آرزو کے داغ سے انسان کے اندر جوش پیدا ہوتا ہے؛ اس خاک (انسان) کی آگ آرزو سے روشن ہوتی ہے۔

تمنا زندگی کے جام کی شراب ہے؛ اسی سے زندگی میں سرگرمی اور مستعدی پیدا ہوتی ہے۔

زندگی کا مقصد کائنات کی قوّتوں کی تسخیر ہے اور آرزو اس تسخیر کا لیے افسوں کا کام دیتی ہے۔

زندگی شکار کھیلتی ہے اور اس کا جال آرزو ہے؛ آرزو حسن کے لیے عشق کی طرف سے پیغام ہے۔

ہر لمحہ تمنا کیسے ابھرتی ہے؟ یہ زندگی کے نغمے کا زیر و بم ہے۔

جو چیز خوبصورت ، زیبا اور جمیل ہے؛ وہی طلب کے بیابان میں ہمارے لیے رہنما بنتی ہے۔

تیرے دل میں اس کا نقش پکی طرح جم جاتا ہے؛ اور وہ تیرے اندر آرزويں پیدا کرتی ہے ۔

حسن بہار آرزو کا خلّاق ہے؛ اس کے جلووں سے آرزو پرورش پاتی ہے۔

شاعر کا سینہ جلوہ گاہء حسن ہے؛ اس (طور) سینا سے حسن کے انوار پھوٹتے ہیں۔

اس شاعر کی نگاہ سے خوبصورت چیز اور خوبصورت ہو جاتی ہے؛ اس کے اشعار کے افسوں سے فطرت کا حسن زیادہ خوبصورت لگتا ہے۔

شاعر کے نغمے سے بلبل نے نوا سیکھی ہے؛ اس کے غازے نے پھول کو چمکا دیا ہے۔

پروانوں کے دل میں اسی کا سوز ہے ؛ وہی عشق کے افسوں کو رنگیں بناتا ہے ۔

شاعر کے آب و گل میں سمندر اور خشکی پوشیدہ ہے؛ اس کے دل کے اندر سینکڑوں جہاں مستور ہیں۔

اس کے دماغ میں ایسے گل ہائے لالہ موجود ہیں جو ابھی پھوٹے نہیں؛ وہ ایسے نغموں اور نالوں سے بھرا ہوتا ہے جو ابھی تک کسی نے نہیں سنے۔

اس کے فکر کی پرواز ماہ و انجم تک ہے؛ وہ بدصورتی سے نا آشنا ہے، صرف حسن کی تخلیق کرتا ہے۔

خضر کی مانند شاعر کے ظلمات میں آب حیات ہے؛ اس کے آنسو کائنات کو زندہ تر کر دیتا ہے۔

ہم سست رو ، نا پختہ اور بے سمجھ ہیں اور منزل کی راہ میں گرے پڑے ہیں۔

اس کا عندلیب نوا ریز ہے ؛ جو ہمیں سفر پر آمادہ کرتا ہے۔

تاکہ ہمیں زندگی کی بہشت تک پہنچا دے اور ہماری زندگی کی قوس پورا دائرہ بن جائے (ہم مکمل ہو جائیں)۔

اس کی بانگ درا سے قافلے روانہ ہوتے ہیں ؛ اور اس کی لے کی آواز پر سفر جاری رکھتے ہیں۔

وہ ہماری زندگی کے باغ میں نسیم بن کر آتا ہے؛ اور لالہ و گل میں آہستگی سے داخل ہو جاتا ہے۔

اس کے جادو سے زندگی کی قوّت میں اضافہ ہوتا ہے؛ زندگی اپنا محاسبہ کرتی ہے اور آگے بڑھنے کے لیے بے تاب ہو جاتی ہے۔

وہ دنیا والوں کو اپنے دسترخواں کی طرف دعوت دیتا ہے؛ اور اپنی آتش شوق کو ہوا کی طرح ‏ عام کرتا ہے۔

افسوس اس قوم پر جو اپنی موت لانے میں خود حصّہ دار بنتی ہے؛ جس کا شاعر ذوق حیات سے روگرداں ہے۔

جس کا آئینہ (افکار) بری چیز کو اچھی کر کے دکھاتا ہے؛ جس کا شہد جگر میں سینکڑوں نشتر چبھو دیتا ہے ۔

جو پھول کو بوسہ دے تو وہ پژمردہ ہو جاتا ہے؛ جو بلبل کے دل سے ذوق پرواز چھین لیتا ہے۔

جس کی افیون افراد اقوام کے اعصاب شل کر دیتی ہے؛ جس کا مضمون قوم سے زندگی چھین لیتی ہے۔

جو سرو سے بانکپن کا ذوق چھین لیتا ہے؛ جس کی آہ سرد نر شاہین کو چڑیا بنا دیتی ہے۔

ایسا شاعر ہے مچھلی لیکن سینے سے سر تک آدم کی صورت رکھتا ہے ۔ بنات البحر کی طرح وہ سمندر ہی میں رہتا ہے۔

وہ اپنے نغمے سے ملاح کو سحر زدہ کر دیتا ہے؛ اور اس کی کشتی کو دریا کی گہرائی میں غرق کر دیتا ہے۔

اس کے نغمے دلوں سے استقلال چھین لیتے ہیں؛ اس کے جادو سے لوگ موت کو زندگی سمجھنے لگتے ہیں۔

وہ تیرے اندر سے زندگی کی خواہش نکال لیتا ہے؛ گویا تیری کان کے اندر سے سرخ لعل نکال لیتا ہے۔

وہ نفع کو نقصان بنا کر دکھاتا ہے؛ اور ہر اچھی چیز کو بری بنا دیتا ہے۔

وہ تجھے وسوسوں کے سمندر میں ڈال دیتا ہے اور اس طرح عمل سے بیگانہ بنا دیتا ہے۔

اس کے کلام سے بیمار اور زیادہ بیمار ہو جاتا ہے ؛ اس کا جام انجمن کو اور افسردہ کر دیتا ہے۔

اس کے بادل میں برق کی ندی نہیں؛ اس کا باغ رنگ و بو کا سراب ہے۔

اس (کے الفاظ ) کی خوبصورتی کو سچائی سے کوئی سروکار نہیں ؛ اس کا سمندر میں عیب دار موتیوں کے سوا اور کچھ نہیں۔

وہ نیند کو بیداری سے بہتر قرار دیتا ہے؛ اس کی پھونکوں سے آگ تیز ہونے کی بجائے الٹا بجھ جاتی ہے۔

اس کی بلبل کے نغموں سے قلب مسموم ہو جاتا ہے؛ اس کے پھولوں کے انبار کے نیچے سانپ سویا ہوا ہے۔

اس کے خم ، مینا اور جام سے خدا بچائے ؛ اس کی آئینہ مانند شفاف شراب سے خدا محفوظ رکھے۔

تو ایسے ہی شاعر کی شراب پی کر گر پڑا ہے؛ تیری صبح اس کی مینا کی مرہون منت ہے۔

اس کے نغمے سے تیرے دل کا جوش ٹھنڈا ہو چکا ہے ؛ تو نے اس کے نغموں کی صورت میں کان کی راہ سے زہر قاتل کھایا ہے۔

تیرا انداز ہی انحطاط کی دلیل ہے؛ تیرے ساز کا تار نوا پیدا کرنے سے قاصر ہے۔

تو آرام طلبی کے باعث اس قدر کمزور ہو چکا ہے کہ دنیا میں مسلمانوں کے لیے باعث شرم ہے۔

تجھے پھول کی رگ سے باندھا جا سکتا ہے؛ باد نسیم کا جھونکا تجھے زخمی کر دیتا ہے۔

تیری آہ و پکار نے عشق کو رسوا کر دیا ہے؛ تیری مصوّری نے عشق کی جو تصویرکھینچی ہے وہ بدصورت ہے۔

تیری بیماری کی وجہ سے عشق کے رخسار بھی زرد ہو چکے ہیں؛ تیری بے حسی نے عشق کی آگ کی تپش ختم کر دی ہے۔

تیرے زخموں کی وجہ سے تیرا عشق بھی مضمحل ہے؛ تیری کمزوری کی وجہ سے تیرا عشق (تب و) تواں سے محروم ہے۔

تیرے عشق کے پیمانے میں سوائے بچوں کی طرح رونے کے اور کچھ نہیں ؛ اس کے گھر کی ساری متاع صرف لمبی آہیں بھرنا ہے۔

تیرا عشق میخانے کی بھیک سے سرمست ہے؛ اس کا کام دوسروں کے روزن سے روشنی چرانا ہے۔

یہ عشق ہمیشہ نا خوش، افسردہ اور آزردہ رہتا اور (خانہء محبوب کے) پاسبان کی مار پیٹ سے ادھ موا رہتا ہے۔

غموں کے ہجوم کی وجہ سے وہ سرکنڈے کی مانند نحیف و نازار ہے؛ اس کی زیاں پر ہمیشہ آسمان کے سینکڑوں شکوے رہتے ہیں۔

اس کے آئینہء فطرت کا جوہر خوشامد یا کینہ ہے؛ اور کمزوری سے اس کا پرانا ساتھ ہے ۔

یہ عشق کم نصیبی، کمزوری، پست فطرتی، نالائقی ، نا امیدی اور نا کامی کا شکار رہتا ہے۔

اس کی آہ و پکار نے تمہاری زندگی کی پونجی اور ہمسایوں کی آنکھوں سے نیند کا لطف چھین لیا ہے۔

افسوس ایسے عشق پر جس کی آگ بجھ چکی ہو؛ جو حرم میں پیدا ہوا اور بتخانہ میں جا کر مر گیا۔

اے وہ شخص جس کی جیب میں سخن کی نقدی ہے (شاعر سے کہہ رہے ہیں) اپنی شاعری کو زندگی کی کسوٹی پر کس۔

پر امید سوچ عمل کی راہبر ہوتی ہے؛ اس کی مثال یوں ہے جیسے کڑک سے پہلے بجلی کی چمک۔

ادب میں فکر صالح ہونا چاہیے (جو عمل کی طرف رہنمائی کرے) ؛ ہمیں دوبارہ عرب کے ادب کی طرف لوٹنا چاہیے۔

دل عرب کی محبوبہ کے سپرد کرنا چاہیے؛ تاکہ کرد کی شام سے حجاز کی صبح پھوٹے۔

تو نے عجم کے باغ سے پھول چنے ہیں؛ ہند اور ایران کی نو بہار دیکھی ہے۔

اب تھوڑی دیر کے لیے صحرا کی گرمی میں وہاں کی کھجور سے حاصل کی ہوئی پرانی شراب بھی چکھ۔

ذرا صحرا کے گرم پہلو میں بھی سر ڈال؛ تھوڑی دیر کے لیے اپنے بدن کو اس کی باد صرصر کے حوالے کر۔

تو بڑی مدت تک ریشمی لباس سے لطف اندوز ہوتا رہا ہے؛ اب تھوڑی دیر کے لیے کھردرا کپڑا پہننے کی عادت ڈال۔

تو صدیوں تک گل لالہ کی پتیوں پر رقص کرتا رہا ہے؛ تو پھول کی مانند اپنے رخسار کو شبنم سے دھوتا رہا ہے۔

اب اپنے آپ کو تپتی ہوئی ریت پر بھی سرگرم سفر کر؛ چشمہء زمزم کے اندر بھی غوطہ زن ہو۔

بلبل کی مانند کب تک نالہ و شیون میں مست رہے گا؛ کب تک اپنا نشیمن باغوں میں بنائے رکھے گا۔

اے وہ شخص! جس کے دام کی برکت سے ہما جیسا پرندہ گراں قیمت ہو جاتا ہے؛ تو کسی بلند پہاڑ کی چوٹی پر اپنا آشیاں بنا۔

ایسا آشیانہ، بجلی اور کڑک اس کے پہلو میں ہوں ؛ جو نر بازوں کے گھونسلوں سے کہیں بلند ہو۔

تاکہ تو کشمکش حیات کے قابل ہو؛ اور تیرا جسم اور جان آتش حیات سے سوزاں ہو۔