پرانی شراب اور جوان معشوق کی کوئی اہمیت نہیں ؛ صاحب نظر حضرت کے سامنے جنت کی حور بھی کوئی چیز نہیں۔

ہر وہ شے جسے تو پائندہ سمجھتا ہے، گزر جانے والی ہے؛ کوہ و صحرا ہوں یا بحر و بر کسی کی کوئی حثیت نہیں۔

اہل مغرب کی دانش ہو یا اہل مشرق کا فلسفہ؛ سب بتکدے ہیں اور بتوں کے طواف سے کچھ حاصل نہیں۔

اپنی فکر کر اور اس ویرانے سے ڈرتے ہوئے نہ گزر؛ صرف تو باقی رہنے والا ہے، یہ دونوں جہان کوئی چیز نہیں۔

وہ راستہ جسے میں نے اپنی پلکوں کی نوک سے تراشا ہے؛ اس میں منزل، قافلہ یا ریگ رواں کوئی چیز نہیں۔

غیب کو چھوڑ کہ (یہ وہم و گمان ہے اور) وہم و گمان کوئی شے نہیں ؛ ہاں اس جہان میں بستے ہوئے اس سے آزاد رہنا، ضرور قابل قدر شے ہے۔

وہ بہشت جو اللہ تعالے نے مجھے عطا کی سب ہیچ ہے؛ ہاں، اگر جنت تیرے عمل کی جزا ہے، تو وہ ضرور کوئی چیز ہے۔

راحت جان کا خواہاں ہے؟ راحت جان کوئی چیز نہیں ؛ ہاں، اپنے ساتھیوں کے غم میں آنسو بہانا ضرور کوئی چیز ہے۔

مست آنکھوں، نگاہ غلط انداز اور (حسین) نغمہ؛ سب خوب ہیں، مگر ان سے خوب تر چیز بھی ہے۔

چہرے کا حسن ایک لمحہ ہے، دوسرے لمحہ نہیں ہے؛ (البتہ) حسن کردار اور بلند افکار ضرور اہمیت رکھتے ہیں۔

رقاصہ اس دل بیقرار کو کشمکش میں رہنے کی فرصت نہ دے؛ اپنے گیسوئے پیچیدہ میں ایک دو شکن کا اور اضافہ کر دے۔

تیری وجہ سے میرے سینے کے اندر وہ برق تجلّی ہے کہ میں نے مہ و مہر کو بھی تلخیء انتظار سے دو چار کر دیا ہے۔

ذوق دید نے رسم بتگری کی بنیاد رکھی؛ عشق اس طرح دید کے خواہشمند کو فریب دیتا ہے۔

مرغزار کے اس پرندے کو دوبارہ مرغزار عطا فرمائیے ؛ تاکہ وہ دل جمی سے نیا نغمہ پیش کر سکے۔

آپ نے مجھے طبع بلند عطا فرمائی ہے، میرے پاؤں کو زنجیر سے آزاد کر دیجئے تاکہ میں خلعت شہر یار کو آپ کے عطا کردہ بوریئے پر قربان کر سکوں۔

اگر تیشہ نے پتھر پر ضرب لگائی؛ تو یہ کوئی (قابل ذکر) بات نہیں؛ عشق تو سارا سلسلہء کوہ اپنے کندھوں پر اٹھائے جاتا ہے۔