میں آپ سے ذات باری تعالے کے اس راز کی کلید چاہتا ہوں کہ خود شیطان پیدا کیا اور ہم سے اطاعت چاہی۔

ایک طرف گناہ اور برائی کو دل فریب بنایا دوسری طرف ہم سے نیکی چاہی۔

میں آپ سے پوچھتا ہوں کہ یہ فسون سازی کیا ہے؛ بد نہاد ساتھی کے ساتھ جواء کھیلنے کا کیا مطلب!

مشت خاک (انسان ) اور یہ چرخ گرداں ؛ آپ ہی کہیں کہ کیا کام اللہ تعالے کو زیب دیتا ہے۔

ہمارے اعمال اور ہمارے افکار ہمارے لیے باعث آزار ہیں؛ ہمارا کام صرف دانتوں سے اپنا ہاتھ کاٹنا (اظہار حیرت و ملامت) ہے۔

وہ بندہ جو اپنی قوّتوں کا احساس رکھتا ہے؛ وہ نقصان سے بھی نفع حاصل کر لیتا ہے۔

شیطان کے ساتھ دوستی آدم کے لیے عذاب ہے؛ مگر شیطان سے مقابلہ کرنے میں آدم کا حسن نکھرتا ہے۔

اپنے آپ کو شیطان کے مقابل لانا چاہئیے ؛ تو سراپا تیغ ہے اور وہ سان (جس سے تلوار تیز کی جاتی ہے)۔

تو اپنی تلوار کو اور تیز کر تاکہ تیرا وار سخت پڑے ، ورنہ تو دونوں جہانوں میں سیاہ بخت رہے گا۔

آسمان کے نیچے آدمی آدمی کو کھا رہا ہے؛ قومیں قوموں کو لوٹ رہی ہیں۔

اہل کشمیر کے حالات دیکھ کر میری جان سپند (حرمل) کی طرح تڑپتی ہے اور میرے دل سے درد بھرے نالے اٹھتے ہیں۔

یہ قوم زیرک اور تیز ہے، خوش شکل ہے؛ ان کی ہنرمندی دنیا کے لیے مثال ہے۔

مگر اس کا ساغر اس کے اپنے ہی خون میں ڈوبا ہوا ہے؛ میری نے سے اسی کے احوال کی فریاد نکل رہی ہے۔

چونکہ خودی سے بے نصیب ہے اس لیے اپنے ہی ملک کے اندر اجنبی ہے۔

اس کا مزدوری کرنے والا ہاتھ دوسروں کے ہاتھ میں ہے، اس کی ندی کی مچھلی دوسروں کے کانٹے میں گرفتار ہے۔

دوسری قوموں کے قافلے قدم بقدم منزل کی جانب بڑھ رہے ہیں مگر اہل کشمیر کے معملات نا خوب، خام اور ان گھڑت ہیں۔

غلامی سے اس کے جذبات مر چکے ہیں، اور اس کے انگور کی رگ میں آتش حیات افسردہ ہو چکی ہے۔

یہ نہ سمجھ کہ یہ ہمیشہ سے اسی طرح ناصیہ فرسائی کرتا رہا ہے۔

کسی زمانے میں یہ لوگ صف شکن ، جنگجو ، جانباز اور حوصلہ مند رہے ہیں۔

کشمیر کے برف پوش پہاڑ اور آتشیں دست چنار کو دیکھ۔

یہ خطہ موسم بہار میں پتھروں سے لعل رنگ پھول اگاتا ہے اور اس کی خاک سے ایک طوفان رنگ اٹھتا ہے۔

اس کے پتھروں اور وادیوں میں بادل کے ٹکڑے اس طرح پھرتے ہیں جیسے دھنیے کی کمان سے دھنی ہوئی روئی۔

وہاں کے پہاڑ ، دریا اور غروب آفتاب کا منظر اتنا خوبصورت ہے کہ وہاں اللہ تعالے کا جمال بے نقاب نظر آتا ہے۔

میں وہاں کے نشاط باغ میں آوارہ پھرتا ہوا خوشی سے مثنوی مولانا روم کے اشعار گا رہا تھا۔

شاخوں میں بیٹھے ہوئے ایک پرندے نے مجھ سے کہا ، یہ بہار دمڑی کی بھی قیمت نہیں رکھتی۔

باد بہار نے اس سرزمین کا گریبان پھاڑ دیا ہے ، گل لالہ نے سر نکالا ہے اور سیاہ چشم نرگس پوچھتی ہے۔

یہاں کے پرندوں اور وادیوں کے اندر سے چنبیلی کے پھول جو چاندنی سے پاکیزہ تر ہیں سالہا سال سے کھل رہے ہیں۔

پھولوں کو کھلتے اور مرجھاتے عمریں گذر گئیں ، لیکن ہماری خاک سے کوئی اور شہاب الدین پیدا نہ ہوا۔

اس مرغ سحر کے نالہء پرسوز نے میری جان میں نئی تڑپ اور نیا جوش پیدا کر دیا۔

وہاں میں نے ایک دیوانے کو یہ اشعار پڑھتے دیکھا، اس کی آواز نے میرے صبر و ہوش کی متاع غارت کر دی۔

ہمیں ہمارے حال پر چھوڑ دے ہم سے نالہء مستانہ کی خواہش نہ رکھ، شاخ گل کی بات چھوڑ یہ رنگ و بو محض طلسم ہے۔

تو کہتا ہے کہ شبنم گل لالہ کی پتّی سے ٹپکی ہے، غافل یہ تو دل ہے جو ندی کے کنارے بیٹھا رو رہا ہے۔

یہ مشت پر کہاں اور اس قسم کا گیت کہاں ؛ یہ تو غنی کی روح ہے جو مرگ آرزو کا ماتم کر رہی ہے۔

باد صبا اگر جنیوا کی طرف تیرا گذر ہو ؛ تو مجلس اقوام تک ہماری یہ بات پہنچا دینا۔

دہقان، اس کی کھیتی، ندیاں، پھولوں کی کیاریاں سب کو فروخت کر دیا؛ ساری قوم کو فروخت کر دیا اور کس قدر ارزاں فروخت کر دیا۔

بیٹے میں تجھے ایک باریک نکتہ بتاتا ہوں ؛ بدن محض خاک ہے اور جان قیمتی چیز ہے۔

جسم کو جان کی خاطر فروخت (قربان) کیا جا سکتا ہے؛ پاک (روح) اور خاک (بدن) میں امتیاز کرنا چاہیئے۔

اگر تو بدن سے اس کا ٹکڑا الگ کر دے؛ تو بدن کا وہ ٹکڑا ہمیشہ کے لیے ضائع ہو جاتا ہے۔

لیکن وہ جان جو جلوہء جمال حق سے مست ہو جائے؛ اگر تو اسے ہاتھ سے دے دے تو وہ تیرے ہاتھ آ جاتی ہے (شہید زندہ ہیں)۔

جان کے جوہر کی کوئی مثال نہیں؛ وہ (بدن کی) قید میں ہوتے ہوئے بھی آزاد ہے۔

اگر تو جان کو بچا بچا کر رکھے تو یہ بدن میں مر جاتی ہے؛ اگر تو اسے (حق پر) شمار کرتا ہے تو پھر یہ انجمن کا نور ہے۔

اے جوانمرد جان جلوہ مست کیا ہے؟ اور ہاتھ سے جان دے دینے کے کیا معنی ہیں؟

جان دینا حق کے لیے جان کی بازی لگا دینا اور پہاڑ کو اس کے سوز سے پگھلا دینا ہے۔

جلوہ مستی؟ اپنے آپ کو پا لینا اور دنیا کی شب تاریک میں ستارے کی مانند چمکنا ہے۔

اپنے آپ کو نہ پانا ، معدوم ہونا ہے؛ اپنے آپ کو پا لینا ، خود کو زندگی عطا کرنا ہے۔

جس نے اپنے آپ کو دیکھا اور اپنے سوائے اور کسی کو نہ دیکھا ، وہ اپنے قید خانے سے باہر نکل آیا۔

وہ جلوہ مست جو اپنے آپ کو دیکھ لیتا ہے (اپنی صلاحیتوں سے آگاہ ہو جاتا ہے) وہ (مشکلات کے) نیش کو (آسودگی کے) شہد سے خوشتر سمجھتا ہے۔

(وہ جان کو نایاب نہیں سمجھتا بلکہ) ہوا کی طرح ارزاں سمجھتا ہے ، اس کے سامنے اس کے گرد بنایا ہوا حصار ٹوٹ جاتا ہے۔

اس کا تیشہ پتھر کو توڑ دیتا ہے یہاں تک کہ وہ زمانے سے اپنا حصّہ لے لیتا ہے۔

جب وہ جان سے گذر جاتا ہے تو جان (ہمیشہ کے لیے) اس کی جان بن جاتی ہے ورنہ یہ جان تو ایک دو دم کی مہمان ہے۔

آپ نے نیکی اور بدی کی حکمت بیان کر دی ہے؛ اے پیر دانا، اب ایک اور نکتہ سمجھائیے۔

آپ معنی پر نگاہ رکھنے والوں کے مرشد اور بادشاہوں کے رموز کے محرم تھے۔

ہم محتاج ہیں اور حکمران ہم سے خراج مانگتا ہے؛ تخت و تاج کی حیثیت کیا ہے؟

مشرق و مغرب میں پادشاہت کی حقیقت کیا ہے؟ یا قوموں کی مرضی یا جنگ و جدل۔

اے والا مقام! میں تجھے صاف صاف بتاتا ہوں، دو اشخاص کے علاوہ کسی کو خراج ادا کرنا حرام ہے۔

یا وہ اولی الامر جو منکم کے تحت آئے؛ قرآن پاک کی آیت اس کے حق میں دلیل ہے۔

یا خراج کا حقدار وہ جوانمرد ہے جو باد صرصر کی طرح تند و تیز شہر گیر اور معرکہء حق و باطل میں اپنی جان کی بازی لگا دینے والا۔

جو میدان جنگ میں قوّت سے فتح حاصل کرنے والا ہو اور امن میں انداز دلبری رکھتا ہو۔

ایران و ہندوستان کو خریدا جا سکتا ہے مگر پادشاہی کو کسی سے خریدا نہیں جا سکتا۔(پادشاہی قوّت بازو ہی سے حاصل کی جا سکتی ہے۔)

اے ہنرمند جوان! کبھی کسی نے جام جم کو شیشہ گر کی دکان سے نہیں خریدا۔

اور اگر کوئی وہان سے خریدتا ہے تو اس کا مال محض شیشہ ہے؛ ٹوٹ جانے والی چیز ہے۔

ہند کو یہ ذوق آزادی کس نے دیا ہے؟ شکار کو شکاری کا جنون کس نے عطا کیا ہے؟

یہ زندہ دل برہمن زادے ہی تو ہیں، جن کے چہروں کی سرخی گل لالہ کو شرمسار کرتی ہے۔

یہ تیز بین ، پختہ کار اور سخت کوش ہیں؛ ان کی نگاہ سے انگریز فریادی ہیں۔

ان کی اصل ہماری خاک دامن گیر سے ہے؛ یہ ستارے آسمان کشمیر سے طلوع ہوئے ہیں۔

اگر تو ہماری خاک کو بے شرر سمجھتا ہے؛ تو ذرا اپنے اندرون پر نظر ڈال۔

یہ سارا سوز جو تیرے اندر ہے یہ کہاں سے آیا؟ اس باد بہاری کے جھونکے کہاں سے تھے؟

یہ وہی ہوا ہے جس کی تاثیر سے ہمارے کوہسار رنگ و بو پاتے ہیں۔

کیا تجھے معلوم ہے کہ ایک دن جھیل ولر میں ایک موج دوسری موج سے کہہ رہی تھی۔

ہم کب تک جھیل کے اندر آپس میں متلاطم رہیں گی ؛ اٹھ کہ ہم ایک لمحہ کے لیے ساحل سے ٹکرائیں۔

ہمارے اندر پیدا ہونے والی وہ پرانی ندی ؛ جس کا شور وادیوں، پہاڑوں اور میدانوں میں ہے۔

وہ ہر لمحہ راستے کے پتھروں سے ٹکراتی ہے؛ یہاں تک کہ پتھر کے اندر سے بھی اپنا راستہ بنا لیتی ہے۔

وہ دریا جو شہروں ، جنگلوں اور آبادیوں کو لپیٹ میں لے لیتا ہے، سینکڑوں ندیوں کے پانی سے پرورش پاتا ہے۔

(دریائے جہلم کی) شوکت انسانوں کے لیے محشر بپا کر دیتی ہے، یہ ہمارے اندر ہی سے نکلا ہے، کسی اور جگہ سے نہیں نکلا۔

ساحل کے اندر محدود رہنا غلطی ہے؛ ہمارا ساحل ہمارے لیے سنگ راہ بنا ہوا ہے۔

کناروں کے اندر رہنا مرگ دوام ہے؛ خواہ سمندر کے اندر ہم موجیں باہم متلاطم کیوں نہ رہیں۔

زندگی کوہ و دشت کے درمیان جولانیاں دکھانے کا نام ہے؛ مبارک ہے وہ موج جو ساحل سے آگے گذر گئی۔

اے (زندہ رود) تو نے زندگانی کی پیشانی پر رقم تقدیر پڑھی ہے؛ تو نے اہل مشرق کو ہنگامہ عطا کیا ہے۔

تیرے اندر وہ آہ ہے جس نے جگر کو جلا دیا اگر تو اس آہ سے بے تاب ہے تو ہم تجھ سے زیادہ بے تاب ہیں۔

باغ کے پرندے تیری وجہ سے ہا و ہو میں مصروف ہیں؛ سبزہ تیرے آنسوؤں سے وضو کرتا ہے۔

تیری طبع رواں سے کیاریوں میں پھول کھلتے ہیں؛ تیری امید نے دوسروں کو بھی پر امید کر دیا ہے۔

کاروانوں کے لیے تیری آواز بانگ رحیل ہے؛ تو اہل کشمیر سے کیوں نا امید ہے؟

کشمیریوں کے سینوں میں دل مر نہیں گیا ؛ ان کا انگارہ برف کے نیچے بجھ نہیں گیا۔

ذرا ٹھہر؛ تو ابھی دیکھ لے گا کہ صور کی آواز کے بغیر اہل کشمیر قبروں کے اندر سے اٹھ کھڑے ہوں گے۔

اے صاحب نظر غم نہ کھا بلکہ اپنے اندر سے وہ آہ نکال جو خشک و تر کو جلا دے۔

اس نیلے آسمان کے نیچے بہت سے شہر کسی درویش کے دل کی آہ سے جل چکے ہیں۔

سلطنت بلبلے سے بھی زیارہ نازک چیز ہے؛ اسے ایک پھونک سے برباد کیا جا سکتا ہے۔

نوا ہی سے قوموں کی تقدیر کی تشکیل ہوتی ہے اور اسی سے ان کی تعمیر و تخریب بھی۔

اگر چہ تیرے کلام کا تیر دلوں میں پیوست ہو چکا ہے؛ مگر کسی نے تجھے تیری حقیقی صورت میں نہیں دیکھا۔

شاعری تیرا پردہ ہے ورنہ جو کچھ تو کہتا ہے وہ شاعری سے ماورا ہے۔

ایک نوائے مستانہ سے بہشت کے اندر ایک نیا ہنگامہ برپا کر دے۔

تشنہ ء درویشی کے ساتھ موافقت اختیار کر اور دما دم لگا رہ؛ جب پختہ ہو جائے تو اپنے آپ کو سلطنت جم کے مقابلے پر لے آ۔

پوچھنے لگے ، کیا ہمارا جہان تیرے موافق ہے؟ میں نے کہا نہیں ؛ کہنے لگے اسے برہم کر دے۔

میکدے میں جا کر دیکھا ہے کوئی شائستہ ندیم نہیں ہے؛ مغبچوں سے واسطہ نہ رکھ، قوّت رستم رکھنے والوں سے پنجہ لڑا۔

اے لالہ ء صحرائی تنہا نہیں جلا جا سکتا ؛ اپنا یہ داغ جگر تاب آدم کے سینے کو بھی عطا کر دے۔

تو اس کا سوز درون ہے، تو ہی اس کی گرمیء خون ہے اگر اعتبار نہیں تو پیکر کائنات کو چیر کر دیکھ لے۔

اگر عقل تیرا چراغ ہے تو اس کو سر راہ رکھ دے؛ اگر عشق تیرا پیالہ ہے تو صرف محرم راز سے مل کر پی۔

میں اپنی آنکھوں سے دل پر خون کے ٹکڑے آنسوؤں کی صورت میں گرا رہا ہوں۔