جس کسی نے ہوالموجود سے پیمان باندھا اس کی گردن ہر معبود کی قید سے آزاد ہو گئی۔

مومن اللہ تعالے کے عشق سے قائم ہے اور عشق کا وجود مومن سے ہے؛ وہ چیزیں جو ہمارے لیے ناممکن ہیں وہ عشق کے نزدیک ممکن ہیں۔

عقل اپنے مقاصد کی تکمیل کے لیے دوسروں کا خون بہانے سے گریز نہیں کرتی اور عشق اللہ تعالے کی خاطر اپنی جان دینے میں اس سے بڑھ کر ہے۔عشق کے مقاصد عقل سے زیادہ پاکیزہ اور عشق اپنے عمل میں زیادہ تیز رو اور بیباک ہے۔

عقل اسباب اور وجود کے چکر میں پڑی رہتی ہے؛ عشق میدان عمل کا شہسوار ہے۔

عشق قوّت بازو سے شکار کو گراتا ہے ؛ عقل مکر ہے اور اپنے شکار کے لیے جال بچھاتی ہے۔

عقل کا سرمایہ خوف و شک ہے؛ عشق و عزم و یقین لازم و ملزوم ہیں۔

عقل کی تعمیر میں ویرانی مضمر ہے اور عشق کی ویرانی میں تعمیر۔

عقل دنیا میں ہوا کی مانند ارزاں ہے؛ عشق کمیاب اور بیش بہا قیمتی ہے۔

عقل چون و چند 'کیوں اور کتنا' کی بنیاد سے محکم ہے؛ اور عشق اس قسم کے لباس سے بے نیاز ہے۔

عقل کہتی ہے کہ اپنا مفاد پیش نظر رکھ؛ عشق کہتا ہے کہ اپنی آزمائش کر۔

عقل استحصال کی خاطر دوسروں سے آشنائی پیدا کرتی ہے؛ عشق کا دار و مدار اللہ تعالے کے فضل پر ہے اور وہ اپنا احتساب کرتا ہے۔

عقل کہتی ہے خوش رہو، آباد رہو؛ عشق کہتا ہے اللہ تعالے کی غلامی اختیار کر اور باقی سب سے آزاد ہو جا۔

عشق کو آزادی میں تسکین دل ملتی ہے؛ اس کے ناقہ کی ساربان حریت ہے۔

کیا تو نے سنا کہ بوقت قتال عشق نے عقل ہوس پرور سے کیا کیا۔

وہ عاشقوں کے امام سیدنا فاطمہ (رضی) کے فرزند جو حضور اکرم (صلعم) کے باغ کے سرو آزاد تھے۔

ان کے والد کا مرتبہ ہائے بسم اللہ کا سا تھا اور سید نا حسین ذبح عظیم کی تعبیر ہیں۔

بہترین امت (امت مسلمہ) کے اس شہزادے کے لیے حضور (صلعم) ختم المرسلین کا دوش مبارک سواری تھی، اور کیا اچھی سواری تھی۔

عشق غیّور ان کے خون سے سرخرو ہوا؛ مصرعہء عشق کی شوخی اسی مضمون (واقعہء کربلا) سے ہے۔

یہ بلند مرتبت شخصیت امت کے درمیان یوں ہے جیسے قرآن پاک میں سورہ اخلاص۔

موسی و فرعون اور شبیر و یزید؛ یہ دونوں قوتیں حیات ہی کا اظہار ہیں۔

حق قوّت شبیری سے زندہ ہے؛ اور باطل کا انجام حسرت کی موت ہے۔

جب خلافت نے قرآن پاک سے اپنا رشتہ توڑ لیا تو اس نے حریت کے حلق کے اندر زہر انڈیل دیا۔

یہ حالت دیکھ کر بہترین امت کا وہ جلوہ یوں اٹھا جیسے قبلہ کی جانب سے بارش سے بھرپور بادل۔

یہ بادل کربلا کی زمین پر برسا ؛ اس ویرانے میں گل ہائے لالہ اگائے اور آگے بڑھ گیا۔

اس نے قیامت تک کے لیے استبداد کی جڑ کاٹ دی؛ اس کی موج سے ایک نیا چمن پیدا ہوا۔

سید نا حسین (رحمتہ) حق کی خاطر خاک و خون میں لوٹے؛ اس لیے وہ لاالہ کی بنیاد بن گئے۔

اگر ان کا مقصود سلطنت حاصل کرنا ہوتا تو اتنے تھوڑے ساز و سامان کے ساتھ سفر اختیار نہ کرتے۔

دشمن ریگ صحرا کے ذرّوں کی مانند لا تعداد تھے اور ان کے دوست لفظ یزداں کے ہم عدد (بہتر (72) تھے)۔

آپ حضرت ابراہیم (علیہ) اور حضرت اسماعیل (علیہ) کے واقعہ کو سرّ اور اس اجمال کی تفصیل ثابت ہوئے۔

ان کا عزم پہاڑوں کی مانند محکم، پائیدار ، آمادہ بہ عمل اور کامیاب تھا۔

تیغ صرف عزت دین کے لیے ہے؛ اس کا مقصد صرف شریعت کی حفاظت ہے۔

مسلمان غیر اللہ کا بندہ نہیں ؛ وہ کسی فرعون کے سامنے اپنا سر نہیں جھکاتا۔

سید نا حسین (رحمتہ) کے خون نے اس راز کی تفسیر پیش کی؛ اور (اپنے عمل سے) ملّت خوابیدہ کو بیدار کر دیا۔

جب آپ نے لا کی تلوار میان سے باہر نکالی تو اہل باطل کی رگوں سے خون نچوڑ لیا۔

انہوں نے صحرا کی سرزمین پر الا اللہ کا نفش رقم کیا؛ اور ان کی لکھی ہوئی سطر ہماری نجات کا عنوان بنی۔

ہم نے قرآن پاک کے رموز سید نا حسین (رحمتہ) سے سیکھے ہیں؛ ان کی روشن کی ہوئی آگ سے ہم نے آزادی کے شعلے اکٹھے کیے ہیں۔

شام و بغداد کی شان و شوکت جاتی رہی؛ سطوت غرناطہ کی یاد بھی ذہنوں سے محو ہوئی۔

لیکن ہماری زندگی کے تار ابھی تک سید نا (رحمتہ) کے زخم سے لرزاں ہیں؛ انہوں نے میدان کربلا میں جو تکبیر بلند کی تھی وہ ہمارے ایمان کو زندہ کر رہی ہے۔

اے صبا! اے دور بسنے والوں کی پیغام رسا ؛ ان کی خاک پاک پر ہمارے آنسوؤں (کا تحفہ) پہنچا دے۔