چاند اور نور آفتاب کے درمیان تہ در تہ فضا کے کئی حجاب ہیں۔

ہمارے سامنے سینکڑوں پردے لٹکا دیے گئے ہیں اور اس طرح اپنے آتشیں جلوں کو پیچ در پیچ بنا دیا گیا۔

تاکہ کم سوزی سے دل میں اور زیادہ سوز پیدا ہو؛ اور یہ سوز (شجر حیات) کی شاخوں، پتّوں اور پھل کے لیے مفید ثابت ہو۔

اس کی تپش سے گل لالہ کی رگوں میں خون ہے؛ اس کے رقص سے ندی سیماب کی مانند بے قرار رہتی ہے۔

اسی طرح خاکی بدن میں جان پاک نمودار ہوتی ہے اور چار سو سے بے جہت کی جانب حرکت کرتی ہے۔

جان پاک کی راہ میں موت، دوبارہ زندہ ہونا اور حشر و موت تب و تاب کے سوائے اور کوئی سامان نہیں رکھتے۔

يہ جان پاک سینکڑوں نیلگوں آسمانوں کی فضا میں پیہم غوطے لگاتی اور باہر آتی رہتی ہے۔

يہ جان پاک آپ ہی اپنا حرم ہے اور آپ اپنا ابراہیم (معمار حرم) آپ ہی ذبیح اللہ کی طرح اپنے سامنے سر تسلیم خم کرنے والی ہے۔

نو آسمان اس کے سامنے نو خیبر ہیں ؛ اپنی ضرب حیدری سے وہ انہیں فتح کرتی جاتی ہے۔

ہر لمحہ کی یہ کشمکش اسے پاکیزہ، محکم، سرگرم سفر اور ہوشیار بناتی ہے۔

وہ نور کی فضا میں پرواز کرتی ہے؛ اس کا پنجہ جبریل و حور کا شکار کرتا ہے۔

یہاں تک کہ ما زاغ البصر سے نصیب پاتی ہے اور مقام عبدہ کی ہمسر بنتی ہے (جناب رسول پاک (صلعم) کی معراج کی طرف اشارہ ہے)۔

میں نہیں جانتا میرا مقام کہاں ہے؛ اتنا جانتا ہوں کہ وہ دوستوں سے الگ ہے۔

میرے اندر لشکر و فوج کے بغیر جنگ جاری رہتی ہے؛ اسے وہی دیکھ سکتا ہے جو میری طرح صاحب نگاہ ہے۔

لوگ کفر و دین کی اس جنگ سے بے خبر ہیں ؛ میری جان حضرت زین العابدین (رضی اللہ ) کی مانند تنہا (اسے دیکھ رہی) ہے۔

(اس دور میں) کوئی شخص راستے اور منزل سے آگاہ نہیں؛ سوائے میری آواز کے اور کوئی راستے کا چراغ نہیں۔

بچے، جوان اور بوڑھے سب دریائے (غفلت) میں غرق ہیں ؛ صرف ایک مرد فقیر (اقبال) جان بچا کر ساحل تک پہنچ سکا ہے۔

میں نے اس حریم (کائنات) کے پردے ہٹا دیئے ہیں؛ وصل سے ڈرتا ہوں اور فراق میں آہ و زاری کرتا ہوں۔

اگر وصل سے شوق ختم ہو جائے تو خدا اس سے بے اثر آہ و فغاں کہیں بہتر ہے۔

اگر راہرو کو فراغت راس آ جائے ؛ تو پھر وہ راستہ معلوم کرنے کی کوشش نہیں کرتا۔

میں وہ دل رکھتا ہوں جو ذوق نظر کے سبب ہر لمحہ جہان تازہ کا طلبگار رہتا ہے۔

رومی نے جو میری جان کی کیفیت سے باخبر ہے؛ کہا: اور جہان چاہیے ؟ یہ لے۔

عشق شاطر ہے، ہم اس کے ہاتھ میں مہرے ہیں ؛ سامنے دیکھ ہم زہرہ کے ماحول میں ہیں۔

یہ ایسا جہان ہے جس کا قوام آب و خاک سے ہے؛ یہ حرم کی طرح مشک فام (سیاہ) غلاف میں ہے۔

پردہ سوز اور پردہ پھاڑ دینے والی نگاہ کے ساتھ اس کے بادلوں اور دھند میں سے گذر جا۔

وہاں تو پرانے خدایان باطل پائے گا؛ ان میں سے ایک ایک کو خوب پہچانتا ہوں۔

بعل، مردوخ، یعوق، نسر، فسر، رم خن، لات، منات، عسر، غسر۔

یہ دور حاضر کے توحید سے خالی مزاج کو اپنے دوبارہ واپس آنے کی دلیل سمجھتے ہیں۔