اگرچہ جنت بھی اللہ تعالے کی تجلیات میں سے ایک تجلی ہے؛ مگر محبوب حقیقی کے دیدار کے بغیر جان تسکین نہیں پاتی۔

ہم اپنی اصل سے پردے میں ہیں؛ ہم اس پرندے کی مانند ہیں جو اپنا آشیاں گم کر چکا ہے۔

اگر علم کج فطرت اور بد اصل ہو تو وہ آنکھوں کے سامنے حجاب اکبر بن جاتا ہے۔

لیکن اگر علم سے مقصود نظارہء جمال ہو تو وہ راستہ بھی ہے اور راہبر بھی۔

پھر وہ تیرے سامنے وجود کا چھلکا رکھتا ہے تاکہ تو دریافت کرے کہ اس نمود کا راز کیا ہے۔

اس طرح وہ علم راستے کو ہموار اور شوق کو بیدار کرتا ہے۔

وہ تجھے درد و داغ، تاب و تب اور گریہء نیم شب عطا کرتا ہے۔

وہ جس جہان رنگ و بو کی ایسی تفسیر پیش کرتا ہے جس سے دیدہ و دل کی پرورش ہوتی ہے۔

وہ جبریل امین (علیہ) کی طرح تجھے مقام جذب و شوق (مقام عشق) پر لا کر چھوڑ دیتا ہے۔

عشق کسی کو اپنے ساتھ خلوت میں کیسے لے سکتا ہے ؛ اس کی غیرت تو اپنی نظر کو بھی برداشت نہیں کرتی۔

ابتدا ء عشق میں رفیق بھی ہے اور طریق بھی مگر اس کا آخر بغیر رفیق کے راہ طے کرنا ہے۔

میں حور و قصور سے آگے بڑھ گیا؛ اور میں نے کشتی ء جان کو بحر نور میں ڈال دیا۔

میں جمال ذات کے نظارے میں غرق ہو گیا؛ وہ جمال لا یزال ہر لمحے نئے رنگ میں جلوہ گر تھا۔

میں ضمیر کائنات کے اندر گم ہو گیا؛ میں نے زندگی کو رباب کی مانند دیکھا۔

اس رباب کا ہر تار ایک نیا رباب تھا؛ اور اس کی ہر نوا پہلی نوا سے خونیں تر تھی۔

آدم ، مہر و ماہ ، جبریل و حور ؛ ہم سب نار و نور کے ایک ہی خاندان سے تعلق رکھتے ہیں۔

میری جان کے سامنے گویا آئینہ لٹکا دیا گیا اور میری حیرت یقین کے ساتھ ملا دیا گیا ہے۔

(میں نے دیکھا) کہ صبح امروز جس کا نور ظاہر ہے اس کے حضور میں ماضی اور مستقبل دونوں حاضر ہیں۔(حضرت مجدد (رضی اللہ) لکھتے ہیں کہ اللہ تعالے کے ہاں وقت ایک بسیط آن واحد ہے، جس میں ماضی و مستقبل حال ہی کی صورت میں ظاہر ہوتے ہیں۔)

حق تعالے اپنے سارے اسرار کے ساتھ ظاہر تھے؛ بلکہ وہ میری نگاہ سے اپنا دیدار کر رہے تھے۔

اللہ تعالے کے دیدار سے وہ افزودنی ملتی ہے جس میں کمی کا احتمال نہیں؛ ان کے نظارہء جمال سے بندہ تن کی قبر سے دوبارہ زندہ ہو کر اٹھتا ہے۔

بندہ و آقا دونوں ایک دوسرے کی جستجو میں ہیں؛ دونوں ذوق نظر کے سبب بے تاب ہیں۔

زندگی جہان بھی ہے جستجو سے عبارت ہے؛ یہ نکتہ حل نہیں ہوتا کہ میں شکار (مطلوب) ہوں یا وہ۔

عشق نے میری جان کو لذت دیدار بخشی اور میری زبان کو جرات گفتار۔(میں نے حق تعالے کی جناب میں عرض کیا۔)

'اے وہ ذات جس نے دونوں جہانوں کو نور اور نگاہ سے نوازا ہے! ذرا اس دنیا پر نظر ڈالئیے۔

یہ بندہء آزاد کے لیے ناسازگار ہے ؛ اس کے گل سنبل سے کانٹے کا زخم پیدا ہوتا ہے۔

چیرہ دست عیش و طرب میں غرق ہیں ؛ کمزور گن گن کے دن گذارتے ہیں۔

پادشاہت نے آپ کی دنیا کو خراب کر ڈالا ہے (اس کے) آفتاب کی آستین میں تاریک رات چھپی ہے۔

افرنگیوں کی دانش غارتگری ہے، کوئی حیدر کرار (رضی اللہ) نہ ہونے کے باعث بت کدے ناقابل تسخیر ہو چکے ہیں۔

لاالہ کہنے والا بے چارگی کا شکار ہے، اس کا فکر مرکز سے لاتعلق ہو جانے کے باعث آوارہ ہو چکا ہے۔

اس سخت جان (مسلم) کی گھات میں چار اموات ہیں؛ سود خوری ، حاکم، ملّا اور پیر۔

ایسی دنیا تو آپ کی شان کے شایان نہیں؛ یہ آب و گل کا جہان آپ کے دامن کا داغ بن چکا ہے۔

خوب و زشت کے نقوش میں سے جو ہمیں پسند آیا اسے قلم تقدیر نے لکھ دیا۔

اے مرد نجیب ! کیا تو جانتا ہے کہ زندہ رہنا کیا ہے؟ (زندگی) حق تعالے کے جمال سے حصّہ پانا ہے۔

تخلیق؟ دلبر کی جستجو ہے ، یہ اپنے آپ کو دوسروں پر ظاہر کرنا ہے۔(تخلیق انسانی کا مقصد یہ ہے کہ انسان اللہ تعالے کی معرفت حاصل کرے)۔

ہست و بود کا یہ سارا ہنگامہ ہمارے جمال کے بغیر وجود میں نہیں آیا۔

زندگی فانی بھی ہے اور باقی (غیر فانی) بھی؛ یہ سر تا پا خلّاقی اور مشتاقی (تخلیق اور عشق) ہے۔

اگر تو زندہ ہے ، تو مشتاق اور خلّاق بن اور ہماری طرح آفاق کو اپنے قبضہ میں کر لے۔

جو نقش تجھے سازگار نہیں آتا ، اسے توڑ دے ؛ اور اپنے ضمیر کے اندر سے عالم پیدا کر۔

دوسروں کے جہان میں زندگی بسر کرنا بندہء آزاد پر گراں گزرتا ہے۔

جس کے اندر قوّت تخلیق نہیں ؛ ہماری نظر میں وہ کافر و زندیق ہے۔

جس نے ہمارے جمال سے حصّہ نہیں پایا ؛ اس نے نخل حیات کا پھل حاصل نہ کیا۔

اے مرد حق! شمشیر کی مانند تیز رہ ؛ اور آپ اپنے جہان کی تقدیر بن۔

اس جہان رنگ و بو (دنیا) کا قانون صرف یہ ہے کہ گزرا ہوا پانی پھر ندی میں واپس نہیں آتا۔

نہ حیات میں تکرار کی خو ہے، نہ شوق۔

آسمان کے نیچے (دنیا میں) حیات کا لوٹ آنا نامناسب ہے؛ جب کوئی قوم گر جاتی ہے ، تو پھر دوبارہ نہیں اٹھتی۔

جو قوم مر جاتی ہے ، وہ پھر قبر سے کم ہی اٹھتی ہے ؛ اس کے لیے سوائے قبر و صبر کے اور کوئی چارہ نہیں رہتا۔

زندگی سانس کے آنے جانے کا نام نہیں؛ اس کی اصل خدائے حی و قیوم سے ہے۔

اللہ تعالے جنہوں نے فرمایا کہ میں قریب ہوں ؛ ان سے قرب حاصل کرنا حیات جاوداں سے حصّہ پانا ہے۔

فرد توحید سے لامکانی ہو جاتا ہے اور ملت توحید سے کائنات پر تسلط حاصل کرتی ہے۔

با یزید ، شبلی، بوذر اور طغرل و سنجر جیسی شخصیتیں اللہ تعالے کے قرب سے بنتی ہیں۔

انسان کو ہماری تجلّی کے بغیر ثبات حاصل نہیں ہوتا؛ ہمارا جلوہ ہی فرد و ملت کو حیات بخشتا ہے۔

فرد و ملت دونوں توحید سے کمال پاتے ہیں؛ فرد کی زندگی جمال ہے اور قوم کی جلال۔

یہ سلیمانی ہے اور وہ سلمانی، یہ سراپا فقر ہے اور وہ سراپا سلطانی۔

فرد یکے (اللہ تعالے) کا مشاہدہ کرتا ہے اور ملت یکے (واحد) بن جاتی ہے؛ دنیا میں باکمال فرد کی صحبت اختیار کر اور ملت واحدہ کے ساتھ زندگی بسر کر۔

اے لاالہ کہنے والے کیا تو جانتا ہے کہ منت کیا ہے؟ ملت کا مطلب یہ ہے کہ ہزاروں آنکھوں میں ایک ہی نگاہ پیدا ہو جائے۔

اہل حق کی دلیل و دعوی ایک ہے؛ ہمارے خیمے الگ الگ ہیں اور دل اکٹھے ہیں۔

ذرے یک نگاہی سے آفتاب بن جاتے ہیں؛ تو بھی یک نگاہ ہو جا تاکہ حق تعالے کو بے حجاب دیکھ سکے۔

یک نگاہی کو حقارت کی نظر سے نہ دیکھ؛ یہ بھی توحید کی تجلّیات میں سے ایک تجلّی ہے۔

جب ملت توحید مست ہو جاتی ہے تو وہ قوّت و جبروت کی مالک ہو جاتی ہے۔

روح ملت کا وجود انجمن سے ہے، وہ بدن کی محتاج نہیں۔

چونکہ املت کا وجود ربط باہم سے ہے اس لیے جب اس کا شیرازہ بکھر جاتا ہے تو وہ مر جاتی ہے۔

اگر تو مردہ ہے تو یک نگاہی سے زندہ ہو جا، بے مرکزی چھوڑ اور پائیندگی پا لے۔

وحدت افکار و کردار پیدا کر تاکہ تو جہان میں فرماں روائی پا سکے۔

میں کون ہوں؟ آپ کی شان کیا ہے؟ کائنات کہاں (واقع ) ہے؟ میرے اور آپ کے درمیان یہ دوری کیوں ہے؟ فرمائیے ؟ میں کیوں تقدیر کے بندھن میں گرفتار ہوں؟ میں کیوں مرتا ہوں؟ آپ کیسے حیّ و قیوم ہیں؟

تو اس جہان چار سو میں رہا ہے – جو اس میں سما جاتا ہے ، وہ اس میں مر جاتا ہے۔

زندگی چاہتا ہے تو خودی کو مستحکم کر - اور اس جہان چار سو کو اپنے اندر سمیٹ لے۔(کافر کی یہ پہچان کہ آفاق میں گم ہے؛ مومن کی یہ پہچان کہ گم اس میں ہیں آفاق – اقبال)

پھر تو دیکھ لے گا کہ میں کون ہوں اور تو کیا ہے؛ اور تو دنیا میں کیسے مرتا اور کیسے زندہ رہتا ہے۔

اس مرد ناداں کی معذرت قبول کر؛ تقدیر کے چہرے سے پردہ ہٹا دے۔

میں نے روس اور جرمنی کا انقلاب دیکھا ہے؛ مسلمان کے ضمیر میں جو ہنگامہ ہے ، وہ بھی دیکھا ہے۔

میں کے مغرب و مشرق کی تدابیر ہیں؛ اب مجھ پر مشرق و مغرب کی تقدیر بھی ظاہر فرمائیے۔

ناگہاں میں نے اپنے جہان اور اپنے زمین و آسمان کو دیکھا۔

میں نے اسے شفق کی مانند سرخ خون میں نہائے اور عناب کی صورت سرخ دیکھا۔

ان تجلّیات کے وفور سے جو میری روح پر گریں ؛ میں کلیم اللہ (علیہ) کی مانند بے ہوش ہو کر گر پڑا۔

ان تجلیات کے نور نے ہر پنہاں کو ظاہر کر دیا اور میری زبان میں گفتگو کا یارا نہ رہا۔

اس عالم لا مکاں سے ایک سوز ناک صدا سنائی دی۔

مشرق کو چھوڑ ، نہ مغرب سے مسحور ہو؛ کہ یہ قدیم و جدید دو جو کے برابر بھی نہیں۔

وہ نگینہ جو تو نے شیطان کے سامنے ہار دیا؛ اسے تو جبریل امین (علیہ) کے پاس گروی بھی نہیں رکھا جا سکتا۔

زندگی انجمن آرا بھی ہے اور خود نگہدار بھی ؛ اے وہ شخص جو قافلہ میں ہے! سب سے بے نیاز رہ اور سب کے ساتھ چل۔(شمع محفل کی طرح سب سے جدا سب کا رفیق)

تو مہر منیر سے زیادہ چمکدار واقع ہوا ہے؛ اس طرح زندگی بسر کر کہ ہر ذرہ تک اپنا پر تو پہنچائے۔

اس پر کاہ کی مانند جو آندھی کے راستہ میں ہو؛ سکندر، دارا، قباد اور خسرو اڑ گئے۔

تیری تنک جامی (کم ظرفی) کے باعث مےکدہ رسوا ہو گیا ہے؛ صراحی اٹھا ، ہوشمندی سے پی اور رخصت ہو جا۔