میں ایک بار پھر حقیقت کا دروازہ کھولتا ہوں ؛ تمہیں ایک اور کہانی سناتا ہوں۔

کان میں کوئلے نے الماس سے کہا؛ تو لازوال جلوں کو اپنے اندر سمیٹے ہوئے ہے۔

ہم اکٹھے رہتے ہيں اور ہماری زندگی بھی ایک جیسی ہے؛ دنیا میں ہمارے وجود کی اصل بھی ایک ہے۔

میں کان کے اندر ہی بے بسی کے عالم میں مر جاتا ہوں ؛ اور تو پادشاہوں کے تاج تک جا پہنچتا ہے۔

بدصورتی کے باعث میں خاک سے بھی کمتر ہوں ؛ تیرے حسن سے آئینے کا دل بھی ٹکڑے ٹکڑے ہو جاتا ہے۔

میری تاریکی سے انگیٹھی روشن ہوتی ہے؛ میرے جوہر کا کمال (بس) راکھ ہے۔

ہر شخص میرے سر پر پاؤں رکھتا ہے؛ ہر شخص میری متاع حیات کو چنگاری ڈال کر جلا دیتا ہے۔

میری حالت ایسی ہے جس پر رویا جائے ؛ کیا تو نے کبھی غور کیا کہ میرے وجود کی حقیقت کو جلا دیتا ہے۔

میں دھوئیں کی ایک لہر ہوں جس کے اجزا آپس میں پیوستہ ہیں اور جس کا سرمایہ ایک اڑتی ہوئی چنگاری ہے۔

تیرا چہرہ اور تیرے خصائل ستاروں جیسے ہیں ؛ تیرے ہر پہلو سے جلوے اٹھتے ہیں۔

کبھی تو پادشاہ کی آنکھ کا نور بن جاتا ہے اور کبھی خنجر کے دستے کی زیبائش ۔

الماس نے کہا اے نکتہ بیں ساتھی! (بات یہ ہے کہ) تاریک مٹی پختگی سے نگینہ بن جاتی ہے۔

جب وہ مٹی اپنے ارد گرد سے متصادم ہوتی ہے تو اس جنگ سے پتھر کی مانند پختہ ہو جاتی ہے۔

میرا وجود بھی پختگی سے ہی نورانی ہو گیا ہے؛ اور میرا سینہ جلوں سے معمور ہو گیا ہے۔

تو اپنے خام وجود کے باعث ذلیل و خوار ہوا ہے؛ اور اپنے بدن کی نرمی کے سبب جلتا ہے۔

خوف و غم اور وسواس سے فارغ ہو جا؛ پتھر کی مانند پختہ ہو کر الماس بن جا (خوف، حزن اور وسواس انسان کو کمزور بناتے ہیں)۔

جو کوئی سخت کوش اور سخت گیر ہے اس سے دوروں جہان روشن ہو جاتے ہیں۔

سنگ اسود جس نے بیت اللہ شریف کی جیب سے باہر سر نکالا ہوا ہے، اس کی اصل بھی ایک مشت خاک ہے۔

اس کا مرتبہ طور سے بھی بڑھ کر ہو گیا ہے؛ سب کالے گورے انسان اسے بوسہ دیتے ہیں۔

زندگی کی آبرو پختگی اور محکمی سے ہے؛ کمزوری اور بے چارگی ناپختگی ہی کا نام ہے۔