فرد کے لیے جماعت سے ربط رکھنا باعث رحمت ہے؛ ملّت کے اندر رہ کر ہی اس کا جوہر کمال حاصل کرتا ہے۔

جہاں تک ہو سکے جماعت کے ساتھ لگا رہ اور اس طرح ہنگامہء احرار کی رونق بن جا۔

حضور اکرم (صلعم) کے اس فرمودہ کو اپنی جان کے لیے تعویذ بنا لے؛ کہ شیطان جماعت سے دور رہتا ہے۔

فرد اور جماعت ایک دوسرے کے لیے آئینے کی مانند ہیں ؛ (افراد سے قوم بنتی ہے اور قوم کی روایات افراد میں جھلکتی ہیں) ان کی مثال دھاگے اور موتی اور کہکشاں اور ستارے کی مانند ہے۔

فرد کی توقیر ملّت سے ہے؛ اور ملّت کا نظام افراد پر مبنی ہے۔

جب فرد جماعت میں گم ہو جاتا ہے ؛ تو گویا وسعت کا متلاشی قطرہ دریا بن جاتا ہے۔

فرد اپنی ملّت کی قدیم روایات کا حامل ہوتا ہے؛ اس کے اندر ملّت کے ماضی اور مستقبل کا عکس دیکھا جا سکتا ہے۔

فرد کی ذات ملّت کے ماضی و مستقبل کا نقطہء اتصال ہے (ملّت ہی سے ) فرد کے اوقات ابد کی طرح لا ا نتہا ہو جاتے ہیں۔

ملّت ہی کی وجہ سے فرد کے دل میں اپنی قوّتوں کے اظہار کا جذبہ پیدا ہوتا ہے؛ فرد کی سرگرمیوں کا اندازہ ملّت ہی کے مقام سے لگایا جا سکتا ہے۔

قوم فرد کا پیکار بھی ہے اور اس کی جان بھی؛ قوم ہی اس کا ظاہر ہے اور قوم ہی اس کا باطن۔

فرد قوم ہی کی زبان سے بات کرتا ہے اور اسی کے ذریعے اسلاف کی راہ پر گامزن رہتا ہے۔

فرد ملّت میں مل کر اور زیادہ پختہ ہو جاتا ہے؛ گویا معنا فرد ملّت بن جاتا ہے۔

فرد کی وحدت ملّت کی کثرت سے استقامت پاتی ہے اور افراد کی کثرت ملّت کے ذریعے وحدت بن جاتی ہے۔

جیسے لفظ کو اگر شعر سے نکال دیا جائے تو اس کی جیب مضمون کا معنی ٹوٹ جاتی ہے یعنی وہ بے معنی ہو جاتا ہے۔

پتّہ اگر اپنے درخت سے گر جاتا ہے تو بہار کے موسم میں بھی اس کے سرسبز ہونے کی امید ختم ہو جاتی ہے۔

جب فرد ملّت کے چشمہ زمزم سے پانی نہیں پیتا اس کے ساز کے اندر نغموں کے شعلے افسردہ ہو جاتے ہیں۔

فرد اکیلا ہو تو وہ اعلی مقاصد سے غافل رہتا ہے اور اس کی قوّتیں رو بہ انحطاط ہو جاتی ہیں۔

قوم اسے ضبط سے متعارف کرتی ہے اور اسے صبا کی مانند ہولے ہولے چلتی ہے۔

قوم اسے شمشاد کی مانند مٹی کا پابند بناتی ہے ؛ اس کے ہاتھ پاؤں باندھتی ہے تاکہ اسے آزاد کرے۔

جب فرد اپنے آپ کو قانون کا پابند بناتا ہے تو اس کی رم خو فطرت میں خوشبو پیدا ہو جاتی ہے۔

تو نے خودی اور بے خودی میں فرق نہیں سمجھا ؛ اور اپنے آپ کو ظن و گمان میں ڈال دیا۔

خودی نور کا ایک جوہر ہے جو تیرے بدن کے اندر موجود ہے؛ تیرے فہم و ادراک کی روشنی خودی کی ایک شعاع ہے۔

تیرا عیش خودی کے عیش سے اور تیرا غم خودی کے غم سے وابستہ ہے؛ تیری زندگی کا دار و مدار اس کے ہر لحظہ انقلاب پر موقوف ہے۔

خودی واحد ہے، وہ دوئی کی تاب نہیں رکھتی؛ اسی کی تاب و تواں سے میں، میں ہوں اور تو، تو ہے۔

اپنی حفاظت اپنی اظہار، اور اپنی تعمیر اس کی صفت ہیں؛ اس کی نیاز مندی میں سینکڑوں ناز پرورش پاتے ہیں۔

اس کے سوز سے آگ بلند ہوتی ہے؛ خودی کا شرر شعلے پر کمند ڈالتا ہے۔

اس کی فطرت آزاد ہے اور مقیّد بھی؛ اس جزو میں کل (کائنات) پر قابو پا لینے کی قوّت ہے۔

میں نے اسے مسلسل جدو جہد میں دیکھا ہے؛ میں اسے خودی بھی کہتا ہوں اور زندگی بھی۔

جب یہ خودی خلوت سے باہر نکلتی ہے اور ہنگامہء جلوت میں قدم رکھتی ہے۔

اس کے دل کے اندر ملّت کا نقش بیٹھ جاتا ہے؛ اس کے مقاصد میں اس کی ذات کی جگہ ملّت لے لیتی ہے۔

(ملّت کے مفادات کا) جبر اس کے اختیارات صلب کر لیتا ہے؛ اور اسے ملّی محبت سے سرشار کر دیتا ہے۔

جب تک ناز ناز ہے اس سے نیازمندی پیدا نہیں ہوتی؛ نیازمندی اسی صورت میں پیدا ہوتی ہے جب بہت سے ناز آپس میں موافقت ( ایک دوسرے کے لیے ایثار) پیدا کریں۔

جماعت کے اندر خودی خود شکنی (جماعت کے ساتھ مطابقت پیدا کرنا) کر لیتی ہے؛ اور اس طرح پھول کی پتّی سے پورا چمن بن جاتی ہے۔

میرے کلام کے نکات تلوار کی مانند ہیں ؛ اگر تو نہیں سمجھ سکتا تو یہاں سے چلا جا۔