وہ تند و تیز ہوا اور سیاہ تاریک بادل؛ جس کی سیاہی میں برق بھی اپنی چمک گم کر چکی تھی۔

گویا ہوا میں ایک ایسا سمندر آویزاں تھا ؛ جس کا دامن چاک چاک تھا، مگر اس میں سے موتی نہیں گرتے تھے۔

اس کا ساحل ناپید تھا اور موج گرم خیز تھی ؛ مگر وہ ہواؤں سے بہت کم ٹکراتی تھی۔

رومی اور میں اس دریائے سیاہ کے اندر سے اس طرح داخل ہو گئے جیسے شبستان ضمیر میں خیال۔

رومی نے سفر دیکھے ہوئے تھے اور میں نو سفر تھا؛ میری دونوں آنکھوں کی نظر بے صبر ہو رہی تھی۔

میں بار بار کہتا، میری نگاہ وہاں تک نہیں پہنچ رہی؛ وہ نیا جہان کہاں ہے، مجھے نظر نہیں آتا۔

یہاں تک کہ سلسلہء کوہ اور ندیوں اور مرغزاروں کے نشانات ظاہر ہوئے۔

کوہ و صحرا سینکڑوں بہاریں اپنے آغوش میں لیے تھے ؛ پہاڑوں سے آنے والی نسیم میں خوشبو رچی بسی تھی۔

ایک طرف پرندوں کے جھنڈ نغمہ زن تھے ؛ دوسری طرف چشمے تھے اور نیا اگا ہوا سبزہ۔

اس ہوا کے فیض سے تن اور مضبوط تر ہوتا تھا اور جان پاک کو نظر ملتی تھی،

میں نے ایک پہاڑی پر سے نظر ڈالی ؛ اس کوہ و کمر اور دشت و در کا نظارہ بہت پیارا تھا۔

سامنے ایک خوبصورت وادی تھی جس میں کوئی نشیب و فراز نہ تھا ؛ اس وادی کا پانی اس قدر عمدہ تھا کہ خضر (علیہ) کا آب حیات بھی اس کے سامنے سر نیاز خم کرتا تھا۔

اس وادی کے اندر پرانے باطل خدا تھے؛ کوئی مصر کا خدا تھا کوئی یمن کا۔

کوئی عرب کے خداؤں میں سے تھا کوئی عراق کا کوئی وصل کا دیوتا تھا اور کوئی فراق کا۔

یہ سورج کی نسل سے تھا اور وہ چاند کی دیوی کا شوہر تھا؛ وہ مشتری سے شادی کا خواہاں ہے۔

اس دیوتا کے ہاتھ میں دو دھاری تلوار ہے؛ اس دیوتا نے سانپ کو اپنے گلے میں ڈالا ہوا ہے۔

مگر یہ سب اللہ پاک کے ذکر جمیل سے خوف زدہ اور ضرب خلیل (علیہ) سے آزردہ خاطر ہیں۔

مردوخ نے کہا، ابن آدم کلیسا و حرم سے نالہ و فریاد کرتا ہوا آیا ہے اور اللہ تعالے سے دور ہو گیا ہے۔

اور دیکھو کہ اب وہ اپنی سمجھ و نظر میں اضافہ کرنے کے لیے پرانے دور کی طرف واپس آ رہا ہے۔

یہ آثار قدیمہ سے لذّّت حاصل کرتا ہے اور باطل خداؤں کی تجلّیات کی باتیں کرتا ہے۔

اس زمانے نے ایک اور افسانے کا باب کھولا ہے اور خاکدان (دنیا) سے ہمارے موافق ہوا آ رہی ہے۔

(یہ سن کر) بعل نے خوشی کا ایک گیت گایا اور خدایان باطل پر اپنے راز کھولے۔