اونٹ کا کام خدمت اور محنت ہے؛ صبر اور مستقل مزاجی اس کی خوبیاں ہیں۔

سفر کے دوران اس کے پاؤں آواز پیدا نہیں کرتے ؛ یوں وہ قافلوں کے لیے ریگستان کی کشتی ہے۔

اس کے پاؤں کے نقوش ہر صحرا میں ملتے ہیں ؛ تھوڑا کھانا، تھوڑا سونا، اور محنت میں لگے رہنا اس کا کام ہے۔

وہ محمل کے بوجھ کے نیچے مستانہ وار رقص کرتا ہوا منزل کی جانب رواں رہتا ہے۔

وہ اپنی رفتار کے کیف ہی میں مست رہتا ہے ؛ اور سفر میں اپنے سوار سے زیادہ صابر ہوتا ہے۔

تو بھی اپنے فرائض سے سرتابی نہ کر؛ تا کہ تو اللہ تعالے کے ہاں اچھے مقام سے بہرہ ور ہو۔

اے غفلت کوش تو بھی اللہ تعالے کی فرمانبرداری میں کوشاں ہو؛ کیونکہ ضبط ہی سے اختیار پیدا ہوتا ہے۔

بے قدر و قیمت انسان بھی اطاعت (شریعت) سے گراں قدر بن جاتا ہے؛ اس کے بر عکس آگ بھی سرکشی سے راکھ بن جاتی ہے۔

جس کسی نے چاند کو مسخر کیا؛ اس نے اپنے آپ کو کسی آئین کا پابند بنایا۔

ہوا پھول کے قید خانے میں رہ کر خوشبو بن جاتی ہے؛ اور خوشبو قید ہو کر آہو کا ناف بن جاتی ہے۔

ستارہ قانون کے سامنے سر تسلیم خم کرتے ہوے منزل کی جانب قدم بڑھاتا ہے۔

سبزہ اگنے کے قانون کی پابندی کرتے ہوئے اگتا ہے ؛ اور بت اس قانون کو چھوڑ دیتا ہے تو پامال ہو جاتا ہے۔

گل لالہ کا قانون یہ ہے کہ وہ ہمیشہ جلتا رہتا ہے؛ اس کی رگوں کے اندر اس کا خون بھڑکاتا ہے۔

وصل کے قانون کی پابندی کرتے ہوئے قطرے دریا اور ذرے صحرا بن جاتے ہیں۔

ہر شے کی حقیقی پختگی آئین سے ہے؛ تو کیونکہ اس سامان سے بے خبر جا رہا ہے۔

اے پرانے آئین (شریعت) سے آزادشخص ؛ اپنے آپ کو اسی نقرئی زنحیر کا پابند بنا۔

قانون کی سختی کی شکايت نہ کر؛ جناب رسول پاک (صلعم) کی حدود سے باہر نہ جا۔

تیرا نفس اونٹ کی طرح اپنی پرورش میں لگا رہتا ہے؛ ساتھ ہی وہ خود پرست ، خود سوار اور سرکش ہے۔

تو مرد بن اور اس کی باگ ڈور سنبھال ؛ تاکہ اگر تو کنکر بھی ہے تو گوہر بن جائے۔

جو اپنے اوپر حکم نہیں چلاتا؛ اسے دوسروں کی حکم برداری کرنا پڑتی ہے۔

تیری تعمیر مٹی سے کی گئی ہے؛ اور تیرے اندر محبت اور خوف کی آزمائش رکھی گئی ہے۔

دنیا کا خوف ، آخرت کا خوف ، زمین و آسمان کے مصائب کا خوف۔

دوسری طرف مال و دولت کی محبت ، وطن کی محبت ، خویش و اقربا کی محبت، عورت کی محبت۔

پانی اور مٹی کے امتزاج سے بدن کی پرورش ہے؛ اور پھر یہ بدن بے حیائی اور ناپسندیدہ کاموں کا شکار ہو۔

جب تک اپنے ہاتھ میں لا الہ کا عصا رکھے گا تو ہر قسم کے خوف کے جادو کو توڑ دے گا۔

جس کے اندر حق تعالے جاں کی طرح بسا ہوا ہے؛ اس کی گردن باطل کے آگے نہیں جھکتی۔

ایسے شخص کے سینے میں خوف کی گنجائش نہیں ؛ اس کا دل کبھی غیر اللہ سے مرعوب نہیں ہوتا۔

جو کوئی توحید کی ولایت میں آباد ہوتا ہے وہ زن و اولاد کے بندھن سے آزاد ہو جاتا ہے۔

ایسا شخص غیر اللہ سے لا تعلق ہو جاتا ہے؛ پھر وہ بیٹے کی گردن پر بھی چھری رکھ دیتا ہے۔

ایک اللہ تعالے کے ساتھ ہونا یوں ہے جیسے کثیر لشکر ساتھ ہو؛ اس کی نظر میں جاں ہوا سے بھی ارزں ہوتی ہے۔

کلمہ طیبہ صدف ہے اور نماز اس کا گوہر ؛ مومن کے قلب کے لیے نماز حج اصغر کی مانند ہے۔

نماز مسلمان کے ہاتھ میں خنجر کی مانند ہے؛ یہ بے حیائی ، سرکشی اور ناپسندیدہ کاموں کو ختم کر دیتی ہے۔

روزہ بھوک اور پیاس پر شبخون مارتا ہے، اور تن پروری کے قلعہ کو توڑ دیتا ہے۔

حج اہل ایمان کے قلب کو (تجلیات ذات سے) منوّر کر دیتا ہے؛ حج ہجرت کا سبق دیتا ہے اور وطن کی محبت جلا دیتا ہے۔

فرمانبرداری حمیّت کا سرمایہ ہے؛ اس سے ملت کی کتاب کے اوراق مربوط ہوتے ہیں۔

زکواۃ دولت کی محبت ختم کرتی ہے؛ نیز مساوات سے آشنا کرتی ہے۔

(قرآن پاک کا ارشار ہے کہ ) تم اس وقت تک نیکی حاصل نہیں کر سکتے جب تک تم زکواۃ نہ دو؛ زکواۃ اس حکم پر عمل کے ذریعے دل کی تقویت کا باعث بنتی ہے۔ (زکواۃ سے رزق بڑھتا ہے اور مال کی محبت کم ہوتی ہے - حدیث شریف۔

یہ سب تمہاری شخصیت کو مستحکم کرنے کے ذرائع ہیں ؛ اگر تیرا اسلام محکم ہے تو تیری شخصیت بھی پختہ ہے۔

یا قوی کے ورد سے صاحب قوّت بن؛ تاکہ اپنے خاکی بدن کے اونٹ پر سواری کر سکے۔

اگر تو شتربان ہے اپنے نفس پر قابو رکھتا ہے تو جہان پر بھی حکومت کرے گا، پادشاہت کا تاج تیرے سر کی زینت بنے گا۔

جب تک یہ دنیا باقی ہے تو بھی اس کی زینت رہے گا ؛ تو ایسی سلطنت کا تاجدار بنے گا جو کبھی ختم نہ ہونے والی ہے۔

دنیا میں اللہ تعالے کا نائب ہونا اور عناصر فطرت پر حکمرانی کرنا کیا خوب ہے۔

نائب حق اس کائنات کی جان کی مانند ہے، اس کا وجود دنیا میں اللہ تعالے کا سایہ ہے (اس کے اندر اللہ تعالے کی صفات منعکس ہوتی ہیں)۔

وہ جزو و کل کے جملہ رموز سے آگہی رکھتا ہے؛ وہ دنیا میں اللہ تعالے کے حکم سے قائم ہے۔

جب وسعت کائنات میں اپنا خیمہ گاڑتا ہے؛ تو اس بساط کہنہ کو درہم برہم کر دیتا ہے۔

اس کی فطرت (نئے افکار سے) معمور ہوتی ہے اور اپنا اظہار چاہتی ہے؛ چنانچہ وہ نیا جہان وجود میں لے آتا ہے۔

اس کے افکار کی کھیتی سے اس جہان جزو و کل کی طرح کے سینکڑوں جہان پھولوں کی مانند پھوٹتے ہیں۔

وہ ہر کام کی خاصیت کو پختہ تر کر دیتا ہے (ہر قلب کے) حرم سے بت باہر نکال پھینکتا ہے۔

اس کی مضراب سے دلوں کی تاروں سے نغمے پھوٹتے ہیں؛ اس کا سونا جاگنا سب اللہ تعالے کے لیے ہے۔

وہ بڑھاپے کو جوانی کا انداز سکھاتا ہے؛ ہر چیز کو جوانی کے رنگ میں رنگ دیتا ہے۔

وہ نوع انسان کے لیے بشیر بھی ہے اور نذیر بھی (اچھے اعمال اور اچھی جزا کی خوشخبری دیتا ہے اور برے اعمال کی سزا سے ڈراتا ہے)؛ وہ سپاہی بھی ہے، فوج کو ترتیب دینے والا بھی ہے اور سپہ سالار بھی۔

وہ قرآن پاک کی اس آیہء پاک کا مدعا ہے کہ اللہ تعالے نے آدم کو تمام اشیاء کے نام سکھا دیے ؛ وہ اسرار کے بھید کا راز دان ہے ( دینوی اور روحانی علوم سے آشنا ہوتا ہے)۔

اس کا سفید ہاتھ عصا سے مضبوط ہے (حضرت موسی کے یدبیضا اور عصا کی طرف اشارہ ہے) اسے پورا علم اور پورا اختیار حاصل ہوتا ہے۔

جب وہ شاہسوار اپنے ہاتھ میں باگ تھامتا ہے تو زمانے کے گھوڑے کی رفتار اور تیز ہو جاتی ہے۔

اس کی ہیبت سے دریا خشک ہو جاتا ہے؛ اور وہ بنی اسرائیل کو مصر سے نکال لے جاتا ہے (غلاموں کو آزادی کی دولت سے ہمکنار کرتا ہے۔

اس کے قم کہنے سے مردہ جانیں قبر کے اندر سے اس طرح اٹھ کھڑی ہوتی ہیں جس طرح باغ کے اندر سے صنوبر۔

اس کی شخصیت جہان کی شخصیت کی توجیہ ہے (صوفیہ انسان کو عالم اصغر کہتے ہیں) ؛ اس کے جلال و عظمت پر جہان کی عظمت موقوف ہے۔

اس کے زیر سایہ رہ کر ذرّہ خورشید کی عظمت پا لیتا ہے؛ اس کی قوّت سے زندگی کی قیمت بڑھ جاتی ہے۔

وہ اپنے زور عمل کے اعجاز سے دنیا کو نئی زندگی عطا کرتا ہے؛ وہ عمل کے نئے طور طریقے ایجاد کرتا ہے۔

اس کے نقوش پا سے کئی جلوے اٹھتے ہیں ؛ سینکڑوں کلیم اس کے طور کے مشتاق ہوتے ہیں۔

وہ زندگی کی نئی تفسیر کرتا ہے ؛ وہ اس خواب کو نئی تعبیر عطا کرتا ہے۔

اس کی پوشیدہ ہستی راز حیات ہے (اس کے ذریعے راز حیات وا ہوتا ہے) ؛ وہ ساز حیات کا ان سنا نغمہ ہے۔

فطرت کی مضمون نگار طبیعت بڑی جاں گسل محنت کرتی ہے تب کہیں جا کر نائب حق کی شخصیت کے دو بیت موزوں ہوتے ہیں۔

ہماری مشت خاک پریشانی کے عالم میں آسمان تک جا پہنچی ہے، امید ہے کہ اب اس غبار سے وہ شاہسوار ظاہر ہو گا۔

ہمارے آج کی راکھ میں ایسا شعلہ سویا پڑا ہے جو مستقبل قریب میں ہماری دنیا میں تپش و حرارت پیدا کر دے گا۔

ہمارے غنچے کے دامن میں گلستان چھپا ہے؛ ہماری آنکھ آنے والی صبح (کے نور) سے روشن ہے۔

(اے نائب حق) اے زمانے کے گھوڑے کے سوار ؛ تو امکان کی آنکھ کا نور ہے (تجھ سے عمل کے نئے نئے امکانات پیدا ہوتے ہیں۔

اس ہنگامہء موجودات کی رونق بن؛ تو اس دنیا کی آنکھ کا نور ہے، ہماری آنکھوں میں بس جا۔

اقوام دنیا نے جو شورش بپا کر رکھی ہے اسے آ کر خاموش کر دے؛ ایسا نغمہ سنا جو کانوں کے لیے لطف و راحت بنے۔

اٹھ اور دوبارہ ایسا قانون لا جو آخوت ساز ہو؛ ایسا جام جس کے اندر محبت کی شراب ہو۔

دنیا میں ایک بار پھر امن و امان قائم کر اور جنگجوؤں کو پھر صلح کا پیغام دے۔

نوع انسان کھیتی ہے اور تو اس کا حاصل؛ تو ہی کاروان زندگی کی منزل مقصود ہے۔

ہمارے شجر ملت کے پتّے خزاں کے جور و ظلم سے گر چکے ہیں؛ ہمارے باغ پر موسم بہار کی مانند آ۔

ہمارے بچے ، جوان اور بوڑھے جو غیر اللہ کے سامنے سر بسجود ہیں؛ ان کی شرمسار پیشانیوں کو اس سے نجات دلا۔

ہم اس جہاں کے سوز میں اس طرح جل رہے ہیں؛ تاکہ تیرے آنے سے ہم عزت و عظمت سے سرفراز ہو جائیں۔