غروب ہو جانے والوں کو ترک کر دینے والا ابراہیم خلیل اللہ (علیہ) جن کا نقش پا انبیاء کے لیے راہنما ہے۔

وہ جو خدائے زوال ناپذیر کی آیت تھے؛ وہ بھی اپنے دل میں ملّت کی آرزو رکھتے تھے۔

ان کی بے خواب آنکھوں سے آنسوؤں کی ندیاں بہہ نکلیں تب جا کر انہوں نے طہرابیتی کا پیغام سنا۔

ہماری خاطر انہوں نے ویرانہ آباد کیا اور طواف کرنے والوں کے لیے اللہ تعالے کے گھر کی از سر نو تعمیر کی۔

تب کہیں جا کر تب علینا کے درخت سے کلی پھوٹی (اور ) ہماری بہار کی صورت رو نما ہوئی۔

الّلّہ تعالے نے امت مسلمہ کا پیکر تخلیق فرمایا اور رسالت سے ہماری اس بدن میں جان پھونکی۔

ہم اس دنیا میں حرف بے آواز تھے؛ رسالت نے ہمیں موزوں مصرعہ بنا دیا۔

رسالت ہی سے اس دنیا میں ہمارا وجود قائم ہے؛ رسالت سے ہمارا دین اور ہمارا آئین (شریعت) ہے۔

رسالت ہی سے ہم ہزار ہا ہونے کے باوجود ایک ہیں؛ اسی ہی کی بدولت ہمارا ایک جزو دوسرے کا جزو لاینفک (جدا نہ ہونے والا) ہے۔

حق تعالے جن کی یہ شان ہے کہ وہ جسے چاہتے ہیں ہدایت فرماتے ہیں ؛ انہوں نے رسالت کی صورت ہمارے گرد دائرہ کھینچ دیا ہے (جو اس دائرے کے اندر آ گیا ہے وہ ہدایت یافتہ ہے)۔

ملّت کا حلقہ جس کا مرکز وادیء بطحا (بیت اللہ شریف) ہے ہر دم وسعت پذیر ہے۔

ہم حضور (صلعم) کی نسبت سے ایک ملّت ہیں ؛ اور دنیا والوں کے لیے رحمت کا پیغام ہیں۔

ہم رسالت کے سمندر سے اٹھے ہیں ؛ اور موج کی مانند ہم ایک دوسرے سے جدا نہیں ہوتے۔

حضور (صلعم) کی امت دیوار حرم کی پناہ میں ہے اور اس طرح نعرہ زن ہے جیسے شیر جنگل میں۔

اگر تو میری بات کی تصدیق کرے اور تو سیدنا صدیق (رضی) کی آنکھ سے دیکھے۔

تو نبی اکرم (صلعم) قلب و جگر کی قوّت بن جاتے ہیں ؛ اور اللہ تعالے سے بھی زیادہ محبوب بن جاتے ہیں۔

حضور (صلعم) پر نازل شدہ کتاب قلب مومن کے لیے قوّت ہے اور آپ (صلعم) کے حکیمانہ اقوال ملّت کے لیے شہ رگ کی حثیّت رکھتے ہیں۔

حضور (صلعم) کا دامن ہاتھ سے چھوڑ دینا موت ہے ؛ یہ ایسے ہے جیسے پھول باد خزاں سے مرجھا جائے۔

ملّت نے آپ (صلعم) کے دم سے زندگی پائی ہے؛ ملّت کی صبح آپ (صلعم) کے آفتاب سے روشن ہے۔

فرد اللہ تعالے کے ساتھ تعلق سے قائم ہے؛ اور ملّت حضور (صلعم) کے ساتھ تعلق سے زندہ ہے اور آپ (صلعم) کے آفتاب کی شعاع سے چمک رہی ہے۔

رسالت ہی سے ہم ہم نوا، ہم نفس اور ہم مدعا ہوتے ہیں۔

ایک ہی مقصود رکھنے والوں کی کثرت وحدت بن جاتی ہے؛ اور جب وحدت پختہ ہو تو وہ ملّت میں تبدیل ہو جاتی ہے۔

ہر کثرت وحدت کے بندھن سے زندہ ہے؛ مسلمانوں کی وحدت کا دار و مدار دین فطرت (اسلام) پر ہے۔

یہ دین فطرت ہم نے نبی اکرم (صلعم) سے سیکھا ہے اور اس کے ذریعے اللہ تعالے کی راہ میں مشعل روشن کی ہے۔

دین فطرت حضور (صلعم) کے بحر بے پایان کا موتی ہے؛ ہم جو یک جان ہیں تو یہ حضور (صلعم) کا احسان ہے۔

جب تک ہماری یہ وحدت قائم ہے ہمارا وجود ابد سے ہمکنار ہے۔

اللہ تعالے نے شریعت ہم پر ختم کر دی ہے؛ جیسے رسول پاک (صلعم) پر رسالت ختم کر دی ہے۔

محفل ایّام (دنیا) کی رونق ہماری وجہ سے ہے؛ حضور (صلعم) آخری رسول ہیں اور ہم آخری ملّت۔

اب اللہ تعالے نے ساقی گری کی خدمت ہم پر چھوڑ دی ہے؛ اپنا آخری جام (ہدایت) ہمیں عطا فرمایا دیا۔

حضور (صلعم) کے بعد کسی اور نبی کا نہ آنا اللہ تعالے کا احسان ہے؛ اس سے ناموس دین مصطفے کا تحفظ ہے۔

یہی چیز ملّت کے لیے سرمایہ ء قوّت اور وحدت ملّت کے بھید کی حفاظت کرنے والی ہے۔

اللہ تعالے نے ابد تک اسلام کی شیرازہ بندی فرما کر (ہر نئے اور پرانے دین کے) دعویء (سربلندی ) کا نقش مٹا دیا۔

مسلمان غیر اللہ سے دل اٹھا لیتا ہے؛ 'اور میرے بعد کوئی قوم نہیں' کا نعرہ لگاتا ہے۔