اگر میں عشق کی بات کرتا ہوں تو مجھے اس سے انکار نہیں کرنا چاہئے ؛ اگر میں اس نشے سے خالی ہوں تو کسی اور میں ضرور ہو گا۔

اے وہ امت جسے حق تعالے نے خاتم اقوام بنایا ہے؛ اور جس پر اپنی ہر ابتدا کی انتہا کر دی ہے۔

تیرے نیک لوگ گذشتہ انبیا (علیہ) کی مانند ہیں ؛ تیرے جگر چاک دلوں کو جوڑنے والے ہیں۔

اے امت مسلمہ ! تو نے اہل کلیسا کے حسن (علوم) پر نظر رکھی ہوئی ہے؛ اور تو راہ کعبہ سے دور جا پڑی ہے۔

آسمان تیرے کوچے کی مشت غبار ہے؛ ساری دنیا تیرے چہرے پر مفتوں ہے۔

تو موج کی طرح اپنے آپ سے تیزی سے بھاگ رہی ہے؛ تو کسے دیکھنے کے لیے جا رہی ہے۔

پروانے سے جلنے کی رمز سیکھ؛ اور (اس کی طرح) شرر میں کاشانہ تعمیر کر۔

اپنی جان کے اندر عشق کی بنیاد رکھ؛ حضور (صلعم) سے اپنا پیام محبت از سر نو استوار کر۔

جب سے تیرے حسین چہرے پر سے نقاب اٹھا ہے؛ میں اہل یورپ کی صحبت سے دل گرفتہ ہو گیا ہوں۔

میرے ہمنواؤں نے غیروں کے حسن اور ان کے گیسو و رخسار کی داستانیں سنائیں۔

انہوں نے ساقی (مغرب) کے دروازے پر جبہ سائی کی؛ اور وہاں کے مغ زادوں کے قصّے سنائے۔

مگر اے امت مسلمہ میں تیری تیغ آبرو کا شہید ہوں ؛ خاک ہوتے ہوئے میں نے تیری گلی میں سکوں پایا۔

میں قصیدہ گوئی سے بالا تر ہوں؛ ہر محل کے سامنے سر نہیں جھکتا۔

شاعری میری آئینہ سازی ہے؛ اور مجھے (آئینہ) سکندر سے بے نیاز کر دیتا ہے۔

میری گردن کسی کے احسان کا بوجھ نہیں اٹھا سکتی؛ میں گلستان کے اندر غنچہ کی مانند اپنے آپ کو رکھے ہوئے ہوں۔

میں دنیا میں خنجر کی مانند سخت کوش؛ پتھر سے اپنی آب و تاب حاصل کرتا ہوں۔

اگرچہ میں سمندر ہوں مگر میری موج بے قرار نہیں؛ میری ہتھیلی پر بھنور کا کاسہ نہیں۔

میں پردہ رنگ ہوں، خوشبو نہیں ہوں کہ نسیم کی ہر موج کا شکار بن جاؤں۔

میں زندگی کے شرر آباد میں ایک انگارہ ؛ میری خاکستر ہی میری خلعت ہے۔

اے ملّت اسلامیہ (مجھ جیسا خود دار بھی) تیرے دروازے پر نیاز مندانہ ہدیہء سوز و گداز لایا ہے۔

نیلے آسمان سے میرے گرم دل پر افکار موسلا دھار بارش کی مانند برس رہے ہیں۔

میں انہیں ندی سے بھی زیادہ باریک بنا کے تیرے صحن گلشن میں پیش کر رہا ہوں۔

چونکہ تو ہمارے دوست ( صلعم) کی محبوب ہے ؛ اس لیے تو ہمارے پہلو میں دل کی مانند ہے۔

جب سے عشق نے سینے میں آہ و فغاں کی بنیاد رکھی ہے؛ اس کی آگ نے میرے دل کو آئینہ بنا دیا ہے۔

میں اپنے سینے کو پھول کی طرح چیر کر ؛ اپنے دل کا آئینہ تمہارے سامنے رکھ رہا ہوں۔

تاکہ تو اپنے چہرے پر نگاہ ڈال سکے اور اپنی زلف کی اسیر ہو جائے۔

میں تیری پرانی داستاں پھر سے سناتا ہوں تا کہ تیرے سینے کے داغ تازہ ہو جائیں۔

میں نے اس قوم کے لیے جو اپنے آپ کو بھول چکی تھی؛ حق تعالے سے پائیدار زندگی کی درخواست کی۔

آدھی رات کے سکوت میں نالہ و فریاد کرتا تھا؛ دنیا خواب میں ہوتی اور میں گریاں ہوتا۔

میری جان صبر و سکون سے محروم تھی اور میرے لبوں پر یا حّی و یا قیوم کا ورد تھا۔

ملّت کی سربلندی کی جو آرزو میں رکھتا تھا اس نے میرا دل خون کر دیا؛ اور وہ (اشکوں کی صورت میں ) میری آنکھوں سے بہہ نکلا۔

میں لالہ کی مانند کب تک مسلسل جلتا رہوں اور کب تک صبح سے شبنم کی بھیک مانگتا رہوں۔

میں شمع کی مانند اپنے آنسو اپنے آپ پر ہی گرا رہا ہوں؛ (اور اس طرح) اکیلا ہی تاریکی سے نبرد آزما ہوں۔

(میں نے شمع کی مانند) روشنی میں اضافہ کیا ؛ خود گھلتا رہا اور دوسروں کے لیے محفل آراستہ کی۔

مجھے سینے کی تپش سے ایک لمحہ کی بھی فرصت نہیں؛ میرے ہفتے میں روز جمعہ (چھٹی ‏ کا دن ) نہیں ہے۔

میرے کہنہ بدن کے اندر جان گویا ایک گرد آلود آہ کا جلوہ ہے۔

حق تعالے نے جب صبح ازل مجھے تخلیق فرمایا تو میرے عود کے ریشمی تاروں میں نالے تڑپنے لگے۔

ایسے نالے جو عشق کے راز کھولنے والے تھے اور جنہیں عشق کی حسرت گفتار کا خون بہا کہنا چاہئے۔(عشق چاہتا ہے کہ اپنے راز خود افشا کرے مگر کر نہیں سکتا؛ اس کی اس خواہش کی موت کا خون بہا اقبال (رحمتہ) کے نالے ہیں جن کے ذریعے انہوں نے عشق کے راز افشا کر دیئے۔

میرا نالہ خس و خاشاک کو آگ کی فطرت عطا کرتا ہے اور خاک کو شوخیء پروانہ دیتا ہے۔

عشق کے لیے گل لالہ کی طرح کا داغ ہے؛ میرے ایک ہی نالے کے پھول سے اس کا دامن بھر جاتا ہے۔

اے ملّت اسلامیہ ! میں ہی ایک پھول تیری دستار میں آویزاں کرتا ہوں اور اس کے ذریعے تیری گہری خواب میں محشر بپا کرتا ہوں۔

تاکہ تیری خاک سے لالہ زار کھل اٹھے؛ اور تیرا دم باد بہار بن جائے۔