میرے جنگل کے خشک و تر میں کوئی ایسی چیز نہیں جو کار آمد نہ ہم؛ جس درخت کی لکڑی منبر بنانے کی صلاحیت نہیں رکھتی میں اس سے سولی بنا دیتا ہوں نظیری نیشا پوری۔ (منبر پر سے وعظ کہا جاتا ہے اور سولی سے مراد شہدا کا مقام ہے۔)

جب دنیا کو روشن کرنے والے آفتاب نے رات کو ختم کر دیا؛ تو میرے آنسوؤں نے پھول کے چہرے پر پانی چھڑکا۔

میرے آنسوؤں نے نرگس کی آنکھ سے خواب کا اثر دھو دیا؛ میرے شور سے سبزہ بیدار ہو کر زمین سے نکل آیا۔

باغبان (فطرت) نے میرے کلام کے زور کو آزمایا؛ مصرع بویا اور شمشیر کاٹی (مصرع بویا تو وہ بڑھ کر شمشیر بن گیا)۔

اس نے باغ میں میرے آنسو کے دانے کے علاوہ اور کچھ نہ بویا؛ اس نے میری فغاں کے تار کو باغ کے پود سے ملا دیا (تار و پود سے کپڑا بنا جاتا ہے)۔

گو میں ایک ذرّہ ہوں لیکن سورج کی ساری روشنی میرے ایک لحظہ کے برابر ہے؛ میرے گریبان میں سینکڑوں صبحیں مستور ہیں (میں ہر روز ایک نئی صبح طلوع کر سکتا ہوں)۔

میری خاک جمشید کے جام سے زیادہ روشن ہے؛ میں ان واقعات سے با خبر ہوں جو ابھی دنیا کے اندر وجود میں نہیں آئے۔

میرے فکر نے (معنی کے) وہ غزال اپنے شکار بند میں باندھ لیے ہیں؛ جو ابھی تک عدم سے وجود میں نہیں آئے۔

وہ سبزہ جو ابھی اگا نہيں میرے گلشن فکر کی زیب و زینت ہے؛ پھول جو ابھی شاخ سے پھوٹے نہیں وہ میرے دامن ( فکر) میں ہیں۔

میں عیش و طرب کی محفل برہم کرنے والا ہوں؛ یں رگ عالم کے تار کو اپنے مضراب سے چھیڑتا ہوں۔

کیوں کہ میری فطرت کے ساز سے نادر نغمے پیدا ہو رہے ہیں؛ اس لیے میرے پاس بیٹھنے والے نغمے سے ناواقف ہیں۔

میں دنیا میں ایک نیا طلوع ہونے والا سورج ہوں؛ میں نے ابھی آسمان کے طور طریقے نہیں دیکھے۔

ابھی تک ستارے میری روشنی سے ماند نہیں پڑے؛ ابھی تک میرے پارے میں تڑپ پیدا نہیں ہوئی۔

ابھی تک سمندر میری شعاؤں کے رقص سے بے نصیب ہے؛ ابھی تک پہاڑ نے میرا حنائی رنگ نہیں پایا۔

ابھی تک دنیا کی آنکھ میری خوگر نہیں ہوئی؛ میں خود بھی اپنے برسر عام آنے سے لرزہ بر اندام ہوں (کہ دیکھیں اس کا ردعمل کیا ہوتا ہے)۔

(میرے آفتاب کی) صبح مشرق سے طلوع ہو چکی ہے اور رات کا اندھیرا ختم ہو چکا ہے؛ دنیا کے پھول پر (میرے آنسوؤں کی) نئی شبنم گر رہی ہے۔

میں صبح سویرے اٹھنے والوں کے انتظار میں ہوں؛ کیا خوش نصیب ہیں وہ جو میرے آتشیں (جذبہ ) کے پرستار ہیں۔

میں ایسا نغمہ ہوں جو مضراب سے بے نیاز ہے؛ میں آنے والے دور کا شاعر ہوں۔

میرا دور اسرار کو نہیں سمجھتا؛ میرا یوسف اس بازار کے لائق نہیں۔

میں اپنے پرانے دوستوں سے ناامید ہوں (کہ وہ میری بات سمجھ سکیں گے)؛ میرا طور جل رہا ہے (اور اس انتظار میں ہے کہ) کوئی کلیم آئے۔

میرے ساتھیوں کا سمندر شبنم کی طرح بغیر جوش و خروش کے ہے؛ اس کے برعکس میری شبنم سمندر کی مانند طوفانی ہے۔

میرے نغمے کا تعلق ایک اور ہی دنیا سے ہے؛ اس جرس کے لیے کوئی نیا قافلہ آئے گا۔

بہت سے شاعر ہیں جو مرنے کے بعد زندہ ہوتے (شہرت پاتے) ہیں؛ اپنی آنکھ موند لیتے ہیں اور ہماری آنکھ کھول دیتے ہیں۔

وہ عدم سے دوبارہ (زندگی کا) ساز و سامان لاتے ہیں؛ پھول کی مانند اپنے مزار کی خاک سے اگ آتے ہیں۔

اگرچہ اس صحرا سے کئی قافلے گزرے ہیں؛ مگر وہ ناقہ کے قدموں کی مانند بغیر کسی شور و غوغا کے گزرے ہیں۔

میں عشق ہوں فریاد کرنا میرا ایمان ہے؛ میری فریاد سے اتنا شور اٹھتا ہے کہ اس کے مقابلے میں حشر کا شور ان ملازموں کی مانند ہے جو بادشاہ کی سواری کے آگے آگے بھاگتے اور اس کی آمد کی اطلاع دیتے ہیں۔

اگرچہ میرے ساز کے تار میرے نغمے کے متحمّل نہیں ہو سکتے؛ لیکن میں اس سے نہیں ڈرتا کہ وہ ٹوٹ جائیں گے (اپنا نغمہ ضرور سناؤں گا)۔

قطرے (کم ہمت لوگوں) کے لیے میرے (نغمے کے) سیلاب سے دور رہنا ہی بہتر ہے؛ سمندر ہی کو اس کے شور سے دیوانگی حاصل کرنی چاہئے۔

میرا سمندر کسی چھوٹی ندی میں نہیں سما سکتا؛ میرے طوفان کو سنبھالنے کے لیے کئی سمندر چاہئیں۔

وہ غنچہ جو نشو و نما پا کر گلشن کی طرح صورت اختیار نہیں کرتا وہ میرے نغمے کے ابر بہار کے لائق نہیں۔

میری جان میں بجلیاں خوابیدہ ہیں؛ کوہ و صحرا ہی میری تگ و تاز کے لائق ہیں۔

اگر تو صحرا ہے تب میرے صحرا کو گرفت میں لے؛ اگر تو طور سینا ہے تو پھر میری برق کو اپنے اندر سما۔

آب حیات میرے نصیب کیا گیا ہے؛ مجھے راز حیات کا محرم بنایا گیا ہے۔

میری نوا کی تپش سے ذرّہ زندہ ہو گیا ہے؛ اور پر و بال نکال کر جگنو بن گیا ہے۔

جو راز میں بیان کر رہا ہوں وہ کسی اور نے بیان نہیں کیا؛ کسی نے معنی کے موتیوں کو اس طرح (ایک لڑی میں) نہیں پرویا۔

اگر تو عیش جاوید کا راز معلوم کرنا چاہتا ہے تو میرے پاس آ؛ تو دنیا کا خواہاں ہو یا آخرت کا میرے پاس آ۔

یہ راز مجھے پیر گردوں نے بتائے ہیں؛ اگرچہ انہیں ظاہر نہیں کرنا چاہئے لیکن انہیں دوستوں سے پوشیدہ نہیں رکھا جا سکتا۔

اے ساقی! اٹھ اور میرے جام میں شراب ڈال دے جو دل سے زمانے کی کلفتیں دور کر دے۔

وہ آتشیں شراب جس کی اصل زمزم سے ہے؛ اس کا چاہنے والا اگر گدا بھی ہو تو وہ بادشاہ ہے۔

ایسی شراب سوچ کو اور تیز کر دیتی ہے؛ اور جو آنکھ پہلے ہی بیدار ہو ا سے بیدار تر کر دیتی ہے۔

یہ تنکے کو پہاڑ کا وقار عطا کرتی ہے؛ اور لومڑی کو شیروں کی قوّت بخشتی ہے۔

خاک کو ثریا کی بلندی دیتی ہے؛ اور قطرے کو سمندر کی وسعت۔

یہ خاموشی کو شور قیامت میں تبدیل کر دیتی ہے؛ اور چکور کے پنجے کو باز سے لڑا دیتی ہے۔

اٹھ اور میرے جام میں یہ خالص شراب ڈال؛ اور اس طرح میرے فکر کی رات پر چاندنی بکھیر دے۔

تاکہ میں بھٹکے ہوؤں کو منزل کی جانب لے جاؤں؛ اور (شوق) نظارہ کو ذوق بے تابی دوں۔

تاکہ میں ایک نئی جستجو کے راستے میں سرگرم ہو جاؤں؛ اور اپنے آپ کو نئی آرزو سے متعارف کروں۔

اہل ذوق کی آنکھ کی پتلی بن جاؤں؛ اور دنیا کی آواز میں صدا کی طرح گم ہو جاؤں۔

تاکہ میں متاع شاعری میں اپنے آنسو شامل کر کے اس کی قیمت بڑھا دوں۔

اور پیر روم کے فیض سے؛ اسرار علوم کے سربستہ دفتر کھول دوں۔

مولانا روم کی جان کئی شعلوں کی سرمایہ دار ہے؛ جبکہ میری چمک شرر کی مانند لمحہ بھر کی ہے۔

اس کی جلتی ہوئی شمع نے مجھ پروانے پر یورش کر دی؛ گویا اس کی شراب نے میرے پیمانے پر شبخون مارا۔

پیر رومی نے میری خاک کو اکسیر بنا دیا؛ اور میرے غبار سے کئی جلوے پیدا کر دیئے۔

میرے ذرّے نے بیابان کی خاک سے رخت (سفر) باندھا؛ تاکہ وہ آفتاب کی شعاع کو گرفت میں لے۔

میں موج ہوں اور میں نے رومی کے سمندر کو اپنا مسکن بنایا ہے؛ تاکہ وہاں سے چمکدار موتی حاصل کروں۔

یں جو اس کی شراب سے مستی حاصل کرتا ہوں؛ میری زندگی انہی کے دم سے ہے۔

رات میرا دل فریاد کناں تھا؛ رات کی خاموشی میری 'یا رب کی' آواز سے آباد ہو رہی تھی۔

میں نے غم دوراں کی شکائت کا طوفان اٹھا رکھا تھا اور اپنی بے سر و سامانی پر نالاں تھا۔

میری نگاہیں تڑپتے تڑپتے بال و پر کھو بیٹھیں اور میں سو گیا۔

پیر حق سرشت (رومی) ظاہر ہوئے؛ وہ جنہوں نے فارسی زبان میں قران پاک کی حکمت بیان کی ہے۔

انہوں نے فرمایا تو جو اہل عشق کا شیدائی ہے؛ عشق کی خالص شراب کا ایک گھونٹ پی لے۔

(اور اس سے) اپنے جگر میں قیامت کا ہنگامہ پیدا کر؛ اس شراب سے سرمست ہو اور اشکوں کو خونتاب کر۔

اپنی ہنسی کو سینکڑوں نالوں کا سرمایہ بنا (اپنی ہنسی کو نالہ و فریاد میں بدل دے)؛ اپنے اشک خونیں میں جگر کے ٹکڑے ملا۔

کب تک کلی کی مانند خاموش رہے گا؛ اپنی خوشبو کو پھول کی مانند عام کر دے۔

تو حرمل کے دانے کی طرح اپنے اندر ہنگامہ رکھتا ہے؛ اس لیے اپنے محمل (ناقہ) کو آتش پر باندھ لے۔

نالہ خاموش کو اپنے بدن کے ہر بن و مو سے جرس کی مانند باہر نکال۔

تو آگ ہے بزم کائنات کو جگمگا دے؛ دوسروں کو بھی سوز کی تپش عطا کر۔

پیر مغاں کے راز برملا بیان کر؛ شراب کی موج بن اور مینا کا لباس پہن۔

خرد کے آئینے کے لیے پتھر بن؛ اور اسے سر بازار توڑ دے۔

بانسری کی مانند نیستاں کا پیغام سنا؛ قیس کے لیے لیلی کا پیغام لا۔

نالہ و فریاد کے لیے نئے انداز ایجاد کر؛ (افسردہ) محفل کو ہا و ہو سے گرم دے۔

اٹھ اور زندہ شخص کو نئی جان عطا کر؛ لفظ '‍ قوم' کہہ کے زندوں میں اور زندگی بھر دے۔

اٹھ اور نئے راستے پر قدم رکھ؛ اپنے سر سے پرانی روایات کا سودا نکال دے۔

لذّت گفتار سے آشنا ہو (کچھ کہہ )؛ تو قافلہ کے لیے بانگ راحیل ہے، اٹھ (قافلے کو جگا)۔

اس آواز نے میرے تن بدن میں آگ لگا دی؛ اور میں ہنگاموں بھری بانسری کی مانند ہوں۔

میں اپنے (ساز کے) تار سے نغمے کی مانند اٹھا؛ اور میں نے سماعت کے لیے جنت سجا دی۔(غالب نے جنت نگاہ اور فردوس گوش کی اصطلاحیں استعمال کی ہیں)

میں نے خودی کے راز سے پردہ اٹھا دیا؛ اور اس کے اعجاز پوری طرح ظاہر کر دیئے۔

میرا وجود ایک ناتمام نقش تھا؛ ناقابل قبول، بے قیمت اور ناکارہ۔

عشق نے مجھے سان پر چڑھایا تو میں آدم بنا؛ اور میں نے اس جہان کی اشیاء کا علم پایا۔

میں نے آسمان کے اعصاب کی حرکت دیکھ لی؛ مجھے چاند کی رگوں میں گردش کرتا ہوا خون نظر آ گیا۔

میں نے انسان کے غم میں رو رو کر راتیں گزار دیں؛ تب کہیں جا کر میں زندگی کے رازوں پر سے پردہ اٹھانے میں کامیاب ہوا۔

میں نے ممکنات کے کارخانے کے اندر سے؛ زندگی کے استحکام کا راز (لائحہ عمل ) نکال لیا ہے۔

میں جس نے (زندگی کی) رات کو چاند کی طرح خوبصورت بنا دیا ہے؛ میں فقط ملّت بیضا کی گرد پا ہوں۔

وہ ملّت جس کا شہرہ باغ و راغ میں ہے؛ جس کے تازہ نغمے دلوں میں حرارت پیدا کرتے ہیں۔

وہ ملت جس نے ذرّہ بویا اور آفتابوں کے انبار لگا دیئے؛ جس کے کھلیان سینکڑوں رومی اور عطّار ہیں۔

میں آگ گرم ہوں جو آسمان تک پہنچتی ہے؛ اگرچہ میں (آہ) کا دھواں ہوں لیکن ہوں تو آگ کے خاندان سے۔

میرے قلم نے فکربلند کی ہمت سے؛ اس نہہ پردہ (کائنات) کے راز کو صحرا میں ڈال دیا (سر عام واضح کر دیا)۔

تا کہ قطرہ دریا کے ہم پلّہ ہو جائے اور ذرّہ بڑھ کر صحرا بن جائے۔

اس مثنوی کا مقصد شاعری (بت بنانا اور بت پرستی سکھانا) نہیں۔

میں ہندی ہوں فارسی میری زبان نہیں؛ میں نئے چاند کی مانند اندر سے خالی ہوں۔

مجھ سے انداز بیاں کی خوبصورتی کی توقع نہ رکھ؛ میں شعراء خوانسار اور اصفہان جیسی زبان پیش نہیں کر سکتا۔

اگرچہ ہندی زبان مٹھاس میں شکر ہے؛ لیکن فارسی زبان کا انداز بیان اس سے زیادہ شیریں ہے۔

فارسی زبان کے جلوے نے میرے فکر کو مشہور کر دیا؛ اور میرا کلام (اس کی بدولت) نخل طور کی شاخ بن گیا۔

میرے فکر کی بلندی کے لحاظ سے فارسی زبان اس کی فطرت سے زیادہ مناسبت رکھتی ہے۔

خردہ مینا: شراب۔ خردہ گرفتن: نکتہ چینی کرنا۔ اے دانا شخص! میری مینائے کلام (الفاظ) پر نکتہ چینی نہ کر بلکہ اس مینا کی شراب (معنی) سے لطف اندوز ہونے کا ذوق پیدا کر۔