نے اس گلستان (علوم مغربی) کو عبرت کا لالہ زار پایا؛ یہ کاغذی پھول کی خوشبو کا سراب ہے یعنی خوشبو سے خالی ہے۔

بنا بریں میں نے اس گلستان کے بندھن سے اپنے آپ کو چھوڑایا ہے اور شاخ طوبی پر اپنا آشیانہ بنایا ہے۔

جدید علوم حجاب اکبر ہیں ؛ یہ غلط نظریات کے بت بنا کر انہیں پوجتے ہیں اور فروخت کرتے ہیں۔

انہوں نے مظاہر فطرت کے قیدخانے میں اپنے آپ کو قید کر رکھا ہے؛ یہ حواس ظاہری کی حدود سے باہر نہیں نکلتے۔

دانش حاضر زندگی کی راہ میں عاجز آ کر گری پڑی ہے؛ اس نے خود ہی اپنی گردن پر خنجر رکھا ہوا ہے (تمہاری تہذیب اپنے خنجر سے آپ ہی خود کشی کرے گی)۔

اس کی آگ لالہ کی مانند اور اس کا شعلہ ژالہ کی مانند سرد ہے۔

اس کی فطرت سوز عشق سے تہی دامان ہے؛ اس لیے یہ جہان جستجو میں نامراد ہے۔

عقل کی بیماریوں کا معالج صرف عشق ہے؛ عقل کا جنون عشق کے نشتر ہی سے شفا پاتا ہے۔

ساری دنیا عشق کے سامنے سر بسجود ہے؛ عشق ہی عقل کے سومنات کو بتوں سے پاک کرتا ہے۔

مگر دانش حاضر کی مینا میں عشق کی شراب نہیں ہے؛ یارب کہہ کر نالہ و فریاد کرنا اس کی راتوں میں نہیں۔

تو نے اپنے شمشاد (اسلامی تعلیمات) کی قیمت نہ پہچانی ؛ دوسروں کے سرو (مغربی تعلیمات ) کو بلند درجہ دیا۔

بانسری کی مانند تو نے اپنے آپ کو اپنے آپ سے خالی کر دیا اور دوسروں کی آواز سے دل لگایا۔

اے غیروں کے دسترخوان کے ریزوں کے گدا! اپنا سامان دوسروں کی دکان سے خریدتا ہے ۔ (اشارہ اس طرف ہے کہ مغربی علماء نے ہمارے ہی علوم سے فیض حاصل کیا)۔

مسلمان کی مجلس غیر کے چراغ سے جل گئی؛ گویا مسجد کو دیر کے شرر نے جلا دیا۔

جب آہو نواح کعبہ سے بھاگا؛ تو صیاد کے تیر نے اس کا پہلو پھاڑ دیا۔

پھول کی پتّی اپنی خوشبو کی طرح خود بھی منتشر ہو گئی۔ اے اپنے آپ سے بھاگنے والے اپنی طرف واپس آ۔

قرآن پاک کی حکمت کے امانت دار ، اپنی گم شدہ وحدت کو دوبارہ پانے کی کوشش کر۔

ہم جو ملّت کے قلعہ کے دربان ہیں ، ہم نے ملّت کا شعار ترک کر کے کافری اختیار کر لی ہے۔

پرانے ساقی کا پیالہ ٹوٹ گیا ؛ رندان حجاز کی بزم درہم برہم ہو گئی۔

(اب) کعبہ کی آبادی ہمارے بتوں سے ہے، (آج) کفر ہمارے اسلام پر خندہ زن ہے۔

شیخ نے بتوں کے عشق میں اسلام ہار دیا ؛ اس نے زنّار کو تسبیح کا دھاگا بنا لیا۔

(اب) بزرگ صرف اپنے سفید بالوں کی وجہ سے بزرگ ہیں؛ ورنہ ان کے کام ایسے ہیں کہ گلی کے بچے بھی ان پر ہنستے ہیں۔

دل لاالہ کے عشق سے خالی ہے اور ہوس کے بتوں کے باعث بتخانہ بنا ہوا ہے۔

ہر مو دراز ، خرقہ پوش (روحانی بزرگ ) بنا ہوا ہے؛ افسوس ہے ان دین فروش سوداگروں پر۔

(آج کل کے) پیر مریدوں کے ساتھ سفر میں رہتے ہیں ؛ وہ ملّت کی حالات و ضروریات سے بالکل بے خبر ہیں۔

ان کی آنکھیں نرگس کی طرح بے نور ہیں؛ اور ان کے سینے دل کی دولت نہ ہونے کی وجہ سے دل کی دولت سے خالی ہیں۔

کیا واعظ اور کیا صوفی سب جاہ پرست ہیں ؛ ملّت بیضا کا وقار ختم ہو چکا ہے۔

ہمارے واعظ کی آنکھ بتخانے پر لگی ہوئی ہے؛ اور ہمارے مفتیان دین مبین فتوے فروخت کر رہے ہيں۔

دوستو! اب ہمارے لیے کیا چارہ کار باقی رہ گیا ہے؛ اب ہمارے پیر نے میخانے کا رخ اختیار کر لیا ہے۔