جذبات و پیمائش کی اس دنیا میں عقل آوارہ پھر رہی تھی؛ توحید سے اسے منزل کی طرف رہنمائی حاصل ہوئی۔

ورنہ عقل کو منزل کہاں نصیب تھی؛ فہم کی کشتی کے لیے کوئی ساحل نہیں تھا۔

اہل حق توحید کی رمز کو خوب جانتے ہیں ؛ یہی راز میں "اتی الرحمن عبدا"ٔمضمر ہے۔

تیرے عقیدہ توحید کا امتحان عمل سے ہونا چاہئے تا کہ وہ تجھ پر تیری مخفی صلاحیتیں ظاہر کرے۔

دین، حکمت، شریعت سب توحید ہی سے ہیں؛ اسی سے (افراد و قوم ) میں زور، قوّت اور ثبات و استحکام پیدا ہوتا ہے۔

اس کا جلوہ عالموں کو حیرت میں مبتلا کر دیتا ہے اور عاشقوں کو عمل کی قدرت عطا کرتا ہے۔

اس کے سائے کے نیچے پست بلند ہو جاتے ہیں اور خاک اکسیر کی مانند قیمتی بن جاتی ہے۔

توحید کی قدرت بندے کو برگزیدہ بنا دیتی ہے؛ اور اسے نئی نوع میں تبدیل کر دیتی ہے۔

اس سے اللہ تعالے کی راہ میں بندے کی تگ و دو تیز ہو جاتی ہے؛ اور اس کی رگوں میں دوڑتا ہوا خون برق سے بھی زیادہ گرم ہو جاتا ہے۔

توحید سے بیم و شک ختم ہو جاتا ہے اور عمل زندہ ہوتا ہے؛ اور انسان کی نگاہ کائنات کے پوشیدہ راز دیکھنےلگتی ہے۔

جب 'عبدۂ' کا مقام محکم ہوتا ہے تو کشکول گدائی جام جم بن جاتا ہے۔

ملّت مسلمہ بدن ہے، اور توحید اس کی جان ہے؛ لاالہ ہمارے ساز کے سارے نغموں میں ہم آہنگی پیدا کرتا ہے۔

لاالہ ہمارے (روحانی ) اسرار کا سرمایہ ہے؛ اسی سے ہمارے افکار کی شیرازہ بندی ہے۔

جب یہ لفظ لب سے دل میں اتر جاتا ہے تو زندگی کی قوّت میں بے پناہ اضافہ کر دیتا ہے۔

اگر پتھر بھی اس کا نقش اپنا لے تو وہ دل بن جاتا ہے؛ اور اگر دل اس کی یاد سے سوز حاصل نہ کرے تو وہ مٹی کے برابر ہے۔

جب ہم نے اپنے دلوں میں توحید کی آگ روشن کی تو ایک ہی آہ نے امکانات کے خرمن کو جلا دیا۔(دور اوّل کے مسلمانوں نے چند ہی برسوں میں عمل کے میدان میں تا حد امکان کامیابیاں حاصل کر لیں۔)

توحید قلوب ملّت کی آب و تاب ہے؛ اسی کا سوز ان آئینوں میں گداز پیدا کرتا ہے۔

ہماری رگوں میں توحید کا شعلہ لالہ کی مانند (فروزاں) ہے؛ توحید کا نشان ہی ہمارا سر و سامان ہے۔

توحید کی برکت سے حبشی سرخ رنگ والوں کے برابر ہو جاتا ہے؛ اور فاروق و ابوذر (رحمتہ) کا رشتہ دار شمار ہونے لگتا ہے (حضرت بلال (رحمتہ) کی مثال سامنے ہے)۔

اپنایت اور غیریت کا مقام دل ہے؛ اکٹھے بیٹھ کر (مئے توحید ) پینے والوں میں شوق کی مستی برابری پیدا کر دیتی ہے۔

ملّت کا وجود دلوں کی یک رنگی سے ہے؛ یہ سینا ایک ہی جلوت (توحید ) سے روشن ہے۔

قوم کی سوچ ایک ہونی چاہئے اور اس کے رگ و ریشہ میں ایک ہی مقصود رچ جانا چاہئے۔

اس کی سرشت میں ایک ہی جذبہ ہونا چاہئے ؛ اور اس کی اچھائی اور برائی کا معیار بھی ایک ہی ہونا چاہئے۔

جب تک فکر کے ساز میں توحید کا سوز شامل نہ ہو ؛ اس قسم کا اندازفکر ممکن نہیں۔

ہم مسلمان ہیں اور حضرت خلیل اللہ (علیہ) کی اولاد ہیں؛ اگر دلیل چاہتا ہے تو 'ابیکم' (آیت 78:22) دیکھ لے۔

قومیں اپنی تقدیر وطن سے وابستہ کرتی ہیں ؛ یا نسب کو اپنی تعمیر کی بنیاد بناتی ہیں۔

ملّت کی اصل وطن میں دیکھنے کا کیا مطلب ؛ مٹی اور آب و ہوا پوجنے کے کیا معنی؟

نسب پر فخر کرنا نادانی ہے؛ نسب کا تعلق بدن سے ہے اور بدن فانی ہے۔

ہماری ملّت کی بنیاد اور ہے؛ اور یہ بنیاد ہمارے دلوں کے اندر نہاں ہے۔

ہم حاضر ہیں لیکن ہمارے دلوں کا تعلق غائب (اللہ) سے ہے؛ یہی وجہ ہے کہ ہم وطن اور نسب کے بندھنوں سے آزاد ہیں۔

ملّت اسلامیہ کا باہمی تعلق ستاروں کے تعلق کی مانند ہے؛ اور یہ تعلق نگاہ کی طرح ہماری نگاہ سے گم ہے۔

ہم ایک ہی ترکش کے تیز آہنی نوک والے تیر ہیں ؛ ہم ایک سے نظر آتے ہیں ، ہم ایک ہی طرح دیکھتے ہیں اور ایک ہی طرح سے سوچتے ہیں۔

ہمارا مدّعا بھی ایک ہے اور ہمارا مقصد بھی ایک ہے؛ ہماری سوچ بھی ایک ہے اور اس کے اظہار کا طریقہ بھی ایک جیسا ہے۔

یہ اللہ تعالے کی نعمت ہے ، کہ ہم آپس میں بھائی بھائی ہو گئے ؛ یک زبان، یک دل اور یک جان ہو گئے۔