ایک پرندہ پیاس سے بے تاب تھا؛ سانس اس کے سینے میں دھوئیں کی لہر بن گئی تھی۔

اس نے باغ میں الماس کا ٹکڑا دیکھا ؛ پیاس کے باعث اسے وہ پانی نظر آیا۔

دھوپ سے چمکتے ہوئے ٹکڑے سے فریب تھا کر بے سمجھ پرندے نے پتھر کو پانی سمجھ لیا۔

اس نے اس پر چونچ ماری مگر اس کا حلق تر نہ ہوا؛ وہ گوہر سے نمی حاصل نہ کر سکا ۔

الماس نے کہا! اے ہوس میں گرفتار پرندے ؛ تو نے مجھ پر اپنی چونچ ماری ہے۔

میں پانی کا قطرہ نہیں ، نہ میں ساقی ہوں ؛ میں دوسروں کے لیے زندہ نہیں ہوں۔

تو دیوانہ ہے جو تو نے مجھے دکھ دینے کا قصد کیا ہے؛ تو ایسی زندگی سے بے خبر ہے جو قوّت کا اظہار کرتی ہے۔

میری آب و تاب پرندوں کی چونچ توڑ دیتی ہے؛ وہ تو آدمی کی جان کا گوہر بھی ختم کر دیتی ہے۔

پرندے کے دل کی خواہش الماس سے پوری نہ ہوئی ؛ اس نے چمکیلے ٹکڑے سے اپنا رخ پھیر لیا۔

اس کے سینے میں حسرت آباد ہو گئی؛ اس کی نوا اس کے گلے میں فریاد بن گئی۔

شاخ گل پر شبنم کا ایک قطرہ بلبل کے آنسو کی طرح چمک رہا تھا۔

جس کی چمک آفتاب کی مرہون منت تھی؛ جو آفتاب کے خوف سے کانپ رہا تھا۔

گویا وہ آسمان کا ایسا ستارہ تھا جو ہر دم حرکت میں رہتا ہے مگر ایک لمحے کے لیے اظہار وجود کے شوق میں ٹھہر گیا تھا۔

اس قطرہء شبنم نے کلیوں اور پھولوں سے سینکڑوں فریب کھائے تھے مگر وہ زندگی سے کچھ پا نہ سکا تھا۔

عاشق دلدادہ کے اس آنسو کی مانند جو ٹپکنے پر آمادہ پلکوں کی زینت بنا ہو۔

بے قرار پرندہ پھول کی شاخ کے نیچے پہنچا (اس قطرے کی طرف دیکھا ) تو شبنم کا قطرہ اس کے منہ میں ٹپک پڑا۔

اے وہ شخص جو دشمن سے جان بچانا چاہتا ہے؛ میں تجھ سے پوچھتا ہوں کہ تو قطرہء شبنم ہے یا الماس۔

جب پیاس کی شدت سے پرندہ مرنے کے قریب ہوا تو اس نے دوسرے کی زندگی کو اپنا سرمایہء حیات بنایا۔

قطرہ ء شبنم میں سختی نہ تھی اور نہ وہ گوہر کی فطرت رکھتا تھا ؛ البتہ الماس کے ٹکڑے میں یہ بات تھی۔

تو اپنی خودی سے ایک لمحہ کے لیے بھی غافل نہ ہو؛ الماس کا ٹکڑا بن شبنم کا ٹکڑا نہ بن۔

کوہسار کی مانند پختہ فطرت بن؛ تجھ میں کئی ایسے ابر پرورش پائیں جن کے برسنے سے دریا بھر جائيں۔

اپنی خودی مستحکم کر کے اپنا آپ پا لے؛ اپنے سیماب کو بستہ کر کے چاندی بنا لے۔

خودی کے تار سے نغمہ پیدا کر اور (اپنی ہمت آزمائیوں سے ) خودی کے اسرار دوسروں پر آشکار کر۔