اس کا گریبان پھٹا ہوا ہے، مگر اسے اس کے چاک سینے کی فکر نہیں؛ میں نہیں جانتا کہ وہ آرزو کے بغیر کیسے زندگی بسر کر رہا ہے۔ وہ مسلمان جو اللہ ہو کے بغیر زندگی بسر کرتا ہے؛ اس کی قسمت میں نامکمل موت ہے (نہ وہ زندوں میں ہے، نہ مردوں میں)۔

آپ (صلعم ) اس کی حق رسی کریں، وہ مسکین و اسیر ہے؛ فقیر ہے، اور اس کی غیرت کبھی کی مر چکی ہے۔ اس پر میکد ے (روحانیت) کا دروازہ بند کر دیا گیا؛ اس ملک میں مسلمان پیاسا مر رہا ہے۔

آپ (صلعم ) اس کی فطرت کو دوبارہ پاکیزہ کر دیں؛ اس کے دل میں نیا جہان پیدا فرما دیں۔ ہوا تیز ہے اور اس کے دامن میں دو سو چاک ہیں؛ آپ (صلعم ) اس کے بجھتے ہوئے چراغ کی فکر کریں۔

زندگی کی دلہن اس کی خلوت گاہ میں اجنبی ہے (وہ زندگی سے لطف نہیں اٹھا رہا)؛ کیونکہ وہ نیستی کے مقام کی سیر میں مصروف ہے۔ وہ ایسا گنہگار ہے جو موت سے پہلے ہی قبر میں پہنچ چکا ہے؛ اس کے نکیر کلیسا ہیں اور منکر مندر سے (منکر نکیر قبر میں آ کر سوال کرتے ہیں)۔

اس کی آنکھ میں نہ نور ہے نہ سرور؛ نہ اس کے سینے میں دل بے قرار۔ خدا اس امت کا مددگار ہو؛ کہ اس کی موت جان بے حضور (عشق الہی) سے خالی ہونے کے باعث ہے۔

یہ مسلمان زادہ ہو کر موت سے ناواقف ہے ؛ تا دم مرگ موت کے خوف سے کانپتا رہتا ہے۔ مجھے اس کے سینہ ء چاک میں دل نظر نہیں آیا ؛ البتہ وہاں اکھڑا ہوا سانس اور موت کا خوف ضرور دیکھا۔