پیر رومی راس شعار لوگوں کے امام اور ان کے ہر مقام سے آگاہ ہیں۔

انہوں نے مجھ سے کہا 'اے آسمانوں کی سیر کرنے والے سخت جان مسافر کیا تو وہ عالم زنّار پوش دیکھ رہا ہے۔

جس نے اپنی کمر کے گرد ایک چوری کیے ہوئے ستارے کی دم لپیٹ رکھی ہے۔

سست رفتاری کی وجہ سے اس کا چلنا بھی سکون نظر آتا ہے ؛ اس کی نسبت سے ہر اچھی چیز بھی بری ہو جاتی ہے۔

اگرچہ اس جہان کا پیکر پانی اور مٹی سے ہے مگر اس کی زمین پر پا ؤں رکھنا مشکل ہے۔

روز الست سے کئی ہزار فرشتے جن کے ہاتھوں میں برق کے کوڑے ہیں وہاں حق تعالے کا قہر نازل کر رہے ہیں۔

برق کا درّہ سیارے پر پیہم پڑتا ہے اور اسے مدار پر سے ہٹا دیتا ہے۔

یہ جہان آسمان کا رد کیا ہوا تھا ؛ سورج نہ ہونے کے باعث وہاں کی صبح بھی شام کی مانند تھی۔

یہ ان ارواح کی منزل تھی ان کے لیے کوئی روز قیامت نہیں ، جنہیں جلانے سے دوزح بھی متنفر تھی۔

وہاں دو پرانے طاغوت تھے جنہوں نے اپنے بدنوں کی خاطر قوم کی روح قتل کر دی تھی۔

بنگال کا جعفر اور دکن کا صادق جو انسانیت، مذہب اور وطن سب کے لیے باعث ننگ ہیں۔

یہ دونوں مردود، نا امید اور نا کام رہے؛ مگر ان کی غداری سے پوری قوم فساد کی نظر ہو گئی۔

وہ ملت اسلامیہ جس نے ہر ملت کی غلامی کے بند کھولے تھے اس کی سلطنت اور اس کا دین اپنے بلند مقام سے نیچے گر گیا۔

کیا تو نہیں جانتا کہ خطّہء ہند میں جو صاحب دلوں کا محبوب ہے۔

جس کا ہر جلوہ زمانے کو روشن کرنے والا ہے جو اب خاک و خون میں لتھڑا پڑا ہے۔

اس کی مٹی میں کس نے غلامی کا بیج بویا؟ یہ سارا کام انہی ارواح خبیثہ کا ہے۔

اس کی فضا میں ایک لمحے کے لیے رک جا تاکہ تو دیکھ لے کہ مکافات عمل کیا ہے۔