عشق نے نعرہ بلند کیا کہ ایک خونیں جگر پیدا ہو گیا ہے، حسن شرما گیا کہ صاحب نظر آ پہنچا۔

فطرت چیں بچیں ہوئی کہ (اس) جہان مجبور کی خاک سے ایسی با اختیار ہستی وجود میں آئی جو اپنے آپ کا شعور رکھتی ہے، جو اپنے آپ کو توڑ کر نئے سرے سے بنا سکتی ہے۔

آسمان سے شبستان ازل تک یہ خبر پہنچی ، پردوں میں رہنے والو ! ہوشیار ہو جاؤ ! پردے چاک کر دینے والا آ موجود ہوا۔

آرزو جو آغوش حیات میں اپنے آپ سے بے خبر (سوئی) تھی، اس نے آنکھ کھولی اور ایک نیا جہان وجود میں آ گیا۔

زندگی نے کہا: میں ساری عمر خاک میں تڑپتی رہی ، تب کہیں جا کر اس پرانے گنبد (آسمان) سے راستہ پیدا ہوا ہے۔

میں بیوقوف فرشتہ نہیں ہوں کہ آدم کو سجدہ کروں ، وہ خاکی نہاد ہے اور میں پیدائش کے لحاظ سے آذر (آتشیں ) ہوں۔

میرے سوز سے کائنات کی رگوں میں خون جوش مارتا ہے، میرے اندر باد صرصر کی تیزی اور طوفان کی کڑک ہے۔

ایٹموں کی باہمی پیوستگی، قوموں کے قوانین، ان سب کو میں سوز دیتا ہوں ، میں وہ آگ ہوں جو (شراب کی) صراحی بناتی ہے۔

میں اپنے بنائے ہوئے کو (خود ہی) توڑ کر ریزہ ریزہ کر دیتا ہوں ، تاکہ پرانی چیزوں کے غبار سے نیا پیکر بناؤں ۔

چرخ گرداں میرے دریا کی ایک موج ہے، میں زمانے کے نقوش بناتا ہوں میں اس کے جوہر کو تاب و تب عطا کرتا ہوں۔

ستاروں کے پیکر تو (اللہ تعالے) نے بنائے مگر ان کی گردش کا سبب میں ہوں، میں جہان کی جان ہوں ، میں اس کے اندر مضمر زندگی ہوں۔

تو بدن کو جان عطا کرتا ہے، میں جان میں سوز پیدا کرتا ہوں ۔ تو سکون دے کر (آدم کے شوق سفر کی) رہزنی کرتا ہے، میں اسے تپش دے کر اس کی راہبری کرتا ہوں۔

میں نے ان کم ظرفوں (فرشتوں) سے سجدہ کی بھیک نہیں مانگی، میں بغیر دوزخ کے قہر ، اور بغیر محشر کے منصف ہوں (ابلیس نے اللہ تعالے پر طنز کی ہے)۔

خاکی سرشت آدم جو پست نظر اور کم حوصلہ ہے، یہ پیدا تو تمہارے آغوش میں ہوا ہے، مگر عمر رسیدہ میرے پہلو میں ہو گا۔

سکون دوام سے سوز و ساز کی زندگی بہتر ہے، جال کے اندر تڑپ کر فاختہ شاہین بن جاتی ہے،

یہاں (بہشت میں) سوائے نیازمندانہ سجدوں کے تجھ سے اور کچھ بن نہیں پڑتا ، اے سست عمل! سرو بلند کی طرح اٹھ کھڑا ہو۔

جنت کی کوثر و تسنیم نے تیرے اندر سے سرگرم عمل ہونے کا لطف ختم کر دیا ہے، انگور کی صراحی سے آئینہ کی مانند شفاف شراب لے۔

برائی اور نیکی تیرے خدا کے وہم کی تخلیق ہے، عمل کی لذت سے آشنا ہم، قدم اٹھا ، کامیابی تلاش کر۔

اٹھ! میں تجھے ایک نئی مملکت دکھاؤں، دنیا کو دیکھنے والی آنکھ کھول اور دنیا کے نظارے کے لیے یہاں سے نکل۔

تو بے قیمت قطرہ ہے، چمکدار موتی بن، آسمان (بہشت) سے نیچے آ، دریا میں مقام اختیار کر (قطرہ دریا میں گر کر موتی بن جاتی ہے۔

تو چمکدار تلوار ہے، جہان کی جان نکال، نیام سے باہر آ، اپنے جوہر دکھلا۔

شاہین کے (سے مضبوط) بازو کھول ، چڑیوں کا خون بہا، باز کے گھو نسلے میں بیٹھ رہنا زندگی نہیں ، موت ہے۔

تو ابھی نہیں سمجھتا ، (دائمی) وصال سے شوق کی موت ہے ، حیات دوام کیا ہے؟ محبت میں ہر وقت جلتے رہنا۔

ساری زند گی کو سوز و ساز بنا لینا کیا خوب ہے، کوہ و دشت و صحرا کے دل کو ایک لحظہ میں نرم کر دینا ، کیا بات ہے۔

قفس (بہشت) کا دروازہ کھول کر فضائے گلستان میں آ جانا، آسمان کا راستہ طے کرنا ، ستاروں سے راز و نیاز کی باتیں کرنا۔

(دل کے) پنہاں سوز اور (بدن کی) ظاہری نیاز مندی (سجود) سے ، (اللہ تعالے کے) حریم ناز کو نظر ادا شناس سے دیکھنا۔

کبھی ہجوم لالہ زار (کثرت) میں سوائے وحدت کے اور کچھ نہ دیکھنا اور کبھی چبھنے والے کانٹے اور (نرم) پھول میں امتیاز کرنا۔

میں سر تا پا سوز نا تمام ہوں، میں سر تا پا درد و آرزو ہوں، میں یقین دے کر گمان لیتا ہوں ، کیونکہ جستجو پر جان دیتا ہوں (نئی چیزوں کی دریافت، نئی ایجادات کا شوق رکھتا ہوں)۔

قیامت کی صبح آدم اللہ تعالے کے حضور میں۔ اے وہ ذات! جس کے خورشید سے ہماری روح کا ستارہ منوّر ہے ، آپ نے اس اندھے جہان (دنیا ) کی شمع میرے دل سے روشن کی۔

میری ہنرمندیوں نے سمندر کو ایک نہر میں ڈال دیا، میرے تیشہ نے پہاڑ کے جگر سے دودھ کی نہر نکالی۔

زہرہ میرا گرفتار ہے، چاند میرا پرستار ہے، میری مہم جو عقل نے دنیا کو اسیر کر لیا ہے۔

میں زمین کے اندر گیا، میں آسمان کے اوپر چڑھا، ذرہ (کم ضو) ہو یا چمکتا سورج ، سب میرے جادو میں بندھے ہوئے ہیں۔

اگرچہ شیطان کا افسوں مجھے نیکی کی راہ سے دور لے گیا، میری غلطی معاف فرما دیجئے ، میرا عذر قبول کیجئے۔

جب تک دنیا کے فسوں میں نہ آئیں ، یہ رام نہیں ہوتی، ناز کو صرف کمند نیاز ہی سے اسیر کیا جا سکتا ہے۔

اس بت سنگین (دنیا) کو اپنی آہ گرم سے گداز کرنے کے لیے، اس کا زنّار باندھنا (اس کا قیدی ہونا) میرے لیے ناگزیر تھا ۔

میری عقل (ابلیس کی ) فطرت چالاک کو دام میں لے آئی، آپ نے ملاحظہ فرمایا کہ شعلہ زاد ابلیس نے (بالآخر ) خاکی (آدم) کو سجدہ کیا۔