حوریں جو محلوں اور خیموں میں قیام پذیر تھیں ؛ انہیں میری نوا نے سوز تمام عطا کیا۔

کوئی خیمے سے باہر سرنکال کے دیکھنے لگی؛ کسی نے بالا خانہ سے اپنا چہرہ دکھایا۔

بہشت جاودان میں رہنے والے ہر دل کو میں نے اس خاکدان ہند کا درد غم دیا۔

پیر پاک زاد یعنی رومی زیر لب مسکرایا ، اس نے کہا ؛ اے ہندی جادوگر؛

اس ہند ی شاعر کو دیکھ جس کے فیض نگاہ سے شبنم گوہر بن گئی۔

یہ نکتہ سنج جس کا نام بر تری ہری ہے ، اس کی فطرت ابر بہار کی مانند ہے۔

اس نے چمن سے نئی کھلی ہوئی کلیوں کے علاوہ اور کچھ نہیں چنا ، تیرا نغمہ اسے ہماری طرف کھینچ لایا۔

وہ (اقلیم) سخن کا بادشاہ ہے اور فقر کے اندر بھی بلند مقام رکھتا ہے۔

اس کے نادر فکر نے خوبصورت نقوش تخلیق کیے ہیں ؛ اس کے چند الفاظ میں معنی کے جہان آباد ہیں۔

وہ زندگی کے کارخانے سے باخبر ہے، وہ جم ہے اور اس کے اشعار جام جم۔

ہم فن کی تعظیم کے لیے اٹھ کھڑے ہوئے ؛ پھر اس کے ساتھ صحبت آراستہ کی۔

آپ نے اپنے اشعار میں دلنواز نکتے بیان کیے ہیں ؛ آپ کے کلام سے مشرق زندگی کے رازوں سے باخبر ہوا۔ مجھے بتایئے شعر میں سوز کہاں سے آتا ہے ؟ خودی سے پیدا ہوتا ہے ؛ یا اللہ تعالے کی طرف سے عنایت ہوتا ہے۔

کوئی نہیں جانتا کہ دنیا میں شاعر کہاں ہے؛ شاعر اپنے کلام کے بم و زیر کے پردے میں نہاں رہتا ہے۔

اس کے پہلو میں جو دل گرم ہے وہ اللہ تعالے کے حضور میں پہنچ کر بھی قرار نہیں پاتا۔

ہماری جان جستجو کے اندر لذت پاتی ہے؛ شعر کو بھی مقام آرزو سے سوز حاصل ہوتا ہے۔

تو جو شراب سخن سے مست مدام ہے ، اگر تجھے یہ مقام آرزو (مقصود کی تڑپ) میسّر آ جائے؛

تو دنیا کے اندر دو اشعار کہہ کر ، بہشت کی حوروں کے دلوں کو گرویدہ کیا جا سکتا ہے۔

میں نے ہندیوں کو پیچ و تاب میں دیکھا ہے کہ آپ اللہ تعالے کے راز کو وا شگاف بیان کر دیں۔

یہ بے اختیار خدا جو پتھر یا اینٹ کے بنے ہوئے ہیں ؛ برتر وہی ہیں جو بتخانہ و کلیسا سے دور ہے۔

ذوق عمل کے بغیر عبادت خشک رہتی ہے؛ اور کہیں نہیں پہنچاتی ؛ زندگی سر تا پا کردار ہے خواہ اچھا ہو یا برا۔

میں تجھے ایک ایسی بات برملا بتاتا ہوں جسے سب نہیں جانتے ؛ مبارک ہے وہ شخص جو میری اس بات کو لوح دل پر لکھ لے۔

یہ جہان جسے تو دیکھتا ہے ، اللہ تعالے کی کارفرمائی نہیں؛ چرخہ بھی تیرا ہے اور وہ دھاگا بھی (تیرا ہے) جو تیرے تکلے پر کاتا جا رہا ہے۔

موافقت عمل کے قانون کے سامنے سجدہ کر (یعنی اسے تسلیم کر) کیونکہ دوزخ، اعراف اور بہشت سب عمل ہی سے پیدا ہوتے ہیں۔