اللہ تعالے نے حکمت کو خیر کثیر فرمایا ہے؛ جہاں کہیں تو اس خیر کو دیکھے اپنا لے۔

علم مصنف اور خطیب کو شہپر عطا کرتا ہے، اس سے معمولی شخصیت کو بھی اندرونی پاکیزگی حاصل ہو جاتی ہے۔

علم کا راستہ افلاک کی بلندیوں تک پہنچتا ہے ؛ یہاں تک کہ وہ سورج کی آنکھ سے بھی نگاہ چھین لیتا ہے۔

علم ساری موجودات کی تاثیر حاصل کرنے کا نسخہ ہے سب کی تقدیر اسی کی تدبیر کے ساتھ وابستہ ہے۔

اگر علم صحرا سے کہے کہ حباب دے تو وہ دے دیتا ہے؛ اگر وہ بحر سے کہے کہ سراب دکھا تو وہ دکھا دیتا ہے۔

علم کی نظر کائنات کے بارے میں تجربات پر ہے؛ تاکہ وہ کائنات کے بنیادی اصول دیکھے۔

دل کو اگر اللہ تعالے سے لگایا جائے تو یہ پیغمبری ہے؛ اور یہ اگر اللہ تعالےسے بیگانہ رہے تو یہی کافری ہے۔

اگر تو علم کو سوز عشق کے بغیر پڑھے تو یہ شر ہے؛ ایسے علم کا نور بحر و بر کی تاریکی ہے۔

اس علم کے غازے سے دنیا اندھیر نگری بن جاتی ہے ؛ اس کی بہار شجر زندگی کے پتّے گرا دیتی ہے۔

بحر، صحرا، کوہسار، باغ و راغ سب اس کے طیاروں کے بموں سے داغ داغ ہو جاتے ہیں۔

اسی علم نے فرنگیوں کے سینے میں آگ بڑھکائی ہے اور اسی سے انہیں شبخون اور یلغار کی عزت حاصل ہوتی ہے۔

یہ علم زمانے کو پیچھے لے جاتا ہے؛ اور اقوام سے ان کا سرمایہ چھین لیتا ہے۔

اس علم سے حاصل شدہ قوّت ابلیس کی مددگار بنتی ہے اور پھر نار یعنی ابلیس کی صحبت سے علم کا نور بھی نار بن جاتا ہے۔

ابلیس کو مارنا مشکل کام ہے کیونکہ وہ نفس کی گہرائیوں میں گم ہے۔

بہتر یہی ہے کہ تو اسے مسلمان کر لے؛ اور اسے قرآن کی تلوار سے قتل کرے۔

ایسے علم کے جلال بے جمال سے خدا کی پناہ؛ اس کے بے وصال فراق سے خدا کی پناہ۔

بغیر عشق کے علم کا تعلق شیاطین سے ہے اور با عشق علم کا تعلق عارفین الہی سے ہے۔

عشق الہی کے بغیر علم و حکمت مردہ ہے اور عقل ایسا تیر ہے جو نشانے سے دور ہے۔

اندھے (علم) کا دیدار الہی سے بصیر بنا دے اور اس طرح بو لہب کو حیدر کرار (رضی اللہ) میں بدل دے۔

آپ (صلعم) نے قران پاک کے محکمات ظاہر کر دیے؛ (لیکن) وہ جہان (جس کی آپ بات کرتے ہیں) ابھی حجاب میں ہے۔

وہ اپنے چہرے سے پردہ کیوں نہیں ہٹاتا اور ہمارے ضمیر سے باہر کیوں نہیں آتا۔

ہمارے سامنے ایک فرسودہ جہان ہے؛ اور ملت اسی کی خاک میں آسودہ ہے۔

تاتاریوں اور کردوں کے سینے کا سوز ختم ہوا؛ کیا مسلمان مر چکا ہے یا قرآن پاک سے اثر جاتا رہا۔

دین حق کافری کی وجہ رسوا تر ہے؛ کیونکہ ہمارا ملّا کافر گر مومن ہے۔

ہماری نگاہ میں ہماری شبنم سمندر ہے؛ اس کی نگاہ میں ہمارا سمندر شبنم۔

اس قرآن فروش کی طرفہ باتوں کے سبب میں نے جبریل امین (علیہ) کو خشمگین پایا ہے۔

ملّا کا دل آسمان کے اس طرف سے (اللہ تعالے) سے نا آشنا ہے؛ اس کے نزدیک قرآن پاک محض افسانہ ہے۔

وہ جناب رسول پاک (صلعم) کے دین کی حکمت سے محروم ہے؛ اس کا آسمان ستاروں کے نہ ہونے کی وجہ سے تاریک ہے۔

وہ کم نگاہ، کور ذوق اور فضول گو ہے؛ اس کی باتوں سے ملت ٹکڑے ٹکڑے ہو گئی ہے۔

مکتب و ملّا اور قرآن پاک کے اسرار (کی مثال یوں ہے) جیسے مادر زاد اندھا اور آفتاب کی روشنی۔

کافر کا دین جہاد کی فکر و تدبیر اور ملّا کا دین فی سبیل اﷲ فساد۔

مرد حق جو اس جہان چار سو (دنیا ) کی جان ہے اور آج کل خلوت نشین ہے اسے میری طرف سے کہو۔

تیرے افکار سے مومن کی زندگی وابستہ ہے اور تیری گفتار سے ملت ثبات پاتی ہے۔

قرآن حکیم کی حفاظت تیرا آئین ہے، اللہ تعالے کے کلام کو واضح طور پر بیان کرنا تیرا دین ہے۔

تو کلیم ہے کب تک سر نگوں رہے گا؛ اپنا ہاتھ (ید بیضا ) آستین سے باہر نکال۔

ملت اسلامیہ کی سرگذشت بیان کر ؛ آہو کو وسعت صحرا سے آگاہ کر۔

تیری فطرت نور مصطفے (صلعم) سے منوّر ہے ؛ پھر سے بیان کر کہ آخر ہم مسلمانوں کا مقام کہاں ہے؟

اللہ تعالے کا بندہ کسی اور سے رنگ و بو نہیں لیتا وہ صرف اللہ تعالے ہی کا رنگ اختیار کرتا ہے۔

تپش کی وجہ سے ہر لمحہ اس کی جان کا انداز نیا ہوتا ہے؛ وہ اللہ تعالے ہی کی طرح ہر زمانے میں نئی شان سے جلوہ گر ہوتا ہے۔

مرد مومن کو ان رازوں سے پھر آگاہ کر، اسی کے سامنے آیہ شریفہ کہ 'اللہ تعالے ہر ایک نئی شان سے جلوہ گر ہوتے ہیں ' کے معنی پھر بیان کر۔

یہ کاروان حرم شریف کے علا وہ اور کوئی منزل نہیں رکھتا؛ نہ اہل کاروان کے دل میں اللہ تعالے کے سوائے کوئی اور بستا ہے۔

میں یہ نہیں کہتا کہ اس کاروان کی راہ کوئی اور ہے؛ میں کہتا ہوں کہ کاروان اور ہے اور اس کی نگاہ بدل چکی ہے۔

کیا تجھے حضور اکرم (صلعم) کی حدیث معلوم ہے کہ اسلام دنیا میں غریب (احنبی) آیا تھا۔

میں تیرے سامنے اس اچھوتے لفظ کے معنی بیان کرتا ہوں ؛ دین کی غربت سے اہل ذکر کی مفلسی مراد نہیں۔

وہ شخص جو صاحب جستجو ہے اس کے لیے دین کی غربت قرآن پاک کی آیات کی ندرت ہے۔

ہر زمانے میں دین کی غربت کا نیا انداز ہے؛ اگر تو عقل رکھتا ہے تو اس نکتہ کو سمجھ۔

کی آیات مبین پر دوبارہ غور کر ؛ تاکہ تو عصر نو کو اپنی کمند میں گرفتار کر سکے۔قرآن پاک

قرآن پاک کے اسرار کو کوئی نہیں سمجھتا ؛ اہل مشرق ہوں یا اہل مغرب سب پیچ و تاب میں ہیں۔

اہل روس نیا انقلاب لائے ہیں ؛ انہوں نے آب و نان پا لیا اور دین ہار دیا۔

تو حق دیکھ، حق کہہ اور سوائے حق کے اور کسی چیز کی جستجو نہ کر؛ میری طرف سے ملت روسیہ کو ایک دو باتیں پہنچا دے۔