اہل مغرب کے لیے دانش ساز حیات ہے؛ اہل مشرق عشق کو کائنات کا راز سمجھتے ہیں۔

دانش عشق سے اللہ تعالے کی معرفت حاصل کرتی ہے اور عشق کے کام کی بنیاد دانش سے مستحکم ہوتی ہے۔

جب عشق دانش سے ہم پہلو ہوتا ہے تو وہ ایک اور جہان کا صورتگر بنتا ہے۔

اٹھ نئے جہان کا نقش ثبت کر؛ عشق کو زیرکی کے ساتھ ملا۔

افرنگیوں کا شعلہ بجھنے والا ہے؛ ان کی آنکھ صاحب نظر ہے مگر دل مردہ۔

وہ اپنی تلوار ہی سے زخم کھا کر اپنا ہی شکار ہو کر بسمل پڑے ہیں۔

فرنگیوں کے انگور سے سوز و مستی نہ ڈھونڈ؛ ان کے افلاک میں کوئی اور زمانہ نہیں۔

اب تمہاری آگ سے زندگی سوز و ساز پائے گی؛ نیا عالم تخلیق کرنا تمہارا کام ہے۔

مصطفے کمال جو تجدد کا راگ الاپتا ہے؛ اس نے کہا ہے کہ قدیم نقوش کو صاف کر دینا چاہیے۔

اگر افرنگ سے لات و منات (غلط نظریات کے بت) لے آئیں تو اس سے کعبے کی متاع حیات نئی نہیں ہو جاتی۔

جدید ترکی کے ساز میں کوئی نیا آہنگ نہیں ؛ اس کا جدید افرنگ کی پرانی (چیزیں ) ہیں۔

مصطفے کمال کے سینہ میں نیا سانس نہ تھا ؛ نہ اس کے ضمیر کے اندر کوئی نیا جہان تھا۔

چنانچہ اس نے موجودہ عالم کے ساتھ موافقت اختیار کر لی؛ اور اس کے سوز سے موم کی طرح پگھل گیا۔

کائنات کی بنیاد کے اندر نیا پن ہے؛ تقلید سے حیات کا استحکام نہیں۔

قلب زندہ نئے زمانے پیدا کرتا ہے؛ اس کی روح تقلید سے مر جاتی ہے۔

اگر تو مسلمانوں کا سا حوصلہ رکھتا تو اپنے ضمیر اور ‍ قرآن پاک پر نگاہ ڈال۔

اس کی آیات میں کئی تازہ جہان موجود ہیں؛ اس کے زمان میں بہت سے ادوار مضمر ہیں۔

عصر حاضر کے لیے قرآن پاک سے لیا گیا ایک جہان کافی ہے ؛ اگر تیرے سینے میں معنی رس دل ہے تو وہ جہان لے لے۔

بندہء مومن اللہ تعالے کی آیات میں سے ایک آیت ہے؛ اس کی قامت پر ہر جہان قبا کی طرح سج جاتا ہے۔

جب اس کے ایک جہان کی قبا پرانی ہو جاتی ہے تو قرآن پاک اسے نیا جہان عطا کر دیتا ہے۔

ہم خاکیوں کی کشتی بغیر ملاح کے ہے؛ کوئی نہیں جانتا کہ قرآن پاک کا جہان کہاں ہے۔

وہ جہان ابھی ہمارے سینے میں گم ہے؛ اور لفظ قم کے انتظار میں ہے۔

اس عالم میں نسل و رنگ کا امتیاز نہیں ہو گا؛ اس جہان کی شام دور فرنگ کی صبح سے زیادہ روشن ہو گا۔

وہ جہان بادشاہوں اور غلاموں کی طریق سے پاک ہوگا ؛ مومن کے قلب کی طرح وہ بھی بے کراں ہو گا۔

وہ اس قسم کا عالم رعنا ہو گا جس کا بیج جناب رسول پاک (صلعم) کی ایک نظر کے فیض نے سیدنا عمر فاروق (رضی اللہ) کی جان میں ڈال دیا۔

وہ جہان زوال نا پذیر ہو گا اور اس کے احوال اور اس کی محکمات کے برگ و بار ہر لحظہ تازہ بتازہ ہوں گے۔

اس کا باطن (بنیادی اصول) تغیّر ناپذیر ہو گا ؛ لیکن اس کے ظاہر میں ہر دم نئی تبدیلی ہو گی۔

وہ جہان تیرے اپنے اندر ہے اسے دیکھ؛ میں تمہیں اس کے محکمات کے متعلق بتاتا ہوں۔