رومی جو عشق و محبت کا رہنما ہے؛ جس کا کلام پیاسوں کے لیے سلسبیل (جنت کا چشمہ) ہے۔

اس نے کہا جس شعر میں سوز ہے، اس کا اصل اللہ ہو کی حرارت سے ہے۔

ایسا شعر خس و خاشاک کو گلشن بنا دیتا ؛ اور افلاک کو درہم برہم کر دیتا ہے۔

ایسا شعر صداقت پر گواہی دیتا ہے، اور فقیروں کو پادشاہی عطا کرتا ہے۔

اس سے بدن کے اندر خون کی گردش تیز تر ہو جاتی ہے اور قلب روح الامین سے زیادہ بیدار ہو جاتا ہے۔

لیکن بہت سے شعر صرف ہنر کے جادو سے قلب کے رہزن اور نظر کے ابلیس بن جاتے ہیں۔

ہندی شاعر اللہ تعالے اسے ہدایت دے؛ اس کی روح لذت گفتار کے بغیر ہے۔

اس نے عشق کو راگ و رنگ اور خلیلوں کو آذری سکھا دی ہے۔

اس کے الفاظ مترنم ہیں لیکن سوز و درد سے خالی؛ اہل دل اسے مرد نہیں بلکہ نامرد سمجھتے ہیں۔

اس پسندیدہ آواز سے جو راگ کے زیر و بم سے بے بہرہ ہے، نیند میں بڑبڑانا بہتر ہے۔

شاعر کی فطرت سراپا جستجو ہے؛ وہ آرزو کا خالق بھی ہے اور اس کی پرورش کرنے والا بھی۔

شاعر قوم کے سینے میں دل کی مانند ہے؛ شاعر کے بغیر ملّت محض مٹی کا انبار ہے۔

سوز و مستی نئے عالم کے نقوش مرتّب کرتی ہے؛ سوز و مستی کے بغیر شاعری سوائے رونے دھونے کے اور کچھ نہیں۔

اگر شعر کا مقصد شخصیت کی تعمیر ہے؛ تو شاعری پیغمبری کی وارث ہے۔

میں نے کہا پیغمبری کے بارے میں فرمائیے ؛ اس محرم راز سے اس کا راز بیان کیجئیے۔

رومی نے کہا: 'قومیں اور ملتیں پیغمبری کی آیات میں سے ہیں؛ ہمارے زمانے پیغمبروں ہی کی تخلیق ہیں۔

اس کی پھونک سے کنکریاں بولنے لگتی ہیں؛ پیغمبری کھیت اور ہم اس کا حاصل ہیں۔

وہ ہڈیوں اور اعصاب کو پاکیزہ بنا دیتا ہے؛ اور فکر کو پرواز جبریل (علیہ) عطا کر دیتا ہے۔

وہ کائنات کے اندر ہنگامہ پیدا کرتا ہے، اس کی زبان سے نجم، نوراور نازعات جیسی سورتیں صادر ہوتی ہیں۔

پیغمبر (کی تعلیم کے) آفتاب کو زوال ہرگز نہیں ؛ جو شخص رسالت کا منکر ہے وہ کبھی اپنی تکمیل نہیں کر سکتا۔

اس کے متبعین کی صحبت اللہ تعالے کی رحمت کا سبب بنتی ہے؛ اور اس کے کرّار (حضرت علی رحمتہ ) کی ضرب اللہ تعالے کا قہر لاتی ہے۔

تو عقل کل بھی ہو پھر بھی پیغمبر سے دور نہ بھاگ کیونکہ وہ روح و بدن (دین و دنیا) کو اکٹھا رکھتا ہے۔

یرغمید کے راستے میں تیز تیز چل تاکہ تو قابل دید (نظارے) دیکھ سکے۔

سنگ قمر سے بنائی ہوئی دیوار پر چار طواسین نبوّت کندہ دیکھ۔

شوق بغیر راہبر کے راستہ دیکھ لیتا ہے؛ بال جبریل کے لیے شوق پرواز بن جاتا ہے۔

شوق کے لیے طویل سفر دو قدموں سے زیادہ نہیں ؛ مسافر شوق قیام سے تنگ آ جاتا ہے۔

میں یرغمید کی جانب مستانہ وار روانہ ہوا؛ یہاں تک کہ اس کی بلندیاں نظر آنے لگیں۔

میں اس مقام کی شان و شوکت کیا بیان کروں ؛ سات ستارے ہر وقت اس کے طواف میں رہتے تھے۔

اس کے نور سے اہل زمین روشن ضمیر تھے اور اس کی خاک کے سرمہ سے فرشتے بصیرت حاصل کرتے تھے۔

آلّہ تعالے نے مجھے آنکھ، دل اور طاقت گفتار اور عالم اسرار کی جستجو عطا فرمائی۔

میں اسرار کل سے پردے اٹھاتا ہوں اور تجھ سے رسولوں کے طواسین کی بات کرتا ہوں۔