یہ کیسا زمانہ ہے کہ دین اس کے ہاتھوں فریاد کناں ہے؛ اس دور کی آزادی میں ہزاروں بند (پنہاں) ہیں۔ اس کی مصوّری کے غلط نقش نے ؛ ا نسانیت کے چہرے کی آب و تاب ختم کر دی ہے۔

دور حاضر کی نگاہ (انداز فکر ) کافرانہ نقوش (نظریات) کی خالق ہے؛ اس کی صنعت کا کمال (نئے نئے ) بت گھڑنا ہے۔ اس دور کے تاجروں کے حلقہ سے بچ؛ ان کی ساری سوداگری محض قمار بازی ہے۔

ہر دور جوانوں کو برائی سکھاتا ہے ؛ اس کی وجہ سے ابلیس کی رات روز (روشن) میں تبدیل ہو چکی ہے۔ میں اس کے دامن کے ساتھ شعلہ کی طرح لپٹا ہوا ہوں ؛ کیونکہ یہ دور نور (ہدایت) اور سوز (محبت) سے خالی ہے۔

مسلمان نے فقر اور حکمرانی کو یکجا کر دیا تھا؛ اس کے ضمیر میں باقی (آخرت) اور فانی (دنیا) اکٹھے ہو گئے ہیں۔ لیکن عصر حاضر سے خدا بچائے ؛ اس نے سلطانی کو اور شیطانی کو اکٹھا کر دیا ہے۔

کیا کہوں کہ تیرا رقص یوں ہے اور یوں نہیں؛ یہ اندرونی مسرت کا اظہار نہیں، بلکہ حشیش ہے۔ تو فرنگیوں کی تقلید میں پاؤں سے حرکات کرتا ہے؛ مگر تیری رگوں میں خون کا وہ جوش نہیں۔