اس مشت خاک (اقبال) نے اپنی تجلّیات کا نظارہ کرنے میں اپنے کام کو آگے بڑھایا۔

ایک وقت تھا کہ میں ہست و بود کے دام میں گرفتار تھا؛ اب یہ وقت ہے کہ ہست و بود میرے دامن میں اسیر ہیں۔

کیا میں نے اس نیلے آسمان کے پردے کو چاک کر دیا ہے؛ میں افلاک سے ہوں یا افلاک مجھ سے ہیں؟

یا فلک نے میرے ضمیر کو اپنے پہلو میں لے لیا ہے یا میرے ضمیر نے فلک کو اپنے اندر سما لیا ہے۔

اندرون سے یا بیرون یہ کیا ہے؟ جو کچھ نگاہ دیکھتی ہے، یہ کیا ہے، اور کیسے ہے؟

میں نے ایک اور آسمان کی طرف پرواز کی اور اپنے سامنے ایک نیا جہان دیکھا۔

اس عالم میں بھی پہاڑ، جنگل اور بحر و بر موجود تھے؛ مگر وہ ہماری زمین سے قدیم تر تھے۔

وہ عالم ایک چھوٹے سے بادل سے پیدا ہوا تھا؛ اور ابھی تک آدم کی دستبرد سے بچا ہوا تھا۔

اس کی لوح وجود پر نقش ابھی ثبت نہیں ہوئے تھے؛ وہاں کوئی شخص فطرت پر تنقید کرنے والا نہ تھا۔

میں نے رومی (رحمتہ اللہ) سے کہا یہ صحرا بہت خوش منظر ہے ؛ پہاڑوں میں دریا کا شور خوش آئیند ہے۔

میں یہاں زندگی کا کوئی نشان نہیں دیکھتا ؛ یہ آواز اذان کہاں سے آ رہی ہے۔

رومی (رحمتہ اللہ) نے کہا کہ یہ اولیا کا مقام ہے؛ یہ سر زمین بھی ہماری زمین سے آشنا ہے۔

آدم (علیہ) نے جب فردوس سے کوچ کیا تھا، تو وہ ایک دو دن یہاں بھی ٹھہرے تھے۔

اس فضا نے ان کی آہ کا سوز دیکھا ہے اور ان کے نالہ ہائے صبح گاہی سنے ہیں۔

اس مبارک مقام کے زائرین، بلند مرتبت پاک مرد ہیں۔

ایک طرف فضیل (رحمتہ اللہ)، ابو سعید (رحمتہ اللہ) جیسے پاکباز ہیں؛ اور دوسری طرف جنید و بایزید (رحمتہ اللہ) جیسے عارف۔

جلدی کر تاکہ ہمیں نماز مل جائے ؛ اور ہم ایک دو لمحے کے سوز و گداز سے بہرہ ور ہو جائیں۔

میں آگے بڑھا اور دو اشخاص کو قیام میں دیکھا ؛ تاتار مقتدی تھے اور افغانی امام۔

جو ہر لحظہ حضوری میں رہتے ہیں ؛ ذوق و سرور سے ان کا چہرہ چمک اٹھا۔پیر رومی (رحمتہ اللہ)

انہوں نے کہا، 'مشرق نے اس دور میں ان دو اشخاص سے انسان پیدا نہیں کیا؛ ان کی کاوش نے ہمارے بہت سے مسائل حل کر دیے۔

سید السادات جمال الدین افغانی جن کی گفتگو سے پتھر اور مٹی (جیسے ) لوگ زندہ ہو گئے۔

دوسرے ترک سالار حلیم پاشا جو صاحب درد تھے جن کا فکر ان کے مقام کی طرح بلند تھا۔

جیسے دو اشخاص کے ساتھ دو رکعت نماز ادا کرنا صحیح معنوں میں عبادت ہے؛ ورنہ یہ وہ کام ہے جس کی مزدوری جنت ہے۔

اس سحت کوش پیر مرد کی قرآت، سورہ والنجم، اور وہ خاموش دشت۔

وہ ایسی قرآت تھی جس سے خلیل اللہ (علیہ) اور جبریل امین (علیہ) کی پاک روح بھی وجد میں آ جائے۔

اس قرآت سے سینے کے اندر دل بیتاب ہو گیا؛ اور قبروں سے الا ﷲ کا شور اٹھ کھڑا ہوا۔

اس نے دھوئیں کو شعلے کا اضطراب عطا کیا وہ ایسی قرآت تھی جو داؤد (علیہ) کو بھی سوز و مستی عطا کر دے۔

ان کی قرآت سے سب پوشیدہ راز کھولتے تھے اور ام الکتاب کے پورے معنی ظاہر ہو جاتے تھے۔

کے ہاتھ پر بوسہ دیا۔نماز کے بعد میں اپنی جگہ سے اٹھا اور میں نے نیاز مندی سے افغانی (رحمتہ اللہ)

رومی (رحمتہ اللہ ) نے کہا یہ ایک ذرّہ ہے جو آسمانوں کے سفر میں ہے؛ اس کے دل میں سوز و درد کا ایک جہان آباد ہے۔

اس نے اپنے سوائے کسی اور پر نظر نہیں ڈالی ؛ یہ آزاد منش ہے، اس نے کسی کو اپنا دل نہیں دیا۔

یہ کائنات کی پنہائی کے اندر سیر میں سرگرم ہے؛ میں اسے شوخی سے زندہ رود کہتا ہوں۔

زندہ رود ہمارے خاکدان (دنیا) اور اس کے زمین و آسماں کے متعلق کچھ بتا۔

اگرچہ تو خاکی ہے مگر نوریوں کی طرح روشن بصر ؛ ہمیں مسلمانوں کے بارے میں کوئی خبر بتا۔

ملت اسلامیہ جس کا کام زمانے کے باطل اثرات کو مٹانا ہے ؛ اس کے ضمیر کے اندر میں دین و وطن کی کشمکش دیکھتا ہوں۔

ایمان کی کمزوری سے مسلمان کے بدن میں روح مر چکی ہے، اس لیے وہ دین مبین کی قوّت سے نا امید ہے۔

ترک ہو یا ایرانی یا عرب سب فرنگیوں کے افکار سے سرمست ہیں؛ ہر ایک کے گلے میں فرنگیوں کا پھندا پڑا ہوا ہے۔

مشرق اہل مغرب کی حکومت سے برباد ہو چکا ہے اور اشتراکیت نے دین و ملّت کی تاب و تواں ختم کر دی ہے۔