دنیا میں انسان انسان کی پرستش کرتا ہے؛ لوگ انسانیت سے گر چکے تھے؛ ان کی کوئی ہستی نہیں تھی اور وہ دبے ہوئے تھے۔

قیصر و کسری کی سطوت نے رہزن بن کر اس کے ہاتھ پاؤں اور گردن میں زنجیریں ڈال رکھی تھیں۔

کہیں کاہن تھے کہیں پوپ ، کہیں سلطان کہیں حاکم؛ ایک شکار کے لیے سینکڑون شکاری تھے۔

پادشاہ اور مذہبی راہنما دونوں انسانیت کی ویران کھیتی پر بھی مالیہ لگاتے تھے۔

عیسائیت کی جنت کے پروانے فروخت کرنے والا پادری اسی صید زبوں کے شکار کے لیے کندھے پر جال رکھے ہوئے تھا۔

برہمن نے بھی انسانیت کی کیاری سے پھول توڑ لیا ؛ مغ زادہ نے انسانیت کے خرمن کو آگ کے سپرد کر دیا۔

غلامی کی وجہ سے انسانوں کی فطرت پست ہو گئی تھی؛ انسانیت کی نے کے نغمے خون آلود تھے۔

ان حالات میں جناب رسول پاک (صلعم) تشریف لائے اور انہوں نے امین بن کر حقدار وں کا حق ان کے سپرد کر دیا؛ پادشاہت کا تخت رعیت کے حوالے کر دیا۔

آپ (صلعم) نے انسانیت کی مردہ راکھ سے (زندگی کے) شعلے پیدا کیے اور کوہکن (مزدور) کو پرویز (بادشاہ) کا رتبہ عطا فرمایا۔

آپ (صلعم) نے مزدور کی وقعت بڑھا دی؛ اور آقاؤں سے خواجگی چھین لی۔

آپ (صلعم) کی ‍ قوّت نے ہر پرانا ڈھانچہ توڑ دیا آپ (صلعم) نے نو‏ع انسان کے ارد گرد ایک نیا حصار تعمیر کر دیا۔

آپ (صلعم) نے آدم کے بدن میں نئی روح پھونک دی ؛ غلام کو دوبارہ آقاؤں سے واپس خرید لیا۔

آپ (صلعم) کی تشریف آوری دور کہن کی موت کا سبب بنی؛ آتش کدے، دیر اور بتخانے سب مٹ گئے۔

آپ (صلعم) کے ضمیر پاک سے حریت نے جنم لیا؛ یہ مزیدار شراب آپ (صلعم) ہی کے انگور سے ٹپکی۔

دور حاضر جس نے (علم کے) سینکڑوں چراغ روشن کیئے ہیں؛ آپ (صلعم) ہی کے آغوش میں آنکھ کھولی ہے۔

آپ (صلعم) نے صفحہء ہستی پر ایک نیا نقش کندہ فرمایا یعنی ایک ایسی امت وجود میں لائے جس نے زمانے کو فتح کر لیا۔

ایسی امت جو ماسوا سے بیگانہ اور صرف چراغ مصطفے (صلعم) کی پروانہ ہے۔

ایسی امت جس کے سینہ کو حق و صداقت کی حرارت گرمائے ہوئے ہے؛ جس کا ایک ایک ذرّہ حریم آفتاب کے لیے شمع کی حیثیت رکھتا ہے۔

اس امت کی سرمستی نے کائنات کو رنگین کر دیا ؛ اور پرانے بتکدے توحید کا گھر بن گئے۔

انبیاء اور رسل اس امت کے آباء ہیں ؛ اس امت کے متقین اللہ تعالے کے ہاں معززین ہیں۔

سب مومن بھائی بھائی ہیں یہ بات اس امت کے دل میں سرایت کر چکی ہے؛ حریت اس کے خمیر میں ہے۔

اس امت کے لیے (دینوی) امتیازات کا تصوّر نا قابل برداشت ہے کیونکہ اس کی نہاد میں مساوات رچی ہوئی ہے،

اس کے فرزند سرو کی مانند آزاد ہیں؛ اور اللہ تعالے کا ساتھ پیمان الست کے سبب مستحکم ہیں۔

اللہ تعالے کے حضور سجدوں کے نشان ان کے چہروں پر پھول کی مانند سجے ہوئے ہیں ؛ چاند ستارے ان کے پاؤں کو بوسہ دیتے ہیں۔