آپ (صلعم) کی تشریف آوری سے زندگی اپنے شباب کو پہنچی ؛ آپ (صلعم) کا ظہور خواب زندگی کی تعبیر ہے ( آپ صلعم) مقصود کائنات ہیں۔

اس زمین نے آپ (صلعم) کی بارگاہ کے سبب شرف پایا ؛ آسمان نے آپ (صلعم) کی بارگاہ کے بام کو بوسہ دے کر بلند مرتبہ حاصل کیا۔

آپ (صلعم) کے چہرہ مبارک کے نور سے شش جہات روشن ہیں؛ ترک، تاجک اور عرب سب آپ (صلعم) کے غلام ہیں۔

اس کائنات کا مرتبہ آپ (صلعم) کی وجہ سے بلند ہوا؛ آپ (صلعم) کا فقر کائنات کی دولت ہے۔

آپ (صلعم) نے جہان میں زندگی کی شمع روشن کی ؛ اور غلاموں کو آقائی سکھائی۔

آپ (صلعم) کے بغیر اس سارے آب و گل (دنیا ) کے سارے پیکر اپنی کم مائیگی کے سبب شرمسار ہیں۔

جب آپ (صلعم) نے مٹی کے پیکروں کے اندر سے (عشق) کی آگ نکالی؛ تو ان خاک کے تودوں نے آدم کی صورت اختیار کر لی۔

پھر یہ انسان جو ذرّہ تھا ، مہر و ماہ کا ہم پایہ ہو گا؛ یعنی اس نے اپنی قوّتوں سے آگاہی پائی۔

جب سے میری نظر آپ (صلعم) کے چہرہ مبارک پر پڑی ہے؛ آپ (صلعم) مجھے ماں باپ سے زیادہ محبوب ہو گئے۔(تم میں سے کوئی شخص صاحب ایمان نہیں ہو سکتا جب تک میں اس کے نزدیک اس کے والدین ، اولاد اور تمام انسانوں سے محبوب تر نہ ہو جاؤں - حدیث شریف۔)

آپ (صلعم) کے عشق نے میرے اندر آگ بھڑکا دی ہے؛ عشق کو فرصت مبارک کیونکہ اب میری جان جل چکی ہے۔

بانسری کی مانند نالہ ہی میرا سامان ہے اور یہی میرے خانہء ویران کا چراغ ہے۔

غم پنہاں کی بات نہ کرنا بہت مشکل ہے جیسے شراب کو مینا میں چھپانا مشکل ہے۔

مسلمان عشق نبی (صلعم) سے بیگانہ ہوا اور اس کی وجہ سے یہ بیت الحرم (دل) دوبارہ بتخانہ بن گیا۔

ہر مسلمان لات، منات، عزی اور ہبل جیسے بتوں میں سے کوئی نہ کوئی بت اپنی بغل میں رکھے ہوئے ہے۔

ہمارا شیخ برہمن سے زیادہ کافر ہے کیونکہ اس کا سومنات اس کے سر کے اندر ہے۔

اس نے عرب سے اپنی زندگی کا تعلق منقطع کر لیا ہے اور عجم کے خمستان میں جا کے سو گیا ہے۔

عجم کے برفاب سے اس کے اعضا شل ہو گئے ہیں ؛ اس کی شراب اس کے آنسوؤں سے بھی زیادہ سرد ہے۔

وہ کافروں کی طرح موت سے ڈرتا ہے؛ اس کا سینہ قلب زندہ سے محروم ہے۔

میں نے اس کی نعش کو طبیبوں کے سامنے سے اٹھایا اور اسے جناب رسول پاک (صلعم) کے حضور میں لے آیا۔

(میں نے عرض کیا) یہ مردہ تھا ، میں نے اسے آب حیات کی باتیں سنائیں ہیں؛ میں نے اسے قرآن پاک کے اسرار میں سے بعض سرّ بیان کیے۔

میں نے اسے یاران نجد کی داستان سنائ ؛ میں اس کے لیے نجد کے گلستان کی خوشبو لایا۔

میں نے محفل کو اپنی آواز کی شمع سے روشن کیا اور قوم کو رمز حیات سکھائی۔

اس نے کہا کہ یہ شخص ہم پر فرنگیوں کا افسوں پھونک رہا ہے ؛ اس کا سارا غوغا ساز فرنگ کا مرہون منت ہے۔

آپ (صلعم) نے بصیری کو اپنی چادر مبارک عطا فرمائی تھی اور آپ (صلعم) نے مجھے بربط سلمی عطا فرمائی ہے۔

ان غلط سوچ رکھنے والوں کو جو اپنی متاع کو بھی نہیں پہحانتے سچائی کا ذوق عطا فرمایئے۔

اگر میرے دل کا آئینہ جوہر کے بغیر ہے ، اگر میرے اشعار میں قرآن پاک کے علاوہ کچھ اور پوشیدہ ہے۔

آپ (صلعم) کا نور اعصار و دہور (عصر و دہر کی جمع) کی صبح ہے؛ آپ (صلعم) کی آنکھ پر دلوں کی بات روشن ہے۔

(اگر میں قرآن پاک کے علاوہ کچھ اور کہہ رہا ہوں ) تو آپ (صلعم) میرے فکر کے شرف کا پردہ چاک کر دیجیئے اور خیابان (دنیا) کو میرے کانٹے سے پاک کر دیجیئے۔

زندگی کے لباس کو مجھ پر تنگ کر دیجئے اور مسلمان کو میری شاعری کی شرم سے محفوظ رکھیئے۔

میری کشت ویران کو سرسبز نہ کیجیئے ؛ اسے ابر بہار سے بہرہ مند نہ فرمائیے۔

میرے انگور کے اندر جو شراب ہے اسے خشک کر دیجئے ؛ میری کافوری شراب کے اندر زہر ڈال دیجئے۔

مجھے قیامت کے روز خوار و رسوا کیجئے ؛ یعنی اپنے بوسہء پا سے محروم رکھیئے۔

لیکن اگر میں نے اپنی شاعری میں قرآن پاک کے موتی پروئے ہیں اور اگر میں نے مسلمانوں سے حق بات کہی ہے۔

تو اے وہ ذات جس کے احسان سے ناکس کس بن جاتا ہے؛ (میرے لیے دعا فرمایئے ) اور یہ کہ دعا ہی میری ساری گفتار کا اجر ہو گا۔

خدائے عزّ و جل کے سامنے عرض کیجیئے کہ میرا عشق عمل سے ہمکنار ہے۔

آپ نے مجھے غمگسار جان کی دولت عطا فرمائی ہے ؛ آپ نے مجھے علم و دین کا وافر حصّہ بخشا ہے۔

مجھے عمل میں پائیندہ تر کر دیجیے ؛ میں بارش کا قطرہ ہوں مجھے گوہر بنا دیجیے۔

جب سے میں دنیا میں جان کا سامان لایا ہوں (پیدا ہوا ہوں) ؛ میرے دل میں ایک آرزو بھی پرورش پا رہی ہے۔

یہ آرزو میرے سینے میں دل کی مانند آسودہ رہتی ہے؛ اور صبح حیات (شروع ہی سے ) میرے ساتھ رہی ہے۔

جب سے میں نے اپنے والد صاحب سے آپ کا نام سیکھا ؛ اسی وقت سے اس آرزو کی آگ میرے دل میں روشن رہی۔

جب زمانے نے مجھے معمر کیا؛ اور زندگی کے کھیل میں مجھے آگے بڑھایا۔

میری یہ آرزو اور جوان ہوتی گئی ؛ یہ شراب پرانی ہو کر اور قیمتی بن گئی۔

میری خاک بدن کے اندر یہ تمنا موتی بن کر چمکتی رہی؛ میری زندگی کی تاریک رات اسی ایک ستارے سے روشن ہے۔

ایک عمر تک میں نے حسینوں سے راہ و رسم رکھی اور گنگریالے بالوں والے محبوبوں سے عشق کرتا رہا۔

ماہ رخوں کے ساتھ میں نے شراب کے جام لنڈھائے اور اطمینان و سکون کا چراغ بجھاتا رہا۔

میرے خرمن کے گرد بجلیاں رقص کرتا رہیں اور ان رہزنوں نے میرے دل کی دولت لوٹ لی۔

مگر اس تمنا کی شراب میری جان کے جام سے نہ نکل سکی ؛ یہ زر خالص میرے دامن میں محفوظ رہا۔

میری عقل آزر پیشہ نے زنّار باندھا ؛ اور میری جان کی ولایت میں اس کا نقش بیٹھ گیا۔

کئی برس تک میں شکوک میں گرفتار رہا ؛ اور یہ شکوک میرے خشک دماغ کا جزو لاینفک بن گیا۔

میرے دماغ نے علم ا لیقین کا کوئی حرف نہ پڑھا ؛ وہ فلسفے کے گماں آباد ہی میں بھٹکتا رہا۔

میرے دماغ کی سیاہی حق کی روشنی سے نا آشنا تھی ؛ میری شام نور شفق سے بیگانہ تھی۔

مگر یہ تمنا میرے دل میں خوابیدہ رہی ؛ اور صدف میں موتی کی طرح پوشیدہ رہی۔

آخر یہ میری آنکھوں کے پیمانے سے چھلک پڑی اور اس نے میرے ضمیر کے اندر سے نغمے پیدا کیے۔

میری جان آپ (صلعم) کی یاد کے علاوہ کسی اور کی یاد سے خالی ہے (میرے دل میں صرف آپ (صلعم) ہی بستے ہیں) اگر اجازت ہو تو میں وہ آرزو لبوں تک لے آؤں۔

میں جانتا ہوں کہ میری زندگی میں عمل کا کوئی سامان نہیں اس لیے مجھے یہ آرزو زیب نہیں دیتی۔

اس کے اظہار سے میں شرم محسوس کرتا ہوں، لیکن آپ (صلعم) کی شفقت میرا حوصلہ بڑھتی ہے۔

آپ (صلعم) کی شان رحمت ایک زمانے کو نوازتی ہے، میری یہ آرزو ہے کہ میرا آخری وقت حجاز میں آئے۔

وہ مسلم جو غیر اللہ سے بیگانہ ہے؛ کب تک بتخانے کا زنّار رہے۔

صد حیف کہ جب اس کا آخری وقت آئے تو اس کے بدن کو بتخانہ اپنے پہلو میں جگہ دے۔

(لیکن) اگر میرے بدن کے اجزا آپ (صلعم) کے در مبارک سے اٹھیں؛ تو اگرچہ میرا امروز اچھا نہیں (مگر) میرا کل مبارک ہو جائے۔

مبارک ہے وہ شہر جہاں آپ (صلعم) تشریف فرما ہیں ؛ کیا ٹھنڈی ہے وہ خاک جس میں آپ (صلعم) آرام فرما ہیں۔

'یہ ہمارے شاہ کا شہر اور ہمارے محبوب کا مسکن ہے؛ عاشقوں کے ہاں یہی حب الوطنی ہے '۔

میری قسمت کے ستارے کو بھی دیدہء بیدار عطا فرمایئے (میری قسمت بھی چمک اٹھے) اپنی دیوار کے سائے میں مجھے مراد نصیب فرمایئے۔

تاکہ میرے دل بیدار کو سکون نصیب ہو اور میرا دل جو سیماب کی طرح مضطرب ہے اسے قرار آ جائے۔

اور میں فلک سے کہہ سکوں کہ میری آخری آرام گاہ دیکھ؛ تو نے میرا آغاز بھی دیکھا تھا اب میرا انجام بھی دیکھ۔