زندگی نے غیب و حضور کی لذّت کی خاطر، اس جہان نزد و دور (متعلّق بہ مکان ) کو منقّش کیا۔

حیات نے تار نفس کو اپنے آپ سے علیحدہ کیا (اس طرح اپنی صفات کا اظہار فرمایا) کہ حیرت خانہ ایّام (دنیا) کو وجود بخشا۔

ہر جگہ خود گری کا ذوق و شوق نظر آتا ہے، ہر کہیں یہ نعرہ سنائی دیتا ہے کہ 'میں اور ہوں، تو اور ہے'۔

چاند ستاروں کو خرام سکھایا گیا، (اور ان کی صورت میں) سینکڑوں چراغ روشن کر دیئے گئے۔

نیلگوں آسمان پر آفتاب نے زربفت کا خیمہ سیمیں تنابوں (شعاؤں ) سے نصب کیا۔

افق سے پہلی صبح نے سر نکالا، اور نئے تخلیق شدہ عالم کو اپنی آغوش میں لے لیا۔

آدم کی دنیا اس وقت محض ایک خاکدان تھی اور اس کے صحرا بغیر کسی کاروان کے تھے۔

نہ کوئی ندی پہاڑوں سے نبرد آزما تھی، اور نہ کوئی بادل صحرا میں آوارہ تھا۔

نہ درختوں پر پرندے نغمہ زن تھے، اور نہ مرغزاروں میں آہو کی تیز رفتار ی تھی۔

دنیا کے بحر و بر اندرونی تجلّی کے بغیر تھے، اٹھا ہوا دھواں اس کے پیکر کی چادر تھی۔

سبزے نے باد بہاری نہیں دیکھی تھی، وہ ابھی تک زمین کی گہرائیوں میں محو خواب تھی۔

نیلے آسمان نے زمین کو طعنہ دیا، میں نے کسی کے حالات ایسے (خراب) نہیں دیکھے۔

میری فضا کی وسعتوں میں تیرے جیسا اندھا کہاں ہے، میری قندیل کے بغیر تیرے لیے کوئی روشنی نہیں۔

خاک اگر الوند پہاڑ بن جائے پھر بھی وہ خاک ہی رہتی ہے، وہ کبھی افلاک کی مانند روشن و پائندہ نہیں ہو سکتی۔

یا دلبرانہ انداز سے زندہ رہ یا کمتری کی ننگ و عار سے مر جا۔

آسمان کے اس طعنہ سے زمین شرمسار، نا امید، کبیدہ خاطر اور مضمحل ہؤی۔

وہ اللہ تعالے کے روبرو اپنی بے نوری کے درد سے تڑپی یہاں تک کہ آسمان کے پرلی طرف سے یہ آواز آئی۔

اے امین تو اپنی امانت سے بے خبر ہے، غم نہ کھا اپنے ضمیر کے اندر نظر ڈال۔

تیرے دنوں کی روشنی ہنگامہ حیات سے ہے اس روشنی سے نہیں جو تو اپنے اطراف میں دیکھتی ہے۔

صبح کی روشنی آفتاب داغدار سے ہے، جبکہ روح کا نور زمانے کے گرد و غبار سے پاک ہے۔

روح کا نور راستوں کے بغیر سرگرم سفر ہے، اور وہ مہر و ماہ کی شعاؤں سے زیادہ تیز رفتار ہے۔

کیا تو نے اپنی لوح جان سے نقش امید دھو دیا ہے (کیا تو بالکل نا امید ہو چکی ہے) نہیں تیری خاک ہی سے نور جان (آدم) وجود میں آئے گا۔

آدم کی عقل کائنات کو مسخر کرے گی اور اس کا عشق شبخون مارے گا۔

اس کا فکر بغیر کسی رہبر کے صیحح راہ (صراط مستقیم) کو سمجھے گا، اور اس کی آنکھ جبریل (علیہ) سے بھی زیادہ بیدار ہو گی۔

ہو گا وہ خاکی مگر اس کی پرواز فرشتوں کی مانند ہو گی، آسمان اس کی راہ میں پرانی کاروان سرائے کی مانند ہو گا۔

آسمان کا وجود بھی اس کی خلش کو اس طرح محسوس کرے گا جیسے ریشم کے اندر سوئی کی نوک۔

وہ کائنات کے دامن سے داغ دھو دے گا، کائنات اس کی نگاہ کے بغیر تیرہ و تار ہوگی۔

اگرچہ وہ کم تسبیح و خون ریز ہو گا (ملائکہ نے کہا تھا کہ ہم تسبیح و تقدیس کرتے ہیں اور آدم جھگڑالو اور خون ریز) لیکن زمانے کے لیے وہ مہمیز ثابت ہو گا (زمانے کی ترقی اس کی بدولت ہو گی)۔

اس کی آنکھ کائنات سے روشن ہو گی، کیونکہ وہ (حق تعالے کی ) ذات کو (کائنات میں کار فرما ان کی) صفات سے دیکھے گا۔

'جو کوئی (حق تعالے کی ذات کے) حسن کا عاشق ہوا، وہی ساری موجودات کا سردار ہے'۔