دونوں جہانوں میں ہر جگہ عشق کے آثار ہیں ؛ آدم کا بیٹا عشق کے اسرار میں سے ایک راز ہے۔

سر عشق کا تعلق ماؤں کے رحم سے نہیں؛ نہ اس کی نسبت خاندان یا ملک سے ہے۔

وہ ایسا ستارہ ہے جس کا تعلق نہ مشرق سے نہ مغرب سے اور نہ وہ کبھی غروب ہوتا ہے اور نہ اس کے مدار میں شمال و جنوب ہے۔

اللہ تعالے کا ارشاد ہے کہ 'میں آدم کو زمین میں اپنا نائب بناتا ہوں' انسان کی تقدیر ہے اور زمین سے آسمان تک ہر شے کی تسخیر اس تقدیر کی تفسیر ہے۔

موت، قبر، حشر، نشر سب اس کے احوال ہیں؛ اسی کے اعمال جہان آخرت میں نور اور نار بنتے ہیں۔

وہ امام ہے وہی صلوۃ اور وہی حرم ؛ وہی سیاہی ہے، وہی لوح محفوظ اور وہی قلم۔

غیب آہستہ آہستہ اس کے لیے حضور بنتا ہے؛ نہ اس کی کوئ حدود ہیں، نہ اس کے ملک کی۔

اس کے وجود سے امکانات کا اندازہ ہوتا ہے؛ اس کی راست روی ممکنات کے لیے کسوٹی ہے۔

میں اس کے بے کراں سمندر کی کیا بات کروں اس کے دل کے اندر نئے ادوار پوشیدہ ہیں۔

عالم انسان میں سما جاتا ہے لیکن انسان عالم میں نہیں سماتا۔

آدم کی جلوت سے مہر و ماہ آشکار ہیں ؛ اور اس کی خلوت تک جبریل (علیہ) کی بھی رسائی نہیں۔

آدم کا مقام آسمان سے بھی بلند تر ہے؛ احترام آدم ہی تہذیب کی بنیاد ہے۔

اے زندہ دل، کیا تو جانتا ہے کہ زندگی کیا ہے؟ عشق یک بیں کثرت میں وحدت کا تماشا کرتا ہے۔

مرد و زن ایک دوسرے سے وابستہ ہیں؛ کائنات شوق کی نقشبندی کرتے ہیں۔

عورت نار حیات کی محافظ ہے، اس کی فطرت ایسی لوح ہے جس پر اسرار حیات رقم ہوتے ہیں۔

وہ ہماری آتش (شوق) کو اپنی جان میں سماتی ہے؛ چنانچہ اس کا جوہر خاک کو آدم بنا دیتا ہے۔

اس کے ضمیر کے اندر زندگی کے امکانات پوشیدہ ہیں ؛ اس کی تب و تاب سے زندگی ثبات پاتی ہے۔

وہ ایسا شعلہ ہے جس سے کئی شرر ٹوٹتے ہیں؛ اس کے سوز کے بغیر روح و بدن صورت پذیر نہیں ہوتے۔

ہماری توقیر اس کے وقار سے ہے، ہم سب اسی کی نقشبندی سے وجود میں آئے ہیں۔

اگر اللہ تعالے نے تجھے دیکھنے کی صلاحیت عطا فرمائی ہے تو پاکیزہ نگاہ سے اس کی قدسیت دیکھ۔

دور نو نے تیرے دین کی آب و تاب زائل کر دی ہے؛ میں تجھ پر پردے کے اسرار واضح کرتا ہوں۔

ذوق تخلیق بدن کے اندر آگ کی مانند ہے؛ اس کی روشنی سے انجمن روشن ہے۔

جو بھی اس آگ سے کوئی حصّہ رکھتا ہے ؛ وہ اپنے سوز و ساز کو محفوظ کر لیتا ہے۔

وہ ہر لمحہ اپنے نقش پر نگاہ مرکوز رکھتا ہے مبادا اس کی لوح کا نقش اختیار کر لے۔

جناب رسول پاک (صلعم) نے غار حرا میں خلوت اختیار فرمائی اور مدت تک اپنے سوا کسی اور کو نہ دیکھا۔

آپ (صلعم) کے قلب مبارک میں ہمارا نقش ڈالا گیا؛ آپ (صلعم) کی خلوت کے اندر سے ایک نئی ملت ابھری۔

اللہ تعالے سے انکار کیا جا سکتا ہے ؛ مگر حضور (صلعم) کی ذات شان سے انکار ممکن نہیں۔

خواہ تیرا قلب موسی (علیہ) کی طرح روشن کیو ں نہ ہو؛ خلوت کے بغیر تیرے افکار بانجھ رہیں گے۔

کم آمیزی سے قلب کے اندر زندگی، جستجو اور یافت بڑھتی ہے۔

علم اور شوق (عشق) دونوں زندگی کے مقامات میں سے ہیں ؛ ہر دو کا تعلق مشاہدات اور تجربات سے ہے۔

علم تحقیق سے لذت پاتا ہے اور عشق تخلیق سے۔

صاحب تحقیق کو جلوت پسند ہے اور صاحب تخلیق کو خلوت۔

موسی (علیہ) کی آنکھ ذات کے دیدار کی خواہاں ہوئی، یہ سب لذت تحقیق کا (کرشمہ) تھا۔

(تو مجھے ہرگز نہیں دیکھ سکتا ہے) گہرے معنی رکھتا ہے؛ ذرا اس بحر عمیق میں غوطہ لگا کے دیکھ۔لن ترانی

جہاں کہیں آثار حیات بے پردہ نظر آتے ہیں ؛ ان کا سرچشمہ ضمیر کائنات کے اندر ہے۔

پس تو ہنگامہ ء آفاق دیکھ اس کے خلّاق کو جلوت کی زحمت نہ دے۔

ہر نقش آفرین کی حفاظت خلوت سے ہے؛ خلوت ہی اس کی انگوٹھی کا نگینہ ہے۔