پیر روم جو صاحب ذکر جمیل ہیں؛ جن کی ضرب کو ضرب خلیل (علیہ) کی سطوت حاصل ہے۔

انہوں نے عالم مستی میں یہ غزل پڑھی اور ہر خدائے باطل سجدے میں گر گیا۔

گزشتہ اور آئیندہ پر دوبارہ نظر ڈالنے کی ضرورت ہے؛ ہلہ اٹھ کہ دوبارہ سوچنے کی ضرورت ہے۔

عشق نے ناقہء ایّام پر اپنا محمل باندھ لیا ہے مگر تو عاشق ہے تو تجھے صرف شام و سحر ہی کو سامان سفر بنانا چاہیے۔

ہمارے پیر نے کہا جہان کسی ایک روش پر مستحکم نہیں رہتا اس لیے اس کی پسند و نا پسند کی پروا نہیں کرنی چاہیے۔

تو اگر جہان سے لاپروا ہو کر بھی اس کا خیال رکھتا ہے ؛ تو پھر تجھے پہلے اپنے سر کی خیر منانا چاہیے۔

میں نے کہا، میرے دل میں بہت لات و منات بسے ہوئے؛ میرے پیر نے کہا اس بتکدے کو تہ و بالا کر دینا چاہیے۔

اس کے بعد رومی نے مجھ سے کہا: 'اے بیٹے اٹھ (آگے چلیں) صرف میرے دامن کو مضبوطی سے پکڑے رکھنا۔

اس کوہستان اور جہان سے کوئی 'ارنی ' کی آواز نہیں اٹھتی؛ وہ پہاڑ کو برف سے چاندی کے انبار کی مانند بنا ہوا ہے۔

اس پہاڑ کے پیچھے الماس کے رنگ کا سمندر ہے جس کا اندرون اس کے بیرون سے زیادہ ظاہر ہے۔

نہ اس کے اندر موج اٹھی ہے، نہ سیلاب ؛ اس کے مزاج میں مستقل سکون ہے۔

یہ زور مست سرکشوں کا مقام ہے، وہ جو غائب کے منکر تھے اور صرف حاضر کے پرستار تھے۔

ان میں سے ایک مشرق سے تعلق رکھتا ہے دوسرا مغرب سے ؛ یہ دونوں مردان حق سے برسر پیکار رہے۔

ان میں سے ایک کی گردن پر عصائے موسی (علیہ) نے ضرب لگائی اور دوسرا درویش (مہدی سوڈانی) کی تلوار سے دو لخت ہوا۔

دونوں فرعون تھے ایک بڑا، ایک چھوٹا؛ دونوں سمندر میں پیاسے مرے۔

ہر کسی کو موت کی تلخی سے آشنا ہونا پڑتا ہے؛ مگر جابروں کی موت اللہ تعالے کی آیات میں سے ہے۔

میرے ہاتھ میں ہاتھ دے اور پیچھے چلتا آ، کسی سے نہ ڈر۔

میں موسی (علیہ) کی طرح اس سمندر کا سینہ چیر دونگا ؛ اور تجھے اس گہرائی کے اندر لے جاؤں گا۔

سمندر نے ہمارے لیے اپنا سینہ کھول دیا، شاید وہ پانی تھا ہی نہیں، ہوا تھی جو پانی نظر آتی تھی۔

اس کی تہ ایک بے رنگ و بو وادی تھی؛ جس کے اندر تاریکی کے پردے پڑے ہوئے تھے۔

پیر رومی نے سورۂ طہ کی تلاوت شروع کر دی ؛ جس سے سورج کے اندر چاندنی پھیل گئی۔

وہاں کے پہاڑ دھلے ہوئے بے آب و گیاہ اور سرد تھے؛ اور وہاں دو مرد سرگشتہ و حیران پھر رہے تھے۔

پہلے انہوں نے رومی کو ایک نظر دیکھا ؛ پھر آپس میں ایک دوسرے پر نظر ڈالی۔

فرعون نے کہا، یہ صبح، یہ نور کی ندی، یہ صحرا، یہ نور و ظہور کہاں سے آیا!

جو بھی پنہاں ہے وہ اس نور سے ظاہر ہو جاتا ہے ؛ اور اس نور کی اصل ید بیضا سے ہے۔

افسوس میں نے عقل و دین کی نقدی ہار دی؛ میں نے اس نور کو دیکھا بھی مگر اسے پہچان نہ سکا۔

اے سلاطین! جو اپنا نقصان کر رہے ہو میری طرف دیکھو۔

افسوس اس قوم پر ہوس زر نے جس کی آنکھیں اندھی کر دی ہیں ؛ جو ہماری قبروں سے عبرت حاصل کرنے کی بجائے لعل و گوہر سمیٹتی ہے۔

ہمارے مجسمے جو عجائب خانے میں پڑے ہیں ان کے لب خاموش پر ایک افسانہ ہے۔

وہ بادشاہت کے انجام کی خبر دیتے ہیں، وہ اندھوں کو نظر عطا کرتے ہیں۔

پادشاہت کی تقدیر کیا ہے؟ پھوٹ ڈالنا ؛ اور پھوٹ کے لیے اپنے آپ کو مستحکم کرنا۔

اس بدنیتی کی وجہ سے ملک کی تقدیر زار و زبوں اور نظام ابتر اور نا محکم ہو جاتا ہے۔

اگر میں کلیم اللہ (علیہ) کو پھر دیکھ لوں تو اس سے ایک دل آگاہ کی فرمائش کروں۔

نور جان کے بغیر حکومت خام ہے، ید بیضا کے بغیر پادشاہت حرام ہے،

حکمرانی محکوموں کی کمزوری سے قوّت حاصل کرتی ہے؛ اس کی جڑ محروموں کی محرومی سے قوی ہوتی ہے۔

تاج کا دار و مدار خراج اور اس کی آدائیگی پر ہے؛ اس سے پتھر جیسا قوی انسان بھی شیشے کی مانند نازک ہو جاتا ہے۔

فوج، قیدخانے اور زنجیریں سب رہزنی ہے؛ حقیقی حاکم وہی ہے جو اس سامان سے بے نیاز ہے۔

انگریزوں کا مقصد بلند ہے، وہ (فرعونوں کی) قبریں لعل و گوہر کے لیے نہیں کھودتے۔

ان کا مقصد یہ ہے کہ اثار قدیمہ سے مصر، فرعون اور موسی (علیہ) کی سرگزشت دیکھی جا سکے۔

پوشیدہ چیز کا انکشاف ہی علم و حکمت ہے؛ بغیر جستجو کے علم بے وقعت ہے۔

ہماری قبر کو تو علم و حکمت نے کھولا لیکن مہدی کی قبر کے اندر کیا تھا۔