نیکی اور بدی کے مالک مجھے آدم کی صحبت نے خراب کر دیا ہے۔

یہ کبھی میری حکم عدولی نہیں کرتا ، اس نے اپنے آپ سے آنکھیں بند کر لی ہیں اور یہ اپنی (عظمت) کو نہیں پا سکتا۔

اس کی خاک 'ابا' (انکار) کے لطف سے نا آشنا ہے اور یہ اپنی بڑائی کے شرر سے بے خبر ہے۔

یہ ایسا شکار ہے جو خود شکاری سے کہتا ہے مجھے پکڑ لے؛ ایسے فرمانبردار بندے سے خدا کی پناہ۔

میری پرانی عبادت کا لحاظ کرتے ہوئے مجھے اس قسم کے شکار سے آزادی دلائیے۔

افسوس ، صد افسوس اس نے میری ہمت بلند کو بھی پست کر دیا ہے۔

اس کی فطرت خام اور عزم کمزور ہے؛ یہ حریف میری ایک ضرب کی تاب بھی نہیں لا سکتا۔

مجھے صاحب نظر اور پختہ تر حریف چاہیئے۔

پانی اور مٹی کی یہ گڑیا مجھ سے واپس لے لیں ؛ میں اس بڑھاپے میں بچوں کی سی حرکتیں نہیں کر سکتا۔

ابن آدم کیا ہے؟ تنکوں کی ایک مٹھی ؛ اس کے لیے تو میرا ایک ہی شرر کافی ہے۔

اگر اس جہان میں تنکوں کے سوا اور کچھ نہ تھا؛ تو مجھے اس قدر آگ دینے کا کیا فائدہ؟

شیشے کو پگھلانا شرم کی بات ہے؛ البتہ پتھر کو پگھلانا کچھ کام ہے۔

میں فتوحات سے اس قدر تنگ آ گیا ہوں کہ انصاف کے لیے آپ کے سامنے حاضر ہوا ہوں۔

میری آپ سے یہ درخواست ہے کہ مجھے ایسے بندہء خدا کی طرف رہنمائی فرمائیے جو میرا انکار کرنے والا ہو۔

مجھے ایسا بندہ چاہئیے جو میری گردن مروڑ دے؛ جس کی نگاہ سے میرے بدن پر کپکپی طاری ہو جائے۔

جو مجھے کہے یہاں سے دفعہ ہو جا؛ جس کے سامنے میری حیثیّت جو کے برابر بھی نہ ہو۔

اے اللہ مجھے ایک زندہ مرد حق پرست عطا کیجئیے ؛ ہو سکتا ہے کہ میں شکست کی لذت پا سکوں۔