میں اندھوں کی طرح اپنے ساتھی کے کندھے پر ہاتھ رکھے ؛ اس گہری غار کے اندر داخل ہوا۔

اس غار کی تاریکی سے چاند کا دل داغ داغ تھا ؛ اس کے اندر سورج کو بھی چراغ کی ضرورت پڑتی تھی۔

وہم و شک نے مجھ پر حملہ کیا اور میرے عقل و ہوش کو سولی پر لٹکا دیا۔

میں راہ پر چلتا گیا مگر (اس طرح کہ وہم و شک کے) راہزن میری گھات میں تھے اور میرا دل عشق و یقین کی لذت سے خالی تھا۔

یہاں تک کہ میری نگاہ پر جلوے آشکار ہوئے اور آفتاب طلوع ہوئے بغیر ہی صبح روشن کا سماں بندھ گیا۔

میں نے (اس روشنی میں) ایک ایسی وادی دیکھی جس کا ہر پتھر دیو آسا بلند درختوں کے زنّار باندھے تھا۔

(میں سوچنے لگا کہ) یہ مقام (جہان) آب و خاک کی سی سرشت رکھتا ہے؛ یا میرا تخیّل ننید میں یہ سب نقوش دیکھ رہا ہے۔

اس کی ہوا میں شراب کا لطف و سرور تھا؛ سایہ اس کی خاک پر پڑ کے عین نور ہو جاتا تھا۔

نہ اس کی زمین کے اوپر لاجوردی آسمان تھا ؛ نہ اس کے کنارے شفق سے سرخ و زرد تھے۔

وہاں نور ظلمت میں گرفتار نہ تھا؛ نہ وہاں صبح و شام کا جھٹپٹا تھا۔

درخت کے نیچے ایک ہندی رشی بیٹھا تھا ؛ اس کی آنکھیں سرمہ سے روشن تھیں۔

اس نے اپنے بال سر پر باندھ رکھے تھے، اس کا بدن عریاں تھا؛ اور اس کے گرد ایک سفید سانپ حلقہ ڈالے تھا۔

وہ آب و گل سے بالا انسان تھا اور اس کے تخیّل کے بتکدہ نے جہان کو پیکار کی صورت دی تھی۔

اس کے وقت میں گردش ایّام کا گزر نہ تھا ؛ چرخ نیلی فام سے اس کا کوئی سروکار نہ تھا۔

اس نے رومی سے پوچھا : تیرے ساتھ یہ کون ہے؟ مجھے اس کی نگاہ میں زندگی کی آرزو نظر آتی ہے!

یہ ایسا شخص ہے جو جستجو میں آوارہ پھر رہا ہے؛ یہ گویا ایک ستارہ (ثابت) ہے جس کی فطرت سیارے کی سی ہے۔

اس کی خامیوں ہی نے اس کے کام کو پختہ تر بنایا ہے؛ میں اس کی ناتمامی پر جان دیتا ہوں۔

اس نے اپنی صراحی کے لیے آسمان کو طاق بنایا ہے؛ اس کا فکر جبریل سے تصدیق چاہتا ہے۔

یہ مہر و ماہ کے شکار کے لیے عقاب کی طرح جھپٹتا ہے؛ اور نو آسمانوں کے طواف میں سرگرم رہتا ہے۔

اس نے اہل زمین سے رندانہ گفتگو کی ہے؛ حور و جنت کو بتخانہ کہا ہے۔

میں نے اس کے دھوئیں کی موج میں شعلے دیکھے ہیں اور اس کے سجدوں میں عظمت دیکھی ہے۔

یہ ہر لمحہ شوق سے بانسری کی طرح نالاں رہتا ہے؛ اسے نہ فراق راس ہے نہ وصال۔

میں نہیں جانتا کہ اس کی سرشت میں کیا ہے؛ نہ مجھے اس کے مقام و منزل کا پتہ چلتا ہے۔

عالم رنگ سے ہے، اور حق تعالے بے رنگ ہیں؛ عالم کیا ہے؟ حق تعالے کیا (شان رکھتے ) ہیں؟

آدمی شمشیر ہے اور حق تعالے شمشیر زن ؛ دنیا اس شمشیر کے لیے پتھر کا سان ہے۔

مشرق نے اللہ تعالے کی معرفت حاصل کی مگر دنیا کی طرف توجہ نہ دی؛ مغرب دنیا میں رینگتا رہا، اور حق تعالے سے کٹ گیا۔

بندگی یہ ہے کہ نگاہ اللہ تعالے پر مرکوز ہے؛ زندگی یہ ہے کہ انسان اپنے آپ کو بے پردہ دیکھے۔

جب بندہ زندگی سے حصّہ حاصل کرتا ہے (اپنے آپ کو بے پردہ دیکھتا ہے)؛ تو ایسے بندے پر اللہ تعالے بھی صلوۃ و سلام بھیجتے ہیں۔

جو شخص اپنی تقدیر (خوابیدہ قوّتوں ) سے آگاہ نہیں؛ اس کا بدن اس کی جان کے سوز کا ساتھ نہیں دیتا (وہ اپنی صلاحیتوں کو بروئے کار نہیں لا سکتا ہے)۔

مشرق وجود و عدم کی باتوں میں منہمک رہتا ہے؛ مگر وہ ان رازوں کو پا نہیں سکا۔

ہم افلاکیوں کا کام صرف دیکھنا ہے؛ میں مشرق کے مستقبل سے نا امید نہیں۔

کل میں نے قشمرود پہاڑ کی بلندی پر (کھڑے) دیکھا کہ آسمان سے ایک فرشتہ نیچے اترا۔

اس کی نگاہ سے ذوق دیدار ٹپکتا تھا؛ وہ ہماری دنیا کے علاوہ اور کسی طرف دیکھتا ہی نہیں تھا۔

میں نے اس سے کہا اپنوں سے راز نہ چھپا؛ تجھے خاموش خاک میں کیا نظر آتا ہے۔

کیا تو زہرہ کی خوبصورتی سے متاثر ہے؟ یا تو نے چاہ بابل میں دل لگایا ہے۔

کہنے لگا: 'مشرق کے پہلو سے ایک نئے آفتاب کے طلوع کا وقت آ گیا ہے۔

اہل مشرق (کے) راستے کے پتھر وں سے لعل نکلیں گے؛ اس کے یوسف کنوئیں سے باہر آئیں گے۔

میں نے اس کے پہلو سے ہنگامے اٹھتے اور اس کے پہاڑوں میں زلزلے دیکھے ہیں۔

اس نے مقام آذری کو خیر باد کہہ دیا ہے؛ تاکہ وہ بتگری چھوڑنے کا عادی ہو جائے۔

مبارک ہے وہ قوم جس کی جان میں تڑپ پیدا ہو جائے؛ اور وہ مٹی سے اپنے آپ کو از سر نو پیدا کرے۔

فرشتوں کے لیے وہ گھڑی صبح عید ہے جب کسی قوم کی آنکھ بیدار ہوتی ہے۔

ہندی رشی کچھ دیر کے لیے خاموش ہو گیا؛ پھر اس نے میری طرف دیکھا اور بے تابانہ دیکھا۔

پوچھا، عقل کی موت؟ میں نے کہا غور و فکر چھوڑ دینا۔پوچھا قلب کی موت؟ میں نے کہا ذکر ترک کر دینا۔

پوچھا تن؟ میں نے کہا گرد راہ سے پیدا ہوا ہے۔پوچھا روح؟ میں نے کہا لاالہ کی ایک رمز ہے۔

پوچھا آدم ؟ میں نے کہا اللہ تعالے کے اسرار میں سے ایک سر ہے۔پوچھا عالم ؟ میں نے کہا وہ خود سامنے ہے۔

وچھا یہ علم و ہنر ؟ میں نے کہا محض چھلکا ہے۔پوچھا کہ (حق تعالے کے) وجود پر حجت کیا ہے؟ میں نے کہا دوست کا چہرہ۔(قرآن پاک میں ارشاد ہے پس جس طرف بھی تم مونہہ کرو وہیں اللہ تعالے کا چہرہ ہے)۔(115:2)

پوچھا عارفوں کا دین؟ میں نے کہا عین الحق۔پوچھا عامیوں کا دین؟ شنید (سنی سنائی بات)۔

میرے کلام سے اس کی لذت جان میں اضافہ ہوا اور اس نے مجھ پر چند دلنشین نکات واضع کیئے۔