انسانوں کا باہمی ربط کس طرح وجود میں آیا ؛ اس کہانی کا آغاز معلوم نہیں۔

ہم جماعت میں (صرف) فرد کو دیکھتے ہیں ؛ اور اسے باغ سے پھول کی مانند چن لیتے ہیں۔

اس کی فطرت انفرادیت کی دلدادہ ہے؛ مگر اس کا تحفظ اجتماعیت سے ہے۔

شاہراہ حیات میں رزمگاہ ء زندگی کی آگ اس کی انفرادیت کو جلا دیتی ہے ( اجتماعیت کے ماتحت لے آتی ہے)۔

چنانچہ افراد ایک دوسرے سے مانوس ہو جاتے ہیں اور موتیوں کی طرح ایک لڑی میں پروئے جاتے ہیں۔

وہ زندگی کی کشمکش میں ہمدرد ساتھی بن جاتے ہیں اور ایک ہی پیشہ رکھنے والوں کی مانند ایک ہونے کا احساس پیدا کر لیتے ہیں۔

ستاروں کی محفل باہمی کشش سے قائم ہے؛ ہر ایک کے وجود کو دوسرے سے استحکام ملتا ہے۔

پہاڑ ، مرغزار، صحرا، ٹیلے سب کاروان (حیات) کی خیمہ گاہ ہیں۔

فرد کے کام کا تانا بانا ، کمزور اور بے جان تھا ؛ اس کے تصوّرات کی کلی کھلتی نہیں تھی (عزائم جلیلہ پورے نہیں ہوئے تھے)۔

فرد کا بجلیاں پیدا کرنے والا ساز بھی کوئی نوا نہیں پیدا کرتا تھا ؛ پردہء ساز میں اس کا نغمہ ترتیب نہیں پایا تھا (پردہ موسیقی کی اصطلاح ہے)۔

شوق جستجو نے اس کی گوشمالی نہیں کی تھی (اس کو عمل پر نہیں اکسایا تھا) اس کے ساز کے تار آرزو کے مضراب سے نا آشنا تھے۔

اوّلین محفل انسان کسی سر و سامان کے بغیر تھی؛ اس کی شراب (اتنی کم تھی) کہ اسے روئی کے ایک پنبہ میں جذب کیا جا سکتا تھا۔

اس کی خاک سے سبزے نے ابھی سر نکالا تھا؛ اس کے انگور کی رگ میں خون ابھی سرد تھا۔

اس کی سوچ جنّوں اور پریوں کے قصّوں تک محدود تھی؛ وہ اپنے اوہام سے ڈر کر بھاگتا تھا۔

اس کے ہنگاموں سے خالی وجود کا میدان ابھی تک تنگ تھا؛ اور اس کی سوچ ا بھی تک زیر لب بام (پست) تھی۔

اسے ہر وقت جان کا خطرہ لگا رہتا تھا؛ ذرا تیز ہوا چلتی تو اس کا بدن کانپنے لگتا۔

ابھی اس کی جان سخت محنت سے گھبراتی تھی؛ اس نے فطرت کے رازوں کو جاننے کی کبھی کوشش نہ کی تھی۔

جو کچھ زمین سے خود بخود پیدا ہوتا وہ اسے اٹھا لیتا؛ اور جو پھل درختوں سے گرتا اس پر گزارہ کر لیتا۔

یہاں تک کہ اللہ تعالے نے ایک صاحب دل (نبی) پیدا کیا؛ اس نے ایک حرف (فرد) سے دفتر (اللہ) لکھوا دیا۔

وہ ایک ایسا صاحب ساز ہوتا ہے جو اپنے نغمہ سے خاک (انسان) کو نئی زندگی عطا کر دیتا ہے۔

ذرہء ناچیز (فرد) اس سے روشنی پاتا ہے اور (زندگی کی) ہر متاع اس کی وجہ سے قدر و نئی قیمت پاتی ہے۔

وہ اپنی ایک پھونک سے سینکڑوں انسانوں کو زندہ کر دیتا ہے اور ایک ساغر سے پوری محفل کو سرشار کر دیتا ہے۔

اس کی نگاہ دوئی کو فنا کر دیتی ہے اور اس کے لب (افراد میں) یک رنگی کی جان پھونک دیتے ہیں۔

اس کی (وحی) کا رشتہ جس کا سرا آسمان سے ملتا ہے؛ ٹکڑوں میں بٹی ہوئی زندگی کو ایک لڑی میں پرو دیتا ہے۔

وہ لوگوں میں نیا زاویہء نگاہ پیدا کر دیتا ہے؛ اور اس طرح دشت و در کے اندر گلستاں پیدا کر دیتا ہے۔

اس کی تپش سے حرمل کی مانند ملّت شور و ہنگامہ کے ساتھ اٹھ کھڑی ہوتی ہے۔

وہ فرد کے دل میں ایک شرر ڈالتا ہے جس سے اس کا بدن سراپا شعلہ بن جاتا ہے۔

صاحب دل کا نقش پا مٹی کو صاحب نظر بنا دیتا ہے ؛ خاک کا ہر ذرّہ رشک طورسینا ہو جاتا ہے۔

وہ عقل عریاں کو لباس (عمل) عطا کرتا ہے؛ اور اس طرح اس ناچیز کو مالدار بنا دیتا ہے۔

وہ اس کے انگارے کو اپنے دامن سے ہوا دیتا ہے اور اس کے سونے سے سارا کھوٹ نکال دیتا ہے۔

وہ غلام کے پاؤں کی زنجیریں کھول دیتا ہے اور اسے آقاؤں کے پنجے سے رہائی دلاتا ہے۔

اسے بتاتا ہے کہ تو کسی کا غلام نہیں ؛ تو ان بے زبان بتوں سے کمتر نہیں۔

یہاں تک کہ وہ اسے ایک مقصد کی طرف کھینچتا ہے اور اسے شریعت کا پابند بناتا ہے۔

اسے از سر نو توحید کا سبق دیتا ہے اور اللہ تعالے سے نیازمندی ، رسوم و آداب سکھاتا ہے۔