بلیس کا ظاہر ہونا روشن دلوں کی صحبت ایک دو لمحے رہی اور یہ چند لمحے بود و عدم کا سرمایہ تھے۔

یہ صحبت عشق کو شوریدہ تر اور عقل کو صاحب لظر کر کے ختم ہو گئی۔

میں نے اپنی آنکھیں بند کر لیں تاکہ اس صحبت کو اپنے اندر محفوظ کر سکوں اور اسے دیدہ و دل میں بسا سکوں۔

اچانک میں نے دیکھا کہ جہان تاریک ہو گیا؛ مکان سے لا مکاں تک تاریکی چھا گئی۔

اس رات میں ایک شعلہ ظاہر ہوا؛ اور اس شعلے کے اندر سے ایک بوڑھا نکلا۔

وہ ایک سرمائی قبا میں ملبوس تھا؛ اس کا پیکر پیچ کھاتے ہوئے دھوئیں میں غرق تھا۔

رومی نے کہا یہ ابلیس ہے جو سراپا سوز اور خونیں ایاغ ہے۔

بوڑھا، سنجیدہ اور کم گو جس کی نظر بدن کے اندر جان کو دیکھ لیتی ہے۔

رند، ملّا ، فلسفی اور گدڑی پوش زاہدان سخت کوش کی طرح ہر وقت مصروف کار۔

اس کی فطرت ذوق و صال سے نا آشنا ہے؛ جمال دوام کو ترک کر دینا اس کا زہد ہے۔

کیونکہ جمال خداوندی سے رشتہ توڑنا آسان نہ تھا؛ اس نے سجدے سے انکار کر کے یہ کام سر انجام دیا۔

ذرا اس کی واردات پر نظر ڈال؛ اس کی مشکلات اور اس کا ثبات دیکھ۔

وہ ابھی تک رزم خیر و شر میں غرق ہے؛ اس نے سینکڑوں پیغمبر دیکھے ہیں ، مگر ابھی تک کافر ہے۔

اس کے سوز سے میرے بدن کے اندر جان مضطرب ہوئی ؛ اس کے لب سے آہ غم آلود نکلی۔

اس نے اپنی نیم وا چشم سے مجھے دیکھا اور کہا؛ ہمارے سوائے عمل سے کس نے حصّہ پایا ہے۔

ہم کام میں اس طرح لگے ہوئے ہیں؛ کہ جمعہ کی چھٹی بھی نہیں کرتے۔

نہ میرا کوئی فرشتہ ہے نہ ملازم ؛ میری وحی بغیر پیغمبر کے ہے۔

نہ میں نے کوئی حدیث پیش کی ہے، نہ کتاب نازل کی ہے؛ مگر فقیہوں کے اندر سے آپ کی جان شیریں نکال لی ہے۔

فقیہوں کی طرح کسی نے دین کا رشتہ نہیں کاٹا؛ یہاں تک کہ انہوں نے کعبے کی اینٹ سے اینٹ بجا دی۔

ہمارے مذہب کے اندر اس قسم کی کوئی بنیاد نہیں؛ ابلیس کے مذہب میں کوئی فرقہ نہیں۔

اے بے خبر میں نے سجدہ سے انکار کر کے خیر و شر کے ساز کو (بجانے کے لیے) تیار کیا ہے۔

مجھے اللہ تعالے کے وجود کا منکر نہ سمجھ ، باطن پر نظر ڈال ظاہر پر نہ جا۔

اگر میں یہ کہوں کہ اللہ تعالے نہیں ہیں تو یہ حماقت ہو گی؛ کیونکہ ان کی دید کے بعد ایسا کیا نہیں جا سکتا۔

میں نے 'نہیں ' کے پردے میں ہاں کہا ہے؛ میرا کہنا نہ کہنے سے بہتر ہے؛ (میرا احکام الہی سے انکار ابن آدم کے ایسے (بلی) سے بہتر ہے جس کے بعد وہ اللہ تعالے کی نافرمانی کرتا ہے۔

چونکہ میں درد آدم کو محسوس کرتا ہوں اس لیے میں نے اس کی خاطر اللہ تعالے کا قہر بھی قبول کر لیا ہے۔

میری کشت سے شعلے اگے اور آدم مجبوری سے مختاری تک پہنچا۔

میں نے اپنی برائی کو ظاہر کر کے تمہیں ترک و اختیار کا ذوق دیا۔

اے آدم تو میرے کام کی گرہ کھول اور مجھے میری آگ سے نجات دلا۔

تو جو میری قید میں پڑا ہوا ہے اور تو نے شیطان کو گناہ رخصت دے رکھی ہے۔

اے میرے غمگسار مجھ سے بیگانگی اختیار کر اور جہان میں ہمت مردانہ سے زندگی بسر کر۔

میری شیرینی اور تلخی سے بے نیازی اختیار کر کے زندگی گزار تاکہ میرا نامہء اعمال اور زیادہ سیاہ نہ ہو۔

دنیا میں شکاری کا وجود شکار کی وجہ سے ہے جب تک تو شکار بنا رہے گا ، میرے ترکش میں تیر رہیں گے۔

صاحب پرواز گرتا نہیں ، اگر شکار ہوشیار ہو تو شکاری بے بس ہو جاتا ہے۔

میں نے اسے کہا تو فراق کی راہ چھوڑ ؛ اللہ تعالے کے نزدیک طلاق سب سے نا پسندیدہ عمل ہے۔

وہ بولا 'سوز فراق ہی زندگی کا ساز ہے؛ روز فراق کی مستی کیا خوب ہے۔

میرے لب تک وصل کی بات نہیں آتی ؛ کیونکہ اگر میں وصل چاہوں تو نہ وہ رہتا ہے نہ میں'۔

وصل کی بات نے اسے بے خود کر دیا، اور اس کے دل میں سوز درد از سر نو تازہ ہو گیا۔

وہ تھوڑی دیر تک اپنے دھوئیں کے اندر لوٹ پوٹ رہا اور پھر اسی دھوئیں کے اندر گم ہو گیا۔

اس پیچ کھاتے ہوئے دھوئیں سے ایک فریاد اٹھی کیا خوب ہے وہ جان جس کے اندر درد پیدا ہو۔