بندہء حق ہر مقام سے بے نیاز ہے؛ نہ وہ کسی کا غلام ہے نہ کوئ اس کا غلام۔

اس کی رسم و راہ اور دین و آئین سب اللہ تعالے کی طرف سے ہیں؛ اس کا محبوب و نا محبوب و تلخ و شیرین بھی اللہ تعالے کے احکام کے مطابق ہے۔

عقل خود بیں دوسرے کی خیر خواہی سے بے خبر ہے ؛ وہ صرف اپنا فائدہ دیکھتی ہے کسی اور کا فائدہ نہیں دیکھتی۔

حق تعالے کی وحی سب کا فائدہ پیش نظر رکھتی ہے ؛ اس کی نگاہ میں ہر ایک کی بہبود اور مفاد ہے۔

احکام وحی صلح و جنگ دونوں میں عدل پر مبنی ہیں؛ وہ دوستی و دشمنی میں نہ کسی کی رعایت کرتے ہیں نہ کسی کا خوف رکھتے ہیں۔

جب اللہ تعالےکے علاوہ کوئی اور کسی کام کرنے کا حکم دیتا ہے ؛ تو اس سے طاقتور کمزور پر مسلط ہو جاتا ہے۔

روئے زمین پر حکومتیں جبر سے قائم ہوتی ہیں اس لیے ماسوا اللہ کی حکومت کافری ہے۔

پختہ کار زبردست آمر، قوانین کے ذریعے اپنے ارد گرد قلعہ بنا لیتا ہے۔

تیز چنگ اور زود گیر شاہیں ممولوں کو اپنے امور حکومت میں مشیر بناتا ہے۔

جبر و تسلط کو قانون اور آئین کی صورت دیتا ہے؛ گویا اندھا اندھے کو سرمہ عطا کرتا ہے۔

پادشاہوں کے آئین و دستور کا نتیجہ یہ ہوتا ہے کہ جاگیردار موٹے ہو جاتے ہیں ؛ اور دہقان تکلے کی مانند نحیف و نازار۔

فرنگی جمہوریت کے دستور پر افسوس، فرنگ کی بانگ صور سے مردہ زندہ ہونے کی بجائے اور زیادہ مردہ ہو جاتا ہے۔

فرنگی شعبدہ باز گردش کرنے والے آسمان کی بساط پر قوموں کو بطور مہرے رکھے ہوئے ہیں۔

کھیلنے والے دولت اکٹھی کرتے ہیں اور میرے دکھ اور یہ لمحہ ایک دوسرے کی گھات میں ہیں۔

'سر دلبراں ' کہنا چاہیے، ہم مال و متاع ہیں اور یہ سب سوداگر۔

سونے چاندی کی محبت نے ان کی آنکھوں سے ہمدردی چھین لی ہے یہاں تک کہ مائیں اپنے بیٹوں کو بوجھ سمجھنے لگی ہیں (ممتا جیسی چیز بھی ختم ہو گئی ہے)۔

افسوس اس قوم پر جو پھل کے خوف سے شجر کے اندر کی نمی کو ضائع کر دیتی ہے۔

اس خوف سے کہ اس کا مضراب تاروں سے نغمہ پیدا نہ کرے ؛ وہ نا زادہ بچوں کو رحم کے اندر ختم کر دیتے ہیں۔

اگرچہ فرنگ رنگا رنگ انداز رکھتا ہے مگر میں انہیں دیکھ کر عبرت حاصل کرتا ہوں۔

اے وہ شخص جو ان کی تقلید کا غلام بنا ہوا ہے آزاد ہو؛ قرآن پاک کا دامن تھام اور صحیح معنوں میں مرد حر بن۔