کتاب سرمایہ کا مصنف (یہودی کارل مارکس ) حضرت ابراہیم (علیہ) کی نسل سے ہے؛ یہ ایسا بے جبریل (جھوٹا پیغمبر ) ہے۔

کیونکہ اس کتاب میں حق و باطل کا آمیزہ ہے (اس لیے کہا جا سکتا ہے ) کہ اس کا قلب مومن ہے اور دماغ کافر ہے۔

اہل مغرب نے روحانیت کو گم کر دیا ہے؛ وہ جان پاک (روح) پیٹ میں تلاش کرتے ہیں۔

روح بدن سے رنگ و بو حاصل نہیں کرتی اور اشتراکیت کا تعلق صرف بدن سے ہے۔

اس پیغمبر حق ناشناس کے دین کی بنیاد مساوات شکم پر ہے۔

چونکہ اخوّت کا مقام دل کے اندر ہے؛ اس کا بیج دل میں ہے نہ کہ آب و گل (شکم) میں۔

سرمایہ داری بھی بدن کو فربہ کرتی ہے؛ اس کا سینہ ء بے نور بھی دل سے خالی ہے۔

شہد کی مکھی کی مانند پھول سے رس حاصل کرتی ہے؛ پتّوں کو چھوڑ دیتی ہے اور شہد لے لیتی ہے۔

پھول کی شاخ، پتّے، رنگ اور خوشبو اسی طرح رہتے ہیں ؛ اس کے حسن کے لیے بلبل بھی اسی طرح محو فغاں رہتی ہے۔

تو پھول کے رنگ و بو کے طلسم سے نکل؛ اس کی صورت کو چھوڑ اور معنی پر غور کر۔

اگرچہ پوشیدہ موت کو دیکھنا مشکل ہے مگر اس پھول کو پھول نہیں کہا جا سکتا وہ حقیقت میں مٹی ہے۔

اشتراکیت اور سرمایہ داری دونوں میں روح غیر مطمئن اور بے چین رہتی ہے ؛ دونوں حق تعالے سے ناشناس ہیں اور انسانوں کو فریب دیتے ہیں۔

اشتراکیت کے لیے زندگی بغاوت کا نام ہے؛ اور سرمایہ داری کا دار و مدار ٹکسوں پر ہے؛ اور چکی کے ان پاٹوں کے درمیان آدم شیشے کی طرح پس رہا ہے۔

یہ علم و مذہب اور آرٹ کے ذریعے توڑ پھوڑ کرتی ہے؛ وہ بدن سے جان اور ہاتھ سے نان چھین لیتی ہے۔

میں نے ان دونوں کے آب و گل (مادیت) میں غرق دیکھا ہے ؛ دونوں بدن چمکاتی ہیں اور دل کو تاریک کرتی ہیں۔

زندگی سوز و ساز سے عبارت ہے؛ یہ مٹی (بدن) کے اندر دل (روح) کا بیج بونا ہے۔