سب سے پہلے ایمان قبول کرنے والے، بہادروں کے سردار سیدنا علی مرتضی (رضی اللہ)؛ آپ (رضی اللہ) عشق کے لیے ایمان کا سرمایہ تھے (قرآن پاک کے مطابق 'وہ جو ایمان والے ہیں ان کی اللہ تعالے سے محبت شدید ہے' - سورہ بقرہ۔

میں ان کے خاندان کی محبت سے زندہ ہوں اور دنیا میں موتی کی طرح چمک رہا ہوں۔

میں نرگس ہوں (ان کے) نظارے میں سرمست ہوں ؛ میں ان کے باغ میں خوشبو کی طرح پھر رہا ہوں۔

اگر میری خاک سے زمزم کا چشمہ ابل رہا ہے تو یہ ان کی وجہ سے ہے؛ اگر میرے انگور سے شراب ٹپک رہی ہے تو یہ انہی کی بدولت ہے۔

اگرچہ میں خاک ہوں مگر ان کی محبت سے آئینہ بن گیا ہوں ؛ میرا سینہ اتنا شفاف ہے کہ اس کے اندر نغمے کو دیکھا جا سکتا ہے۔

جناب رسول اکرم (صلعم) حضرت علی (رضی اللہ ) کے چہرہ سے فال لیتے تھے؛ ان کےشکوہ سے ملت اسلامیہ نے عزت پائی۔

حضور اکرم (صلعم) نے انہیں دین مبین کی قوّت فرمایا ہے ؛ ان کے خاندان سے کائنات کو قانون ملا ہے۔

للہ تعالے کے نبی (صلعم) نے انہیں ابو تراب کا لقب دیا؛ اللہ تعالے نے قرآن پاک میں یداللہ کہا ہے۔ (بیت رضوان کے موقعہ پر صحابہ کرام (رضی اللہ) نے حضور اکرم (صلعم) کے دست مبارک پر بیعت کی، اللہ تعالے نے فرمایا کہ ان کے ہاتھ پر اللہ تعالے کا ہاتھ ہے۔

جو شخص زندگی کے اسرار جانتا ہے ، اسے معلوم ہے کہ حضرت علی (رضی اللہ) کے اسماء کا راز کیا ہے۔

یہ تاریک خاک جس کا نام بدن ہے؛ جس کے ظلم سے عقل آہ و فریاد کرتی ہے۔

اس کی وجہ سے آسمان کی بلندی تک پہنچنے والا ہمارا فکر زمین ناپنے لگتا ہے؛ اس کی آنکھ اندھی ہو جاتی ہے اور کان بہرے۔

یہ فکر ہوس کے سبب ہاتھ میں دو دھاری تلوار رکھتا ہے اور اس رہزن کی وجہ سے مسافروں کے دل ٹکڑے ٹکڑے ہو جاتے ہیں۔

شیر خدا سیدنا علی (رضی اللہ) نے اس خاک کو مسخر کر لیا اور (بدن کی) مٹی کو اکسیر بنا لیا۔

مرتضی (رضی اللہ) جن کی تلوار سے سچائی دنیا میں روشن ہوئی؛ انہوں نے بدن کی ولایت پر فتح پانے کے باعث بو تراب کا لقب پایا۔

کرّاری خودداری ہے اور خود داری ہی سے مرد کے گوہر (اصلیت) کی آبرو ہے۔

کائنات جو بھی بو تراب بن جاتا ہے؛ وہ آفتاب کو مغرب سے لوٹا لیتا ہے۔

جو شخص بھی بدن کے گھوڑے پر زین کس لیتا ہے؛ وہ سلطنت کی انگوٹھی میں نگینہ کا درجہ حاصل کر لیتا ہے۔

اس دنیا میں فتح خیبر کی شان و شکوہ اس کے پاؤں کے نیچے ہوتی ہے اور وہاں اس کا ہاتھ آب کوثر تقسیم کرتا ہے۔

وہ خود آگہی کے ذریعے اللہ تعالے کا ہاتھ بن جاتا ہے اور اللہ تعالے کا ہاتھ بن کر دنیا پر حکومت کرتا ہے۔

اس کی ذات شہر علوم کا دروازہ ہو جاتی ہے؛ حجاز، چین اور روم سب اس کے زیر فرمان ہوتے ہیں۔

تجھے اپنے بدن کی خاک پر حکمران ہونا چاہیے تاکہ تو اپنے انگور سے مے ناب پی سکے۔

خاک ہو جانا پروانے کا مذہب ہے اور خاک کا باپ (بو تراب ) بن کہ یہی مردانگی ہے۔

اے وہ شخص جو پھول کی مانند نازک بدن ہے، تو پتھر بن تاکہ دیوار چمن کی بنیاد بن سکے۔

اپنی مٹی سے نیا انسان تعمیر کر اور پھر انسانوں کے لیے نیا جہان تعمیر کر۔

اگر تو اپنی خاک سے دیوار و در کی بنیاد نہ رکھے گا تو کوئی اور تیری مٹی سے اینٹ بنا کر اسے ( اپنی عمارت میں ) استعمال کر لے گا۔

تو جو کج رو آسمان سے تنگ ہے؛ تیرا جام پتھر کی زیادتی سے فریادی ہے۔

کب تک تو نالہ و فریاد ، سینہ کوبی اور ماتم میں لگا رہے گا۔

زندگی کی حقیقت عمل میں پوشیدہ ہے ؛ لطف تخلیق ہی قانون حیات ہے۔

اٹھ اور ایک نئے جہان کا خلاق بن ؛ آگ میں بیٹھ اور ابراہیم (علیہ) کی سی شہرت پا۔

ناموافق دنیا کے ساتھ موافقت پیدا کرنا ، میدان جنگ میں ہتھیار ڈال دینا ہے۔

وہ خود دار جوانمرد جو عمل میں پختہ ہو ؛ زمانہ اس کے مزاج کے ساتھ خود موافقت پیدا کر لیتا ہے۔

اگر دنیا اس کے مزاج کے ساتھ موافقت نہ کرے تو وہ آسمان کے ساتھ جنگ آزما ہوتا ہے۔

وہ کائنات کی بنیاد کھود ڈالتا ہے اور ذرّات کو نئی ترتیب دے کر ان سے نیا جہان پیدا کرتا ہے۔

وہ نیلے آسمان اور ایام کی گردش کو الٹ پلٹ کر دیتا ہے۔

وہ اپنی قوّت سے ایسا نیا زمانہ وجود لاتا ہے جو اس (کے افکار) سے مطابقت رکھتا ہے۔

اگر دنیا میں مردانہ وار زندگی بسر کرنا ممکن نہ ہو تو مردوں کی طرح جان دے دینا ہی زندگی ہے۔

قلب سلیم رکھنے والا شخص عظیم کارناموں سے اپنی قوّت کی آزمائش کرتا ہے۔

مشکلات ہی سے عشق کرنا اچھا ہے؛ خلیل اللہ (علیہ) کی طرح شعلے سے پھول چننا ہی اچھا لگتا ہے۔

وہ لوگ جو مرد میدان ہیں ان کی قوّت کے دائرہء ممکنات کا اندازہ مشکل پسندی ہی سے سامنے آتا ہے۔

پست ہمت لوگوں کا ہتھیار صرف آئینہ ہے؛ ان کی زندگی کا صرف یہی ایک دستور ہے۔

زندگی ظاہر قوّت ہے اور اس کی حقیقت (مشکلات پر) قابو پانے کا لطف ہے ۔

عفو بیجا ظاہر کرتا ہے کہ زندگی کا خون سرد ہو چکا ہے؛ یہ طرز عمل زندگی کے موزوں شعر میں سکتہ کی مانند ہے۔

ذلت کی گہرائی میں پڑا ہوا انسان اپنی ناتوانی کو قناعت کا نام دیتا ہے۔

حالانکہ ناتوانی زندگی کے لیے راہزن ہے (وہ زندگی کی پونجی لوٹ لیتی ہے )۔ ناتوانی کے بطن سے جھوٹ اور خوف پیدا ہوتے ہیں (کمزور آدمی ڈر کے مارے جھوٹ بولتا ہے)۔

اس کا اندرون اعلی اخلاقی اقدار سے خالی ہوتا ہے؛ اس کا دودھ برائیوں کو موٹا کرتا ہے۔

اے عقل سلیم رکھنے والے شخص! خبردار رہ یہ دشمن ہر وقت تیری گھات میں ہے۔

اگر تو عقلمند ہے تو اس کا فریب نہ کھا، یہ (کمزوری ) ہر لحظہ گرگٹ کی طرح رنگ بدلتی ہے۔

اہل نظر بھی اس کی صورت نہیں پہچانتے بلکہ وہ اس کے چہرے پر کئی پردے ڈال دیتے ہیں۔

کبھی رحم اور نرمی ناتوانی کا پردہ دار ہوتی ہے اور کبھی یہ انکسار کی چادر اوڑھ لیتی ہے۔

کبھی وہ مجبوری کے پردے میں چھپی ہوتی ہے اور کبھی معذوری کی تہ میں (کمزور لوگ مجبوری اور معذوری کا بہانہ بناتے ہیں)۔

کبھی یہ اپنے آپ کو تن آسانی کی صورت میں ظاہر کرتی ہے اور اس طرح صاحب قوّت شخص کو بے ہمت بنا دیتی ہے۔

قوّت اور سچائی دو جڑواں بچے ہیں ؛ اگر تو اپنی قوتوں سے آگاہ ہے تو یہی تیرے لیے جام جم ہے۔

زندگی کھیت ہے اور اس کا حاصل قوّت ہے، حق باطل کے راز کی وضاحت قوّت ہی میں پوشیدہ ہے ( حق ہو یا باطل قوّت ہی سے پھیلتے ہیں)۔

اگر دعوی دار کے پاس قوّت ہے تو اس کے دعوے کو کسی دلیل کی حاجت نہیں۔

قوّت ہی سے باطل حق کی شان اختیار کر لیتا ہے اور حق کو جھٹلا کے اپنے آپ کو حق سمجھنے لگتا ہے۔

باطل کے پاس قوّت ہو تو وہ زہر کو کوثر بنا کر پیش کرتا ہے؛ وہ خیر کو شر کہہ کر اسے شر بنا دیتا ہے۔

اے انسان! تجھے جو امانت عطا ہوئی تو اس (کی ذمہ داری) کے آداب سے بے خبر ہے۔ تجھے چاہیے کہ اپنے آپ کو دونوں جہانوں سے بہتر سمجھے۔

زندگی کے اسرار سے آگاہی حاصل کر؛ اللہ تعالے کے علاوہ ہر شے سے ظالم و جاہل ہو جا (سورہ الاحزاب کی آیہ 72 کی طرف اشارہ ہے)۔

اے عقلمند! اپنی آنکھ، کان اور لب کھولے رکھ ؛ اگر تجھے پھر بھی اللہ تعالے کا راستہ نظر نہ آئے تو بے شک میری ہنسی اڑانا۔