(دور اوّل کے) عربوں نے اپنے آپ کو نور مصطفے (صلعم) سے منوّر کیا؛ مشرق کے بجھے ہوئے چراغ کو روشن کیا۔ مگر اب انہوں نے وہ خلافت گم کر دی ہے؛ جس نے پہلے پہل مسلمانوں کو پادشاہت سکھائی ہے۔

خلافت ہمارے مقام ( بلند) پر گواہی دے رہی ہے؛ جسے پادشاہت کہتے ہیں، وہ ہمارے لیے حرام ہے۔ پادشاہت سراسر مکر و فریب ہے؛ جب کہ خلافت ناموس الہی (اخلاق اعلی ) کی محافظ ہے۔

کبھی کوئی کلیم ، جو کلاہ و گدڑی کے بغیر ؛ فقیری شان رکھتا ہے، پادشاہت سے ٹکرا جاتا ہے (اور اسے تباہ کر دیتا ہے)۔ یہ بھی تقدیر کے کھیل ہیں؛ کہ کبھی نسیم سے صرصر کا کام لے لیا جاتا ہے۔

دنیا میں ابھی تک انسان (انسان کا) غلام ہے ؛ اس کا نظام (حیات) خام اور اس کا مقصود (حیات) نامکمل ہے۔ میں اس گیتی پناہ (صلعم) کے فقر کا غلام ہوں ؛ جس کے دین میں پادشاہت کو حرام قرار دیا گیا ہے۔

محبت آپ (صلعم) کی نگاہ سے پائیداری حاصل کرتی ہے؛ آپ (صلعم) کی بتائی ہوئی راہ سلوک ، عشق و مستی کے لیے معیار ہے۔ آپ (صلعم) کا مقام عبدہ بتایا گیا ہے، مگر آپ (صلعم) جہان شوق (و مستی) کے پروردگار ہیں۔