آپ کائنات میں بمنزلہ جان ہیں؛ ہماری جان ہوتے ہوئے ہم سے گریز کرتے ہیں۔

ندگی کا ساز آپ کے فیض سے نغمہ زن ہے؛ آپ کی راہ میں جو موت آئے اسی پر زندگی بھی رشک کرتی ہے۔

ہمارے سینوں میں پھر سے آباد ہو کر ناخوش دلوں کی تسکین کا باعث بنیئے۔

ہم سے پھر ننگ و نام کی قربانی طلب کیجئے اور اس طرح ہم جیسے ناپختہ عاشقوں کو پختہ تر بنا دیجئیے ۔

ہمیں اپنے مقدر سے شکوہ ہے؛ آپ کی قیمت بہت بالا ہے اور ہم مفلس ہیں۔

ہم مفلسوں سے اپنا خوبصورت چہرہ نہ چھپائیے ؛ سلمان و بلال (رضی اللہ) کا عشق ہمیں ارزاں فرمائیے۔

راتوں کو بیدار رہنے والی آنکھ اور بے قرار دل عطا فرمائیے ؛ ہمیں دوبارہ فطرت سیماب عطا فرمائیے۔

اپنی روشن آیات میں سے کوئی آیت دیکھائیے تاکہ دشمنوں کی گردنیں جھک جائیں۔

اس تنکے کو آتش فشاں پہاڑ بنا دیجئیے ؛ اور ہماری آگ سے غیر اللہ کو جلا دیجئے۔

امت مسلمہ نے جب اللہ تعالے سے تعلق توڑ لیا، تو ہمارے کاموں میں سینکڑوں گرہیں پڑ گئیں۔

(اس وقت) ہم دنیا میں ستاروں کی طرح بکھرے ہوئے ہیں؛ ایک دوسرے کے ہمدم بھی ہیں، ایک دوسرے سے بیگانہ بھی۔

ان اوراق کی دوبارہ شیرازہ بندی کر دیں ؛ ہمارے اندر باہمی محبت کا دستور از سر نو رائج کر دیں۔

ہمیں پھر اسی خدمت (اشاعت اسلام) پر معمور فرمائیے؛ اپنا کام اپنے عاشقوں کے سپرد فرمائیے۔

راہروان راہ حق کو رضا کی منزل عطا فرمائیے؛ ہمیں حضرت ابراہیم (علیہ) کے ایمان کی قوّت عطا فرمائیے۔

عشق کو لا کے شغل اور الااللہ کی رمز سے آگاہ فرمائیے۔

میں جو شمع کی مانند دوسروں کے لیے جل رہا ہوں ؛ اور اپنی بزم کو گریہ (احساس زیاں) سکھاتا ہوں۔

اے اللہ مجھے وہ آنسو عطا فرمایے جو دل کو روشن، بے قرار، مضطر اور بے چین رکھیں۔

میں ان آنسوؤں کو باغ میں بوؤں اور ان سے ایسی آگ پیدا ہو جو قبائے لالہ کو بھی مات کر دے۔

میرا دل ماضی میں اٹکا ہوا ہے اور میری آنکھ مشعل پر مرکوز ہے؛ میں انجمن میں ہوتے ہوئے بھی تنہا ہوں۔ [Meyra dil mazi mein attka hoa hai aur meyri aankhh masha’al per markooz hai; mien anjuman mein hotay hoay bhi tunha h’on.]

ہر کوئی اپنے آپ کو میرا دوست گمان کرتا لیکن اب کوئی بھی میرے دل کے رازوں سے واقف نہیں ہوا۔

اے اللہ اس جہاں میں میرا ہمدم کہاں ہے؛ میں درخت طور ہوں میرا کلیم کہاں ہے۔

میں ظالم ہوں میں نے اپنے اوپر بہت ظلم کیے ہیں؛ (سب سے بڑا ظلم یہ کیا) کہ اپنی بغل میں خود شعلے کی پرورش کی۔

ایسا شعلہ جو ہوش کے سامان کو غارت کر دیتا ہے؛ اس نے ہوش کے دامن میں آگ لگا دی ہے۔

اس نے عقل کو دیوانگی سکھائی ہے اور علم کی ہستی کو فنا کر دیا ہے۔

اس کے سوز سے آفتاب آسمان کی بلندی تک پہنچا ہے ؛ اور بجلیاں ہمیشہ میرے اس شعلے کے طواف میں رہتی ہے۔

میں شبنم کی مانند سر تا پا دیدہ ء گریاں ہوا تب کہیں جا کر اس آتش پوشیدہ کا امانت دار بنا۔

میں نے شمع کو عیانا جلنا سکھایا مگر خود دنیا کی آنکھ سے چھپ کر جلتا رہا۔

یہاں تک کہ میرے ہر بن و مو سے شعلے پھوٹنے لگے؛ اور میرے فکر کی رگ رگ سے آگ ٹپکنے لگی۔

میرے عندلیب نے آگ کے شراروں کو دانوں کی مانند چن لیا اور ایک آتشیں نغمہ تخلیق کیا۔

مگر اس دور کے لوگوں کے سینے خالی ہیں؛ مجنوں تڑپ رہا ہے کہ محمل خالی پڑا ہے۔

شمع کے لیے تنہا جلنا آسان نہیں ؛ افسوس اس بات پر ہے کہ میرے پروانوں میں کوئی ایک بھی (پروانگی کی) اہلیت نہیں رکھتا۔

میں کب تک غمگسار کا انتظار اور رازدار کی جستجو کرتا رہوں۔

آپ کے چہرہ مبارک سے چاند اور ستارے روشنی پاتے ہیں؛ میری جان سے اپنی آگ واپس لے لیں۔

میرے سینے سے یہ امانت واپس لے لیجیئے ؛ میرے آئینے سے جوہر کا خار (جو میرے سینے میں کھٹک رہا ہے) نکال دیجئے ۔

یا مجھے اسلاف جیسا ایک رفیق عطا ہو؛ جو میرے عشق عالم سوز کے لیے آئینے کا کام دے۔

سمندر موج موج کے پہلو میں ہے؛ موج کی فطرت اپنی ساتھی موج کے ساتھ مل کر متلاطم ہونا ہے۔

آسمان پر ستارہ ستارے کا ساتھی ہے؛ چمکتے ہوئے چاند نے رات کے زانو پر سر رکھا ہوا ہے۔

دن تاریک رات کے پہلو میں رہتا ہے؛ اور آ ج اپنے آپ کو آنے والے کل سے پیوست رکھتا ہے۔

ندی کا وجود ندی میں گم ہو جاتا ہے ؛ خوشبو ہوا کی موج سے مل جاتی ہے۔

ویرانے کے ہر گوشے میں رقص نظر آتا ہے؛ دیوانہ بھی دیوانے کے ساتھ رقص کر رہا ہے۔

اگرچہ اے اللہ! آپ اپنی ذات میں یکتا ہیں، پھر بھی آپ نے اپنے لیے کائنات کو آراستہ فرمایا ہے۔

مگر میں لالہء صحرا کی مانند محفل کے اندر بھی تنہا ہوں۔

میں آپ کے کرم سے ایک ایسے غمگسار دوست کا خواہاں ہوں جو میری فطرت کے رموز کا محرم ہو۔

ایسا دوست جو دیوانہ بھی ہو اور فرزانہ بھی؛ اور دنیا کے نفع و ضرر سے بلند تر ہو۔

تاکہ میں اپنا جنوں اس کے سپرد کر دوں ؛ اور پھر اس کے دل کے آئینے میں اپنا چہرہ دیکھوں۔

تاکہ میں اپنی خاک سے اس کا پبکر تراشوں؛ میں اس کا بت بھی (ائیڈیل) بناؤں اور آزر (بت تراش) بھی۔