جنگ کے دوران یزد جرد کے سپہ سالاروں میں سے ایک سپہ سالار مسلمان کے ہاتھوں قیدی بن گیا۔

وہ ایرانی آتش پرست ، چالاک، ہوشیار ، حیلہ جو، پر فن و مکار تھا۔

اس نے مسلم مجاہد کو اپنا نام ، مقام اور مرتبہ سے خبردار نہ کیا۔

بلکہ درخواست کی میری جان بخشی کی جائے اور مسلمانوں کے شیوہ کے مطابق امان دے دی جائے۔

مسلمان نے تیغ نیام میں کر دی اور کہہ دیا کہ تیرا خون بہانا مجھ پر حرام ہے۔

جب درفش کاویانی (ایرانی جھنڈا) چاک چاک ہو گیا (یعنی ایرانیوں کو شکست ہو گئی) اور سا سانیوں کی آگ بجھ گئی۔

تو پتہ چلا کہ وہ ایرانی جنگجو ؤں کا سپہ سالار جابان ہے۔

مسلمانوں نے اس کے فریب کے متعلق سپہ سالار تک پہنچائی اور اس کے قتل کی اجازت چاہی۔

فوج حجاز کے سپہ سالار ابو عبید (رحمتہ) ثقفی جنگ میں جن کے عزم کا دار و مدار لشکر کی تعداد سے بے نیاز تھا۔

انہوں نے کہا دوستو! ہم سب مسلمان ہیں ، ہم سب ایک ہی رباب کے تار ہیں اور یک آہنگ ہیں۔

کوئی نعرہ یا نوا خواہ وہ بلال و قنبر (رضی اللہ ) کے حلق سے پیدا ہو ہم اسے حضرت علی (رضی اللہ ) اور ابو زر غفاری (رضی اللہ ) کا نعرہ سمجھیں گے۔

ہم میں سے ہر ایک امین ملت ہے اور اس کی طرف سے صلح و دشمنی کا اعلان ملت کا اعلان ہے۔

جب ملت فرد کی جان کی بنیاد ہو جائے تو فرد کا پیمان ملت کا پیمان بن جاتا ہے۔

اگرچہ جابان ہمارا دشمن تھا ؛ مگر ایک مسلمان اسے امان دے چکا ہے۔

اے امت خیر الانام (صلعم) اب جابان کا خون ہماری تلواروں پر حرام ہے۔