اس سات رنگی دنیا میں انسان ہر لحظہ سارنگی کی طرح فریاد کناں ہے۔

محرم راز کی آرزو اسے ہر لمحہ جلاتی اور نالہ ہائے دل نواز سکھاتی ہے۔

لیکن یہ عالم جو پانی اور مٹی سے بنا ہوا ہے کیسے کہیں کہ یہ صاحب دل ہے۔

سمندر، جنگل، پہاڑ، سبزہ، آسمان، سورج، چاند سب گونگے اور بہرے ہیں۔

اگرچہ آسمان پر ستاروں کا ہجوم ہے لیکن ہر ایک دوسرے سے زیادہ تنہا ہے۔

ہر ایک ہماری طرح بیچارہ اور فضائے نیلگوں میں آوارہ ہے۔

یہ قافلہ رخت سفر کے بغیر ہے، جبکہ شب سفر طویل اور آسماں لا محدود ہے۔

کیا یہ جہاں شکار اور ہم شکاری ہیں؟ یا ہم ایسے قیدی ہیں جنہیں فراموش کر دیا گیا ہے۔

میں نے بہت آہ و زاری کی (مگر جواب) میں کوئی آواز نہ آئی فرزند آدم کا ہمراز کہاں ہے؟

میں نے اس چار اطراف کے جہان کے دن کو دیکھا ہے جس کا نور کاخ و کو کو روشن کر رہا ہے۔

ا س کا وجود ایک سیّارہ کی حرکت کا مرہون منّت ہے، یہاں رفت و بود (گیا اور تھا) کے علاوہ اور کچھ نہیں ہے۔

مبارک ہے وہ دن جو سورج کے ایّام سے نہیں جس کی صبح، دوپہر و شام میں تبدیل نہیں ہوتی۔

اگر ایسے دن کے نور سے جان منوّر ہو جائے تو آواز کو رنگ کی طرح دیکھا جا سکتا ہے۔

ایسے دن کی روشنی سے غیب حضوری میں بدل جاتا ہے، وہ دن ہمیشہ رہتا ہے اور کبھی ختم نہیں ہوتا۔

یا الّلّہ ! مجھے وہ دن نصیب فرمائیے اور اس بے سوز دن سے رہائی دلا ئیے۔

آیہء تسخیر کس کی شان میں ہے، اور یہ نیلا آسمان کس (کی عظمت) پر حیران ہے۔

علم الاسماء کا رازدان کون ہوا؟ اس ساقی اور اس کی شراب (الست) سے کون سرمست ہوا؟

آپ نے کسے سارے عالم میں سے منتخب فرمایا اور راز درون سے محرم کیا؟

آپ کے تیر (ہجر ) نے ہمارا سینہ چھید ڈالا، 'مجھے پکارو میں جواب دوں گا'، کس نے کہا تھا اور کس سے کہا تھا؟

آپ کا چہرہ ہی میرا ایمان اور میرا قرآن بنے، آپ اپنے دیدار سے مجھے کیوں محروم رکھتے؟

آفتاب کے سینکڑوں شعاعوں کے بکھیر دینے سے اس کا متاع (نور) کم نہیں ہوتا۔

دور حاضر کے لیے خرد پاؤں کی زنجیر بن چکی ہے، جان بیتاب جو میں رکھتا ہوں وہ کہاں ہے؟

حیات مدّتوں پیچ و تاب کھاتی ہے تب کہیں جا کر ایک جان بیتاب ظہور میں آتی ہے۔

اگر آپ ناراض نہ ہوں تو کہوں کہ یہ شور زمین (دنیا) آرزو کے بیج کے لیے سازگار نہیں۔

اگر اس بنجر زمین میں سے ایک دل بھی پیدا ہو جائے تو اسے غنیمت سمجھئے۔

اگر آپ چاند ہیں میرے شبستان کی طرف آئیے، اور ذرا میری جان کی تاریکی کو دیکھئے۔

شعلے کو خس و خاشاک جلانے سے پرہیز کیوں ہو، بجلی کو گرنے سے کیا خوف۔

میں جب تک جیا فراق ہی میں جیا، مجھے دیکھائیے کہ اس نیلے آسمان کے پرے کیا ہے۔

مجھ پر بند دروازے کھول دیجئے، اس خاکی کو نوریوں کا ہمراز بنایئے۔

میرے سینے میں عشق کی آگ روشن کر دیجئے، عود کو باقی رہنے دیجئے اور ایندھن کو جلا دیجئے۔

پھر اس عود کو آگ پر رکھیئے اور اس کا دھواں سارے جہان میں پھیلا دیجئے۔

میرے پیمانے کی آتش (شراب) کو تیز کر دیجئے، تغافل کے ساتھ ایک نگاہ بھی ملا دیجئے۔

ہم آپ کو ڈھونڈتے ہیں اور آپ ہماری آنکھ سے دور ہیں، نہیں یہ بات نہیں آپ سامنے ہیں، مگر ہم اندھے ہیں۔

یا اس پردہ اسرار کو ہٹا دیجئے، یا دیدار سے محروم اس جان کو واپس لے لیجئے۔

میرے فکر کا درخت برگ و بر سے نا امید ہے، یا اسے کلہاڑے کی نظر کیجئے یا اسے باد سحر سے نوازیئے۔

مجھے عقل دی ہے تو جنون سے بھی نوازیئے، جزب اندرون کی طرف میری رہنمائی فرمایئے۔

علم سوچ میں اپنا مقام رکھتا ہے، عشق کا کاشانہ قلب بیدار ہے۔

جب تک علم عشق سے فیض نہ پائے، وہ تماشا خانہ افکار کے سوائے اور کچھ نہیں۔

یہ تماشا خانہ سحر سامری ہے، روح القدس کے بغیر علم شعبدہ بازی ہے۔

مرد دانا تجلّی کے بغیر رہ نہیں پاتا، اپنے افکار کی دولتّیوں ہی سے مر جاتا ہے۔

تجلّی کے بغیر زندگی بیماری ہے، حق تعالے سے دور لی جاتی ہے اور اس کا دین مجبوری بن کر رہ جاتا ہے۔

کوہ و دشت و بحر و بر کا یہ جہان ہمیں صرف اللہ تعالے کی خبر دیتا ہے مگر ہم اس کے دیدار کے مشتاق ہیں۔

اس دل آوارہ کو منزل عطا فرمایئے، اس ماہ پارے کو دوبارہ چاند سے ملا دیجیئے۔

اگرچہ میری خاک سے سوائے کلام کے اور کچھ پیدا نہیں ہوتا مگر میرے کلام ہجر کی پوری داستان بیان نہیں کر سکا۔

میں آسمان کے نیچے اپنے آپ کو اجنبی پاتا ہوں، آسمان کے اس جانب سے صدا دیجیئے کہ میں قریب ہوں۔

تا کہ اس جہان کی جہات چاند سورج کی مانند نظروں سے اجھل ہو جائیں (تا کہ میں قید مکان سے آزاد ہو جاؤں)۔

اور میں ماضی و مستقبل کے طلسم، اور مہ و مہر و ثرّیا کے جہان سے نکل جاؤں (قید زمان سے بھی آزاد ہو جاؤں)۔

آپ کا نور جاودان ہے جب کہ ہماری ز ندگی شرارے کی مانند ایک دو مستعار لمحوں کی ہے۔

آپ مرگ و حیات کی کشمکش سے بے خبر ہیں، یہ بندہ کون ہے جو اللہ تعالے پر بھی رشک کرتا ہے۔

اگرچہ یہ بندہ آفاق گیر ہے مگر پھر بھی ناصبور ہے، نہ اسے ہجر خوش کرتا ہے نہ وصال (وصال میں مرگ آرزو، ہجر میں لذّت طلب)۔

آپ کا میری زندگی ایک لمحہ کی زندگی ہے، اسے جاودان کر دیجیئے، میرا تعلق زمین سے ہے مجھے آسمانی بنا دیجیئے۔

مجھے گفتار و کردار میں ضبط عطا فرمایئے، راستے سامنے ہیں مجھے ان پر چلنے کی توفیق عطا فرمایئے۔

میں نے جو کچھ کہا ہے ایک اور جہان کی بات ہے، اس کتاب کا تعلق ایک اور آسمان سے ہے۔

میں بحر ہوں کم آبی میرے لیے نقص ہے، کہاں ہے وہ شخص جو میرے افکار (کی گہرائی) میں اترے؟

مجھے ایک جہان میرے ساحل پر آرام کر رہا ہے، مگر وہ کنارے پر بیٹھے سوائے موجوں کی حرکت کے اور کچھ نہیں دیکھتے۔

میں جو پیران کہن سے نا امید ہوں، میں آنے والے دور کی بات کہنا چاہتا ہوں۔

جوانوں کے لیے میرا کلام سمجھنا آسان کر دیجیئے، ان کے لیے میرے سخن کی گہرائیاں پا یاب کر دیجیئے۔