مجھے ڈر ہے کہ تو سراب ہی میں کشتی کھیتا رہے گا؛ تو حجاب ہی میں پیدا ہوا اور حجاب ہی میں مر جائے گا۔

جب میں نے اپنی آنکھوں سے رازی (کی تفسیر) کا سرمہ دھو ڈالا تو مجھے قرآن پاک کے اندر قوموں کی تقدیر (کے راز) نظر آئے۔

کھیتی اور باغ پر گر، کوہ و بیاباں پر گر؛ جو برق اپنے آپ سے لپٹی رہتی ہے، وہ بادل ہی ميں مر جاتی ہے۔

میں اہل مغرب میں رہا، بہت جستجو کی؛ مگر ایسا مرد نہ دیکھا جس کے مقامات بے حساب ہوں۔

دنیا کی حکومت کے لیے تڑپ کے بغیر وہ قرب (الہی) میّسر نہیں ( جو مومن کی شان ہے)؛ 'اے بو گلاب اندر' پر اکتفا کرنے والے گلشن کو اپنے اندر سمو لے۔

اے ظاہر بیں زاہد! مانا کہ خودی فانی ہے؛ لیکن وہ طوفان نہیں دیکھتا جو اس بلبلے کے اندر ہے۔

یہ دل آویز آواز مطرب کے زخمہ سے پیدا نہیں ہو رہی؛ یہ تو جنت سے بچھڑی ہوئی ایک حور ہے، جو رباب کے اندر نالہ و فریاد کر رہی ہے۔